Read Sukuma Bible 2015 – Bibilia Ilagano Lya Kale 2015 Ezekia 14 Bible Online

Ezekia 14 - Sukuma Bible 2015 – Bibilia Ilagano Lya Kale 2015 bible

Ezekia 14

¹Bamò ba banamhala ba Baisilaeli bakiza a halī nene, būshika bigasha kū būtongi bone.

²Hūna ū mhayo go ng'wa SEEBA gūnizīīla:

³“Ng'wana wa munhū, a banhū benaba ū mu ng'holò jabo batūūlile shiikolile sha kūlamiwa, hama ū kū būtongi wabo bachaamīkile būbi wa kūbipamya. Nabazunīlīje gete kūnibūūja mhayo a benaba?

⁴Alilūūlū yombaga nabo ūbawīle, ‘Ū Seeba MULUNGU alīhaya gīkī, ūlū Ng'wisilaeli ose ose ūtūūla shiikolile sha kūlamiwa mu ng'holò yakwe, hūna ū kū būtongi bokwe ūchaamīka būbi bo kūng'wipamya, hanuma ya henaho ūja kūlī ng'hangi, nene SEEBA ng'wenekīlī nakūnshokeja kūlenganīla nū būtaale bo wilamīlīja bokwe.

⁵Ū gwenūyū nakūgwīta kūlwa kūjidima hangī ī ng'holò ja banhū ba Isilaeli, abo baanileka kūlwa kūlondeela shiikolile shabo sha kūlamiwa.’”

⁶Hūna lūūlū īwīlage ī numba ya Isilaeli, “Ū Seeba MULUNGU alīhaya gīkī, ‘Galūkagi! Lekanagi nasho ī shiikolile shing'we sha kūlamiwa, galemagi pye a mashītīle ging'we a ga malofu!

⁷Ng'wisilaeli ose ose, nūūlū nobeji ūyo alī mu sī ya Isilaeli, ūlū ūlekana nū nene ū mu ng'holò yakwe ūtūūla shiikolile sha kūlamiwa, hama ū kū būtongi bokwe ūchaamīka būbi bo kūng'wipamya, hanuma ya henaho ūja kūlī ng'hangi gīkī anibūje, nene SEEBA ng'wenekīlī nakūnshokeja.

⁸Ū munhū ng'wenūyo nakwilwisha nang'hwe nene, nakūng'wīta abize būlolelo, akūbiza lūsumo; nakūnkomanya namponyī īnge ū mu banhū bane. Hūna mūkūdeeba gīkī ū nene nalī SEEBA.’

⁹“Alīyo ū ng'hangi ūlū ūdutwa ūfunya būhangi, nene SEEBA nandutaga ū ng'hangi ng'wenūyo, nakūgoloola nkono nilwishe nang'hwe nankenaagūle īnge ū mu banhū bane a Baisilaeli.

¹⁰A bose bakūgwīlwa nsango, ū ng'hangi akūpandīka nsango gūtikīlile nū gwa nombi wa kūhangīlwa.

¹¹Ū mu kwīta gīko a ba numba ya Isilaeli bakooya ū kūnileka ū nene, nīyo bakooya nū kwisosohaja ū mu shibi shabo ī shose. Bakūbiza banhū bane, nū nene nakūbiza Mulungu wabo; alīhaya Seeba MULUNGU.”

¹²Ū mhayo go ng'wa SEEBA gūnizīīla,

¹³“Ng'wana wa munhū, ī sī ūlū yūnihūba mu nzīla ya kooya kūbiza sanyiwa, hūna nīgoloolela nkono kwīyīngīja ī shilīwa gīkī īgwīlwe nzala, nababūlage a banhū nī mitugo jabo,

¹⁴nūūlū būbiza balīmo a banhū a badatū aba, Noa, Danyeli, na Ayubu, bakwipīja boi dūhū kūlwa būtūngīlīja wabo; alīhaya Seeba MULUNGU.

¹⁵Nūūlū nūtūma mashiinū makalī pye a hose ū mu sī yenīyo, gabamale mo a baana īlekwe īlī dalali, ndūhū na wa kūbīta moi kūlwa nguno ya mashiinū a makalī genayo,

¹⁶ū Seeba MULUNGU alīhaya gīkī, Ūmo nene nalī mpanga, nūūlū a banhū a badatū benaba būbiza moi batūdūla kūpīja bitūnja nūūlū bashīke babo; bakūpīla boi dūhū, alīyo ī sī īkūbiza būyīkī.

¹⁷“Hama nūūlū nūtūma būlūgū ū mu sī yenīyo nūhaya gīkī, ‘Leka būbīte mo būlūgū ū mu sī yenīyo pyī ī yose,’ hūna nūbabūlaga a banhū baamo nī mitugo jabo,

¹⁸nūūlū būbiza balīmo a banhū a badatū benaba, ūmo nene nalī mpanga, batūdūla kūpīja bitūnja nūūlū bashīke babo; alīhaya Seeba MULUNGU. Bakūpīla boi dūhū.

¹⁹Nūūlū nūtuma mabūsaatu ū mu sī yenīyo nūwita mo ū būpelanu bone mu nzīla ya kūyagaja, nūbabūlaga a banhū baamo nī mitugo jabo,

²⁰ūmo nene nalī mpanga, alīhaya Seeba MULUNGU; nūūlū būbiza balīmo moi ba Noa na Danyeli, na Ayubu, batūdūla kūpīja ng'witūnja nūūlū nshīke. Bakwipīja boi dūhū kūlwa būtūngīlīja wabo.

²¹“Nguno ū Seeba MULUNGU alīhaya gīkī, Ū būbi būkūbiza būtaale no; nguno ī Yelusalemu nakwītūmīla mbika inè ja kalamulīle kane, līlūshū, nzala, mashiinū, na būsaatu, kūlwa kūbabūlaga a banhū baamo nī mitugo jabo!

²²Alīyo nahene bakwigela a ba kūpīla, bakūbiza ho bitūnja na bashīke abo bakwīnjiwa mo. Bakwiza kūlī bebe, nang'ho ūlū ūshibona ī shīmīle shabo nī shītwa shabo, ūkūlūngūjiwa ū mu mihayo ya būkenaagūji pyī ū bose ūbo nalīyenhela ī Yelusalemu.

²³Ūkūlūngūjiwa ūlū ūjibona ī nhūngwa jabo nī shītīle shabo, nguno ūkūdeeba gīkī ū nzengo gwenūyo natagwītīlile mhayo gose gose na nguno yaya; alīhaya Seeba MULUNGU.”