Read Sukuma Bible 2015 – Bibilia Ilagano Lya Kale 2015 Ezekia 18 Bible Online

Ezekia 18 - Sukuma Bible 2015 – Bibilia Ilagano Lya Kale 2015 bible

Ezekia 18

¹Ū mhayo go ng'wa SEEBA gūnizīīla:

²Mulī na makūlū kī ū kwikala mukūlūtūmamīlaga ū lūsumo ūlū ū mu sī ya Isilaeli, A babyaji baalya mizabibu ītapiile, a mino ga baana gīta wigilya?

³Ūmo nene nalī mpanga; alīhaya Seeba MULUNGU, mutikala mukūlūtūmamīlaga ū lūsumo lwenūlū ū mu sī ya Isilaeli.

⁴Managi gīkī būlī munhū alī wane, ū myaji nū ng'witūnja; a bose batikīlile, balī bane. Ū munhū wa kwīta shibi h'ūyo akūcha.

⁵Ī gīsī ū munhū ūlū ntūngīlīja hangī akīītaga ītūngīlīgije na ya wīīmà,

⁶atajaga kū ngūlū wakalya sha mu maduku ga kwitongelegeja, nūūlū atī nsanya wa shiikolile īsho ba numba ya Isilaeli bakashilamyaga, na atī nsosohaja wa bake ba bazenganwa biye, nūūlū atalaalaga na nkīma alī ng'wikanza lya mininga gakwe.

⁷Atiboneelaga munhū ose ose, alīyo akashoshaga īsho akasolaga gītī ng'handīko kūlw'igasa. Atī ng'wibi, alīyo akabalishaga abo balī nzala, na kūbazwīka abo balī na makoye ga būzuuka.

⁸Ūyo atahūngaga banhū nūūlū atapandīkaga solobo mu nzīla ya makoye ga bangī; ūyo akilang'hanaga atizīta yabūbi, hangī akabalamulaga mu būtūngīlīja a banhū;

⁹nondeeji wa malange gane, nī shilagīlo shane ashidimile mu kūsanyiwa. Ū munhū ng'wenūyo ntūngīlīja, akūpīla; alīhaya Seeba MULUNGU.

¹⁰Ūlū ūbyala ng'wana ng'wiboneeji, mūlagi wa banhū, nūūlū akīītaga īmò n'īmò ū mu yenīyī,

¹¹(nūūlū īkī ū ise atītile nūūlū gūmò gwa yenīyī): Akajaga kū ngūlū wakalya sha mu maduku ga kwitongelegeja, na nsosohaja wa bake ba bazenganwa biye.

¹²Ūlū ng'wiboneeji wa bahabī na bagayiwa, munhū ng'wibi, na atashoshaga īsho akasolaga gītī ng'handīko kūlw'igasa; namya wa shiikolile sha kūlamiwa, na ng'wīti wa mihayo y'ipelanya.

¹³Ūlū akapandīkaga solobo mu nzīla ya banhū abo balī mu makoye. Ū munhū ūyo alī gīko akūpīla? Na hado yaya! Akūbūlagwa kūlwa nguno wīta pyī ī mihayo y'ipelanya yenīyī, ū lūfu lwenūlo akūbalīlwa wei ng'wenekīlī.

¹⁴Alīyo ū munhū ng'wenūyo ūlū nang'hwe ūbyala ng'wana ūyūbūbona ū būbi ū bose ūbo ise akūwītaga, alīyo nūūlū īkī akūbūbonaga ūleka ū kwīta nūūlū gūmò gwaho,

¹⁵Ūūleka kūja ū kū ngūlū kūjūlya sha mu maduku ga kwitongelegeja, nūūlū kūsanya shiikolile sha kūlamiwa sha banhū ba numba ya Isilaeli, yaya nūūlū kūnsosohaja nke wa nzenganwa ng'wiye,

¹⁶yaya nūūlū kūng'wiboneela munhū ose ose, nūūlū kūgonga ng'handīko h'azunye kūfunya igasa, ūlū ūleka kūbiza ng'wibi, alīyo ūyūbinha shilīwa abo balī nzala, na a bazuuka ūyūbinha shizwalo,

¹⁷wilang'hana gete atizīta shibi, nūūlū atizūūpandīka solobo kūfuma mu makoye ga banhū bangī, ūshidima ī shilagīlo shane, na a malange gane ūyūgalondeela; ū ng'wenūyo atūcha kūlwa shibi sha ng'wa ise, akūpīla gete atūyagaala yaya.

¹⁸Alīyo ū ise akūcha kūlwa shibi shakwe; nguno watūmamīlaga nzīla ja wiboneeji ū mu kwipandīkīla ī sabo jakwe; wabanyeekejaga a banhū; wabīītīlaga yabūbi a banhū bang'wawe.

¹⁹Alīyo mukūbūūjaga, “Nibūlī ū ng'wana atizūsangīla ū mu būbi bo ng'wa ise?” Kūlwa nguno ū ng'wana alīīta ītūngīlīgije na ya wīīmà, na kūlwa kūgadima a malange gane mu kwilang'hana; na ng'hana shigelile apīle ū ng'wenūyo.

²⁰Ū munhū wa kwīta shibi h'ūyo akūcha; ū ng'wana atūsangīla ū mu būbi bo ng'wa ise, nūūlū ū myaji atūsangīla ū mu būbi bo ng'wana. Ū ntūngīlīja akūbalīlwa būtūngīlīja bokwe, nū wabūbi nang'hwe akūbalīlwa būbi bokwe.

²¹Alīyo ū munhū wabūbi ūlū ūgalūka ūshileka ī shibi shakwe ī shose īsho washīta, ūdimana na katongeelele kane a kose hūna wīta ītūngīlīgije na ya wīīmà, akūpīla ng'hana gete, atūyagaala yaya.

²²Ū būhūbi pyī ūbo wawīta atūbalīlwa nūūlū hado. Akūbiza mpanga kūlwa shītīle sha būtūngīlīja īsho akwītaga.

²³Ū nene nakayejiagwa na kūcha kwa munhū wabūbi? Alīhaya Seeba MULUNGU. Ītī gīkī nakayegaga ūlū wagalūka kwīnga mu nzīla jakwe apīle?

²⁴Alīyo ū munhū ntūngīlīja ūlū ūgalūka kwīnga ū mu būtūngīlīja bokwe wandya kwīta shibi, ūyīta y'ipelanya īyo īkīītagwa na banhū babūbi; angū, akūpīla? Ū mu shītīle shakwe sha būtūngīlīja shitizūkīlwa mo nūūlū shimò. Akūchīla mu būbi kūlwa būtūsanyiwa bokwe, na kūlwa shibi īsho akūshītaga.

²⁵Alīyo mukūhayaga, “Ī nzīla ya ng'wa SEEBA ītatūngīlīgije.” Igwaga lūūlū bebe numba ya Isilaeli, Ī nzīla yane ītatūngīlīgije? Ītī nzīla jing'we ījo jitatūngīlīgije?

²⁶Ū munhū ntūngīlīja ūlū ūgalūka kwīnga ū mu būtūngīlīja bokwe wandya kwīta shibi, akūchīla musho; akūcha kūlwa nguno ya shibi īsho alashīte.

²⁷Alīyo ū munhū wabūbi ūlū ūgalūka ūbūleka ū būbi bokwe ūbo wawīta, hūna wīta ītūngīlīgije na ya wīmà, akūbūpīja ū būpanga bokwe.

²⁸Nguno ya kūwiganika pyī ū būhūbi bokwe ūbo owīta, hūna ūgalūka ūlekana nabo; ū ng'wenūyo akūbūpīja ū būpanga bokwe, atūyagaala yaya.

²⁹Alīyo ī numba ya Isilaeli īkūhaya, “Ī nzīla ya ng'wa SEEBA ītatūngīlīgije.” Bing'we numba ya Isilaeli, ī nzīla jane jitatūngīlīgije? Ītī nzīla jing'we ījo jitatūngīlīgije?

³⁰Alilūūlū numba ya Isilaeli, nakūmulamula; būlī ng'wene kūlenganīla na nzīla jakwe; alīhaya Seeba MULUNGU. Galūkagi mulekane nabo pyī ū būhūbi wing'we, hūna ī shibi shitūbiza ishikī lya kūmugwisha.

³¹Lekanagi nabo pyī ū būhūbi ūbo ng'wawīta, ng'wanukūle ng'holò mhya na moyo mpya. Nibūlī muyagaale, Bing'we numba ya Isilaeli?

³²Nguno ū nene natayejiagwa na kūcha kwa munhū ose ose, alīhaya Seeba MULUNGU. Galūkagi mupīle!