Read Sukuma Bible 2015 – Bibilia Ilagano Lya Kale 2015 Ezekia 21 Bible Online

Ezekia 21 - Sukuma Bible 2015 – Bibilia Ilagano Lya Kale 2015 bible

Ezekia 21

¹Ū mhayo go ng'wa SEEBA gūnizīīla,

²“Ng'wana wa munhū, galūkaga ūlogeje Yelusalemu ū būshū wako, ūlīlomeele ī lipandī lyela; wīhangīle ī sī ya Isilaeli.

³Īwīlage, ‘Ū SEEBA alīhaya gīkī, Ū nene nalī na wilwisha ning'we, nakūlūsopoola ū lūshū lwane kūfuma ū mu shilaalo shalo nayagaje bamò bing'we, babize batūngīlīja nūūlū babūbi.

⁴Hūna lūūlū īkī nakūyagaja batūngīlīja na babūbi, ū lūshū lwane lūkūfuma ū mu shilaalo shalo kūlwa kwilwisha na shose īsho shilī na mīlī, kwandīja dakama kūshisha sukuma.

⁵Ū mu gīko pyī ī sha mīlī shikūdeeba gīkī ū nene SEEBA hū naalūsopoolile ū lūshū lwane; na lūtūshoshiwa mu shilaalo shalo hangī.’”

⁶Hūna lūūlū ng'wana wa munhū; līlaga, ūlīle ng'hūngū kū būtongi wabo mu kūgwa ng'holò na būpīna būtaale.

⁷Ūlū būkūbūūja, “Nibūlī ūlīīlīla ng'hūng'hū gīko?” Ūkūbawīla, “Kūlwa nguno ya mhayo ūyo gūlī mu nzīla gwizile. Ūlū gūlashike būlī ng'holò īkwaaba, na būlī nkono gūkūnogoleka, būlī moyo gūkūhwelwa; na būlī izwi līkūyogoma gītī minzī. Gūlī mu nzīla gwizile! Nīyo ū goi gūkūshikīīla ng'hana; alīhaya SEEBA.”

⁸Ū mhayo go ng'wa SEEBA gūnizīīla:

⁹Ng'wana wa munhū, fūnyaga būhangi ūyombe, U Seeba alīhaya gīkī, “Līlūshū līlūshū, līnoolile no, līguusile.”

¹⁰Līnoolile kūlwa kūbūlagīla, līguusile līng'weng'wete gītī lūlabi! Tūyege kūlwa nang'ha gwa ng'witūnja wane Yuda? Ī līlūshū līdalahile būlī nang'ha gwa mbika yenīyo.

¹¹Ī līlūshū lyamalile kūsolanhyiwa līguuswe, līding'we mu nkono; līnoolilwe lyūguuswa, līlindīīlile nkono gwa mūlagi dūhū.

¹²Līlaga ng'wana wa munhū, ūtūle ng'hūngū, nguno līliza kwilwisha nabo a banhū bane; līlī na wilwisha nabo pye a basugi ba Isilaeli. A boi na a banhū bane baamalile kūfunyiwa babūlagwe bo līlūshū. Alilūūlū ipaalage h'itango.

¹³Ū kūgeng'wa ū kwene kwizile kūlī mu nzīla. Ī gīsī īkūja kinehe ū nang'ha gwa Yuda ūlū gūduuma ū kūlyīmīla ī līlūshū īlo līgūdalahile? Alīhaya Seeba MULUNGU.

¹⁴Alilūūlū ng'wana wa munhū, hangaga, ipaalage a makono gako. Ī līlūshū ni lītūlage kabīlī na kadatū, līlūshū lya kūbūlagīla, līlūshū lya būbūlagi būtaale; līliza līkūbakūūbīlīja būlī kwene.

¹⁵A ha mibita yabo pyī ī yose naalītūūlile līlūshū, gīkī ī ng'holò jabo jaabe, nī mibimba īkwīle. Ī lyoi lītūūlilwe ho līyūng'weng'weta gītī lūlabi; līdimilwe mu nkono kūlwa kūbūlaga.

¹⁶Ee, lūshū, sengagūlaga hose hose, ū kū nīīla nū kū lūmoso; būlī kwene ūko būlogejiwa ū būūgī wako.

¹⁷Nū nene nakwikūba ng'hūbi, hūna ū būpelanu bone būkūpola; nene SEEBA nalīhaya chene.

¹⁸Ū mhayo go ng'wa SEEBA gūnizīīla hangī gūlīhaya:

¹⁹Ng'wana wa munhū, tūūlaga meng'ho kūlwa nzīla ibīlī ja kūbītīla ī līlūshū lya ntemi wa Babuloni, ī jose jandīje kū sī īmò. Ooleche na a haho īkūgabanhīkīla ī nzīla kūja ū kū nzengo.

²⁰Wītūūlīle lūmeng'ho ī nzīla ya līlūshū lya kūja kwilwisha na Laba ya Baamoni; nī ya līlūshū lya kūja kwilwisha na Yuda nū nzengo gwa Yelusalemu ūyo gūpīndīlījiwe ndugu.

²¹Nguno ū ntemi wa Babuloni akwīma aho nzīla īgabanhīkīlile, a ha nzīla maakà. Akūshingisha hoi masonga kūnū na kūnū, na kūlola matīma akūlagūlagwa; alīkooba būgunanhwa kū shiikolile sha bamulungu bakwe.

²²Ū nkono gwakwe gwa būlyo gūkūgwīlwa mbale ya kūja kwilwisha na Yelusalemu. Haho na haho gūkūlījiwa ng'wano gwa būlūgū n'ilaka lya higūlya, hanuma akūlagīja gahelwe makambagūlīlo ga nzengo, na ga mibita; kūnū bangī bakūzengaga ng'hambī ja kūgūpīndīlīja, na kūtūlīīla matūūgo ga malongo na kwingīla mo kwandya kūbūlaga banhū.

²³Alīyo a boi abo baalī bang'wilahīlīla bakūbona gīkī ū būhangīlwa bo ntemi wenūbo būlī bo nyalomolomo; kwike ū wei akūbizūkīja ū būbi wabo hūna abajane mu nding'wa.

²⁴Alilūūlū, ū Seeba MULUNGU alīhaya gīkī, A bing'we īkī mukikalaga ng'ūnizūkīja ū būhūbi wing'we kūlwa shītīle shing'we sha būgomi wa hape, nī shibi shing'we īsho mukūsholechaga mu yose īyo mukīyītaga, īkī mukīītaga mihayo īlī gīko mukūsolwa mujanwe mukabize nding'wa.

²⁵Ee, bebe nsugi wa Isilaeli munhū nsoso na wabūbi, bebe ūyo lūshikū lwako lwashikaga, nī likanza lya nsango gwako lyang'waga,

²⁶ū Seeba MULUNGU alīhaya gīkī, Shīnjage ī shikoye ū kū ntwe, wīzuule nī ngikili; yagaalūkaga ī mihayo. A bidoohya bakūgūngūhiwa, alīyo a bikumīlīja bakwichiwa ha sīlīlī.

²⁷Būkenaagūji! Būkenaagūji! Nakūtūūla būkenaagūji ūbo būtaalī kūbizaho, kūshisha ize ūyo igeleelilwe ū būsugi; ū ng'wenūyo hū nakūng'winha.

²⁸Alilūūlū bebe ng'wana wa munhū, hangaga ūhaye: Kūlwa mihayo ya Baamoni nī libengwe lyabo, ū Seeba MULUNGU alīhaya gīkī, “Līlūshū līlūshū, līsopoolile kūlwa kūbūlagīla, līguusile kūlwa kūyagaja; līkūng'weng'wetaga gītī lūlabi!

²⁹Nūūlū īkī bakūbonaga shakoolechiwa sha būlomolomo kūlwa nguno ying'we, na kwīta būchūja bo kūmulembagūla, alīyo a babūbi abo shiigelile babūlagwe, abo lūshikū lwabo lwashikaga; bakūkandīkījiwa līlūshū mu nhingo. Ī likanza lyabo lya kwinhwa nsango lyashikaga a ha būkalīkījo walyo.

³⁰Līshoshage ī līlūshū mu shilaalo shalyo. Nakūng'winhīla nsango kwipandī īlo ng'wabūmbīlwa, ū kū sī ya fumo ying'we.

³¹Nakūng'witīīla būpelanu bone, namuhaahīle moto gwa būdaki bone; nakūmutūūla mu makono ga biboneeji, bamani ba kūkenaagūla.

³²Mukūbiza ng'hwi ja mu moto, a mininga ging'we gakwidīkīla mu sī ying'we; atilonga wa kūng'wizūkwa hangī; nguno ū nene Seeba nahayaga chene.”