Read Sukuma Bible 2015 – Bibilia Ilagano Lya Kale 2015 Ezekia 15 Bible Online

Ezekia 15 - Sukuma Bible 2015 – Bibilia Ilagano Lya Kale 2015 bible

Ezekia 15

¹Ū mhayo go ng'wa Seeba gūnizīīla,

²“Ng'wana wa munhū, ī litambī lya nzabibu līlī na wiza kī bo kūgaheeba a matambī ga mintī ī yīngī ī ya mu masaka?

³Bakīnjaga ho ntī gwa kūtūmamīla nīmo gose gose? Badūgije kūbbuta itambī būbeeja nūūlū lūmambo lwa kūkoma hanhū kūnungeleja ho shose shose?

⁴Ūlū lyūponejiwa mu moto gīkī lībize shipembo, hūna lyūjiga ū lwandī ūlū nū lūūlū, a ha gatī lyūgelela kūbabūka; īlo lyasaagaga līkwigeleelwa kū nīmo gose gose?

⁵Ī gīsī īkī aho lītaalī igima lītī na solobo yose yose, hama ūlū lyūjiga na kūbabūka līkūbeelela kū nīmo kī lūūlū?

⁶“Alilūūlū ū Seeba MULUNGU alīhaya: Ūmo naasolelaga nzabibu kūfuma mu mitī ya mu masaka nūgūfunya gīkī gūpemve mu moto, h'ūmo nakūbīītīla na a banhū ba Yelusalemu.

⁷Nakūbadīlīla nabinhe nsago; nūūlū īkī baagūpūlūgūkile ū moto, alīyo nahene ū moto gūkūbakenaagūla dūhū. Hūna mukūdeeba gīkī ū nene nalī SEEBA, ūlū nūbadīlīla kūbinha nsango.

⁸Ī sī nakwīyīta lībize itogolo lyike, nguno batī basanyiwa; alīhaya Seeba MULUNGU.”