Read Sukuma Bible 2015 – Bibilia Ilagano Lya Kale 2015 Ezekia 20 Bible Online

Ezekia 20 - Sukuma Bible 2015 – Bibilia Ilagano Lya Kale 2015 bible

Ezekia 20

¹Mu lūshikū lwikūmi ng'weji gwa katanò, ng'waka gwa mpungatī, bamò ba banamhala ba Isilaeli bakiza kūbūūja kūlī SEEBA; būshika bigasha kū būtongi bone.

²Mhayo go ng'wa SEEBA gūnizīīla:

³Ng'wana wa munhū, lūngalūngaga nabo a banamhala ba Isilaeli ūbawīle, “Ū Seeba MULUNGU alīhaya gīkī, ‘Ng'wizaga kūbūūja kūlī nene? Alīyo ūmo nene nalī mpanga, natūmuzunīlīja kūnibūūja mhayo;’ alīhaya Seeba MULUNGU.”

⁴Alihooyaga nabo! Ng'wana wa munhū ūdūgije ū kūhooya nabo? Bizūkījage ī shītīle sha basaabo ī sh'ipelanya;

⁵ūbawīle gīkī, “Ū Seeba MULUNGU alīhaya, Ū mu lūshikū nansolelaga ū Isilaeli, nakawilahīlīla ū būbyīle wa numba ya ng'wa Yakobo; niyoolecha ū kūbo balī mu Misili. Nūgoloola nkono gwane nūbawīla, ‘Ū nene nalī SEEBA Mulungu wing'we.’

⁶Ū mu lūshikū lwenūlo nakabilahīlīla gīkī nakūbīnja ū mu sī ya Misili nabatwale kū sī īyo naalī nīkooba kūlwa nguno yabo; sī ya būhondo, sī yawiza kūtinda jose.

⁷Nakabawīla, ‘Būlī ūmò wing'we n'agaponyage a mashigīmbo gakwe ga malofu ayo agakalalīlile, yaya ū kwikala ng'wisosohaja na shiikolile sha kūlamiwa sha Misili; ū nene nalī SEEBA Mulungu wing'we.’”

⁸Alīyo bakanigomela, būlema ū kūniigwa; batagaponije a mashigīmbo gabo ga malofu ayo baalī bagakalalīlile, nūūlū a shiikolile sha kūlamiwa sha Misili batashilekile. Hū nūhaya kūbitīīla būpelanu bone, nabūmalīle kūbo ū būdaki bone aho balī mu Misili.

⁹Kwike kūlwa nguno ya lina lyane, nūbeeja gwa kūlīlang'hana lītizūsosohala mu būtongi wa banhū ba mahanga abo bikalaga mubo, abo mu būtongi wabo naalī niyoolecha ū kū Baisilaeli kūlwa kūbafunya ū mu sī ya Misili.

¹⁰Hūna lūūlū nūbafunya ū mu sī ya Misisli, nūbatongeela kūja kū sī y'itogolo.

¹¹Nūbinha malange gane, nī shilagīlo shane nūbakundūlīla, īsho ūlū munhū ūshidima akūbiza mpanga kūlwaasho.

¹²Nīyo nī sabato jane nūbinha, jibize būmanīkījo a ha gatī yane na a boi, badeebe gīkī ū nene SEEBA hū nakabīītaga kūbiza beela.

¹³Alīyo a banhū ba numba ya Isilaeli būnigomela aho balī ū mu sī y'itogolo, batashimīzīlile ū mu malange gane, nī shilagīlo shane būshilema, īsho ūlū munhū ūshidima akūbiza mpanga kūlwaasho. Ī sabato jane ī jene būjisosohaja kībi no. Hūna nūhaya nabitīīle būpelanu bone, nabamalīle ū mu sī y'itogolo.

¹⁴Kwike kūlwa nguno ya lina lyane nūbeeja gwa kūlīlang'hana lītizūsosohala mu būtongi wa banhū ba mahanga, abo baalī baabona nalībīnja a Baisilaeli ū mu sī ya Misili.

¹⁵Alīyo nahene nakagoloola nkono gwane nūbilahīlīla aho balī ū ng'witogolo; gīkī natūbingīja ū mu sī īyo naalī nabinha; sī ya būhondo, sī yawiza kūtinda jose.

¹⁶Ū gwenūyū nakagwīta kūlwa nguno baalī bashilema ī shilagīlo shane, na a malange gane baalī balema ū kūgalondeela; nī sabato jane bajisosohajaga, nguno ī ng'holò jabo jalī jilolile kū shiikolile sha kūlamiwa.

¹⁷Alīyo nūbachīla shigongo nahene, nūleka ū kūbakenaagūla nūūlū kūbamala gete aho balī kwitogolo.

¹⁸Nūbawīla a baana babo ū kwitogolo kwenūko, Yaya a bing'we ū kūlondeela kajīle ka basīng'we, nūūlū ū kūshidima ī shilagīlo shabo, nūūlū kwisosohaja kūlwa shiikolile shabo sha kūlamiwa.

¹⁹Ū nene nalī Seeba Mulungu wing'we, galondeelagi a malange gane, mushidime mu welwa ng'holò ī shilagīlo shane.

²⁰Nī sabato jane jikūjagi jiikale neela ū kū bing'we, jibize būmanīkījo a ha gatī yane na a bing'we; mudeebe gīkī ū nene hū nalī SEEBA Mulungu wing'we.

²¹Alīyo na a baana babo bakanigomela, batagalondeelile a malange gane; nī shilagīlo shane batashidimile mu welwa ng'holò, nūūlū īkī ūlū munhū ūshidima akūbiza mpanga kūlwaasho; pyī nī sabato jane būjisosohaja. Hūna nūhaya nakūbitīīla būpelanu bone, ū būdaki bone nabūmalīle kūbo ū mu sī y'itogolo.

²²Kwike nūgūlemeja ū nkono gwane, na kūlwa nguno ya lina lyane nūbeeja gwa kūlīlang'hana lītizūsosohala mu būtongi wa banhū ba mahanga, abo baalī babona nalībīnja a Baisilaeli ū mu sī ya Misili.

²³Alīyo nahene nakagoloola nkono gwane nūbilahīlīla aho balī ū ng'witogolo; gīkī nakūbabbalasanya mu mahanga, nabasambaagīje hose pyī ū mu masī,

²⁴kūlwa nguno baalī batashiigwaga ī shilagīlo shane, na a malange gane baalī bagalemile, nī sabato jane baajikenaagūlaga, īkī a miso gabo gaalī gaadutwa na shiikolile sha kūlamiwa sha basaabo.

²⁵Hanuma ya henaho nakabatūūla ha sīlīlī ya malange mabi, na shilagīlo īsho shaalī shitadūgije kūbagunanha kūpandīka būpanga.

²⁶Nīyo nūbalekanīja bandya kwisosohaja mu nzīla ya shakwinha shabo, būyūbafunya shitambò a babyalwa babo ba kwandya; nsango gwa kogohya, badeebe gīkī ū nene hū nalī SEEBA.

²⁷Alilūūlū ng'wana wa munhū, bawīlage a Baisilaeli īyo nene Seeba MULUNGU nalībawīla: Gūūyū mhayo gwa koolecha gīkī a bakūlūgenji babo baalī banibengelegije kūlwa kūnileka:

²⁸Nguno aho nabashisha ū mu sī īyo naalī nabisagīj kūbinha, bandya kūyūfunya shitambò shabo būlī hene aho babona ka lūgūlū nūūlū ntī gwa madūūtū mingī, būyūfunya shakwinha shabo sha kūnipelanya, na shitambò sha ng'waso gwawiza, na sha kūng'wiwa.

²⁹Nakababūūja: A mapandī ga higūlya geneya mukikalaga ng'ūja koi, ni ga kinehe? (Kūshisha lelo gakitanagwa Bama, makūlū gaho ū mu Shihebulania ipandī lya higūlya).

³⁰Alilūūlū bawīlage a ba numba ya Isilseli gīkī, “Ū Seeba MULUNGU alīhaya, A bing'we mukwikala ng'wisosohaja ūmo bīītīlaga basīng'we, na kūgikūmvwa a mashigīmbo gabo ga malofu?

³¹Ūlū ng'wabafunya shakwinha a baana bing'we, gīkī babize shitambò sha kūpemvwa mu moto, kūshisha lelo īyī mukwisosohajaga kūlwa mashiikolile ging'we ga kūlamiwa pye a gose. Nikale nūmuzunīlīja kūnibūūja bing'we ba numba ya Isilaeli? Ūmo nene nalī mpanga; alīhaya Seeba MULUNGU, natūmuzunīlīja kūnibūūja mhayo.”

³²Mūkūhayaga, “Tūtogilwe kūbiza gītī mahanga gangī, gītī banhū ba mu sī, abo bakalamyaga mitī na mawe.” Kwike ūyo mukūgwiganikaga gūtilonga.

³³Nguno ūmo nene nalī mpanga, alīhaya Seeba MULUNGU, nakūmusuga na nkono gwane gwa būdūla, nakūgūgoloola mu būpelanu būtaale.

³⁴Nakūng'wenha kūfuma kū mahanga ga banhū, nakūgoloola nkono gwane gwa būdūla mu būpelanu būtaale, namubilinge kūfuma ū kū mahanga ga banhū, kūfuma ū kū sī ījo ng'wasambaagījiwa.

³⁵Nakūmutwala kwitogolo lya mahanga, nakamanhye ning'we būshū kū būshū kwenūko nang'winhe nsango.

³⁶Ūmo nakabinhīla nsango basīng'we kwitogolo lya Misili, na a bing'we nakūng'winha nsango gīko; alīhaya Seeba MULUNGU.

³⁷Nakūmusuga nene ng'wenekīlī na nang'ha gwane, nang'wingīje mu būsangī wa būlagane.

³⁸Nakūmsūngūla nabīnje mo a bagomi na a bashitiigwa; a benabo nūūlū īkī nakūbīnja ū mu sī ījo biikalaga, alīyo nahene batingīla ū mu sī ya Isilaeli. Hūna mukūdeeba gīkī ūnene nalī SEEBA.

³⁹Hūna lūūlū a bing'we numba ya Isilaeli, ū Seeba MULUNGU alīhaya gīkī, Jagi; būlī ūmò wing'we akagatūmamīle a mashiikolile ging'we ga kūlamiwa! Alīyo a hanuma ya henaho mukūnidegeleka ng'oye ū kūlīsosohaja ī lina lyane lyeela mu nzīla ya kūnifunīja shakwinha shing'we na mashiikolile ging'we ga kūlamiwa.

⁴⁰Nguno ū kū sī yenīyo, ū kū lūgūlū lwa Isilaeli, ū lūgūlū lwane lwela, ī numba ya Isilaeli īkūnitūmamīla pyī ī yose; alīhaya Seeba MULUNGU, nū nene nakūbanukūla ū kwenūko. Nī shakwinha shin'gwe nakūshikoobela kwipandī lyenīlo, na a manong'ho a gawiza nī shitambò shing'we ī sheela.

⁴¹Nīyo ūlū nūng'wīnja ū kū mahanga, nūmubilinga kūfuma ū kū sī ījo musambaalīlile, nakūng'wanukūla mubize gītī shakwinha sha ng'waso gwawiza; hūna nakwiyoolecha nalī ng'wela ū mu bing'we, na a mahanga gakūbona.

⁴²Ūlū nūmushisha ū mu sī ya Isilaeli, ī sī īyo nakagoloola nkono nūbilahīlīla bakūlūgenji bing'we gīkī nakūbinha, a henaho mukūdeeba gīkī ū nene nalī SEEBA;

⁴³nī nhūngwa jing'we mukūjiizūkwa, pyī nī shītwa shing'we īsho shang'wenheleja kūsosohala, mukwidalaha no kūlwa būbi bose ūbo ng'wawīta.

⁴⁴Bing'we numba ya Isilaeli, ū Seeba MULUNGU alīhaya gīkī, ūlū nūng'wītīla ī yenīyo kūlwa lina lyane, ītī kūlenganīla na nzīla jing'we ī jabūbi na shītīle shing'we sha malofu, mukūdeeba gīkī ū nene nalī SEEBA.

⁴⁵Ū mhayo go ng'wa Seeba gūnizīīla,

⁴⁶“Ng'wana wa munhū, galūkaga; ū būshū wako būlole dakama, ūlīlomeele ī lipandī lya dakama ūlīhūgūle; ī lipoolu lya sī ya dakama ūlīhangīle.

⁴⁷Līwīlage ī lipoolu lya dakama gīkī, ‘Gwigwage ū mhayo go ng'wa Seeba. Ū Seeba MULUNGU alīhaya gīkī, Nalī hihī kūkūpemba moto ū bebe, gwīnegeteje pyī ī mitī yako, ī midoto nī myūmu. Ū moto gwa būpī wene gūtī gwa kūjimiwa kwīngīīla dakama kūja sukuma, nīyo gūkūūmabūla būlī ng'wene ū kū būshū.

⁴⁸Pye a banhū bakūbona gīkī nene Seeba hū naagūbakije; gūtūbiza gwa kūjimiwa.’”

⁴⁹A henaho nūhaya, “Ee Seeba MULUNGU! Ūlū balīnihaya bakwiwīlaga gīkī, ‘Ū ng'wenūyū atūhayaga sumo dūhū a hene?’”