Read Sukuma Bible 2015 – Bibilia Ilagano Lya Kale 2015 Ezekia 2 Bible Online

Ezekia 2 - Sukuma Bible 2015 – Bibilia Ilagano Lya Kale 2015 bible

Ezekia 2

¹Ūniwīla, “Ng'wana wa munhū, īmīīlaga na magūlū gako nahooye nang'ho.”

²Aho alīyomba Moyo ūningīla, ūnigūngūmūla nīmīīla na magūlū gane; nūng'wigwa alīniyombya.

³Ūniwīla, “Ng'wana wa munhū, nalīkūtūma kū Baisilaeli, kwihanga igomi īlo līnigomelile; a boi na a babyaji babo bagomi ū kūlī nene kūshisha lelo īyī.

⁴A banhū abo nalīkūtūma kūja kūbo bagagabazu, hangī balambu no. Ūkūbawīla, ‘Ū Seeba MULUNGU alīhaya gīkī.’

⁵Badegeleke nūūlū baleme ū kūdegeleka, nguno a boi balī numba ya būshitiigwa, nahene bakūdeeba gīkī walī wilongile ng'hangi ū mubo.

⁶Alilūūlū ng'wana wa munhū, ū bebe yaya ū kūbogoha a boi nūūlū ī mihayo yabo. Yaya ū kogoha gete nūūlū īkī ūpīndiwe magwaata na ming'hwa, hama ūkwikalaga hamò na ng'homi; yaya ū kwīyogoha īyo bakwīhayaga, nūūlū a boi batizūkogohya, nguno a benabo balī numba ya būshitiigwa.

⁷Ū bebe ūkūbawīla ī mihayo yane, badegeleke nūūlū baleme ū kūdegeleka, nguno a boi balī numba ya būshitiigwa.

⁸Alīyo ū bebe ng'wana wa munhū, gūdegelekage ūyo nalīkūwīla. Yaya ū kūbiza shitiigwa gīt'ūmo īlī ī numba ya būshitiigwa yenīyo; asamaga ū nomo gwako ūlyī īsho nalīkwinha.”

⁹Aho naalola nūbona nkono gūgoloolilwe kwiza halī nene, gūdiimile shitabo,[5]

¹⁰ūshikundūla[6] ū kū būtongi bone. Ū mu gatī na a higūlya shalī shandīkile mihayo ya ng'hūngū na kūlīla na mayanga.