Read Sukuma Bible 2015 – Bibilia Ilagano Lya Kale 2015 Ezekia 17 Bible Online

Ezekia 17 - Sukuma Bible 2015 – Bibilia Ilagano Lya Kale 2015 bible

Ezekia 17

¹Ū mhayo go ng'wa SEEBA gūnizīīla gūlīhaya,

²“Ng'wana wa munhū, ganaga lūgano ūbinhe lūsumo a banhū ba numba ya Isilaeli.”

³Bawīlage, Ū Seeba MULUNGU alīhaya gīkī, “Ng'hoonà nhaale ya booya wingī bo mabbado ga būlī mbika, na manana ga nguzu ga nzooya ndīhu; īkiza Lebanoni, yūgwa hitambī lya kwigūlya ya ntī gwa manga yūlīdima.

⁴Hūna yūbbuta katambī kanagana ū kū neno yalyo, yūlala nako kūja kū sī ya basūlūja yūkakahamba mu nzengo gwa basūlūja.”

⁵Hanuma yūsola mbīyū kūfuma ū mu sī ying'we, yūkīhamba h'ibbaala lībeegelejiwe lyūtūūlīlwa na mboleela, yūyīhamba gīt'igobeko hihī na minzī mingī.

⁶Yūzwa yūkūla gūbiza nzabibu gūfulumile chiza gūūlandaala. A matambī ga nzabibu gīgalūkīla ī ng'hoonà yenīyo, nī miji yūhama a hasī. Gūūkūla gūbiza nzabibu gwaala matambī na kūfuluma madūūtū.

⁷Alīyo yalīho na ng'hoonà yīngī nhaale, ya manana ga nguzu na booya wingī. Ū nzabibu gwenūyo gwandya kūsonja ī miji kwīnga aho gwalī gūhambīlilwe, na a matambī gago gūūgagalūcha, kūīlīla ū kū ng'hoonà yenīyo, gūkwisagīlagwa kūpandīka minzī.

⁸Alīyo gwalī gūhambīlilwe mu sī soga na minzī mingī gaalīho ga kūgwīta gūbize nzabibu gwawiza, gwa matambī mingī na mizabibu misoga.

⁹Bawīlage lūūlū, Ū Seeba MULUNGU alīhaya gīkī, “Ū nzabibu gwenūyo gūkūlama? Gūtūdubbūlwa pyī nī miji yago gahūlūlwe a matwajo, a matambī a managana ayo gakūsongaga ganyaale pye? Ū kūgūdubbūla jitūgongwa nguzu ningī, nūūlū ibità lya banhū.

¹⁰Ī gīsī ūlū gwīnjiwa aho gwalī gūhambīlilwe gūsaamiwa, gūkūpīla gūfulume? Gūtūūma kūlū kūlū gete ūlū gūūtūlwa lūyaga lo kīya?”

¹¹Ū mhayo go ng'wa SEEBA gūnizīīla gūlīhaya,

¹²“Ī numba ya būshitiigwa yenīyī īwīlage, ‘Mūtūdeebaga ī mihayo yenīyī īlī na makūlū kī?’ Bawīlage gīkī, ‘Ū ntemi wa Babuloni akaja ī Yelusalemu ūūkansaamya ū ntemi wa kwene na a bana ng'oma bakwe, wiza nabo kūūnū Babuloni.

¹³Hūna ūsola ūmò ū mu ba lūdūgū lwa ntemi, ūbeeja ilagane nang'hwe, ūng'wilahīja. Na a bataale bataale a bangī ū mu sī ūbasaamya,

¹⁴gīkī ū būsugi būmajiwe ī shingilima, būtizūgūngūmūka hangī, wīmīīle mu nzīla ya kūdima ilagane lyakwe dūhū.’”

¹⁵Alīyo ū ntemi ū mpya akangomela ū ntemi wa Babuloni; ūtūma nhūng'wa Misili gīkī akenhelwe falasa n'ibità lya bashilikale bingī. Akūdūla gete? Ū munhū wa kwīta īlī gīko akūpūlūgūka? Akūgelela kūkenaagūla ilagane dūhū alīyo ū wei ūpīla?

¹⁶Ūmo nene nalī mpanga; alīhaya Seeba MULUNGU, akūchīla Babuloni, mu sī ya ntemi ūyo walī wantūūla ha būtemi, ūyo akadalaha shilahīlo shakwe, nī lilagane lyakwe ūlīkenaagūla.

¹⁷Ū ng'wikanza lya būlūgū ūlū gūūtūlīīlwa matūūgo ga malongo kūlwa kwingīla ū mu nzengo, jūpīndīlījiwa na ng'hambī kūlwa kūkenaagūla būpanga wa banhū bingī, ū Falao nī libità lyakwe lya banhū ba nguzu na bashilikale bingī, atīko kūngunanha ū ntemi ng'wenūyo.

¹⁸Nguno washidalaha ī shilahīlo ūbūkenaagūla ū būlagane ūbo walī wabūzunya ūbūtūūlīla na nkono gwakwe wei ng'wenekīlī, alīyo hū wīyīta pyī ī mihayo yenīyī; atūpīla!

¹⁹Hūna lūūlū ū Seeba MULUNGU alīhaya: Ūmo nene nalī mpanga, nakūng'winha nsango kūlwa shilahīlo shane īsho washidalaha, nī lilagane lyane īlo walīkenaagūla.

²⁰Nakūgoloola ikila lyane līngobanīje; lūkūmpuja ū lūtu lwane nantwale Babuloni; nakūjūng'winha nsango kwenūko, nguno ya kūbūkenaagūla ū būsanyiwa bokwe ū kūlī nene.

²¹A bashilikale bakwe abo abasanije bakūbūpeela ū būlūgū, alīyo bakūja bakūbūlagagwa nzīla ngima; abo balasaage bakūbbalasana bajile sagala; a henaho hū mukūdeeba gīkī ū nene SEEBA hū nahayaga.

²²Ū Seeba MULUNGU alīhaya; Nene ng'wenekīlī nakwīnja itambī kūfuma kwigūlya ya manga nalīhambe; nakūtīna'itambī inagana kwīngīīla kū neno yago nakalīhambe kwigūlya ya lūgūlū lūlīhu.

²³Nakūlīhamba kwigūlya ya ngūlū ja Isilaeli; gūkūkūla gūbize na matambī mingī gūtwaje matwajo; gūkūbiza manga gwawiza no. Noni ja būlī mbika jikūbeeja mo chanjo, jikūpandīka būhooyelo ū mu mbeho ya matambī gago.

²⁴Hūna lūūlū pyī ī mitī ya mu matogolo īkūdeeba gīkī ū nene Seeba nakībbutaga ī mitī milīhu, hama ī miguhī nakīyītaga īkūle. Nakīyūmīchaga ī mitī ī midoto, ī myūmu nīyīta kūfuluma. Nene SEEBA nalīhaya, na nakwīta.