Read Sukuma Bible 2015 – Bibilia Ilagano Lya Kale 2015 Ezekia 22 Bible Online

Ezekia 22 - Sukuma Bible 2015 – Bibilia Ilagano Lya Kale 2015 bible

Ezekia 22

¹Ū mhayo go ng'wa SEEBA gūnizīīla gūlīhaya:

²Ng'wana wa munhū, ūmalīīlile ū kūgūlamula ū nzengo gwa babūlagi? Goolekejage lūūlū pyī ī shītīle shago sh'ipelanya.

³Gūwīlage, Ū Seeba MULUNGU alīhaya gīkī, Ee, bebe nzengo ūyo gūtogilwe kwiyenhela lūshilo mu nzīla ya kwita mininga mu gatī yako, na kwisosohaja mu nzīla ya kūbeeja shiikolile sha kūlamiwa,

⁴Ī haha ūlī mu kwihīga kūlwa nguno ya mininga ayo wagiita, na shakūsosohagije ī shiikolile sha kūlamiwa īsho ūkūbeejaga. Ī shikū jako wajishikije ha būkalīkījo, nū būkalīkījo wa myaka yako washikaga. Hūna lūūlū nakūkwīta ūbize līshikolo lya kūdalahwa ū kū mahanga, na shikolo sha kūsekwa mu sī jose.

⁵Abo balī hihī na a babo balī kūle bakūkūseka no bebe nzengo gwa lūkumo lwalūbi, na gookalile wiyuugagūji būtaale.

⁶Manīlaga dūhū a ha gīkī būlī nsugi wa Isilaeli ūyo alī mulī bebe akūbūtūmamīlaga ū būdūla bokwe kūbūlaga banhū.

⁷Ū mulī bebe a basaabo ba banhū na a baninabo badalahilwe no; a balobeji baluhile no ū mulī bebe, abo batī na basaabo na a bachīlwa[15] baluhiwe no.

⁸Ī shikolo shane ī sheela ūshidalahile, nī sabato jane ūkūjisosohajaga.

⁹Ū mulī bebe balīmo banhū basīīgani, abo ng'hūmbū jabo jilolile ha kūbūlaga banhū dūhū; hangī ū mulī bebe balīho abo bakajaga kū ngūlū kūlya sha mu maduku ga kwitongelegeja na kwīta shītīle shisoso.

¹⁰Ū mulī bebe balīho banhū batabūkūgije nūūlū būlīīlī wa basaabo, na bangī bakalaalaga na bakīma nūūlū balī ng'wikanza lyabo lya mininga, ikanza īlo bataalī bakomanyiwe.

¹¹Ū mulī bebe bangī bakīītaga būhūbi w'ipelanya itaale na bake ba bichabo, bangī bakabasosohajaga bīnga babo ndūhū nūūlū minala, na bangī bakapondyaga balūmbū babo, ba kūbyalwa na basaabo gete.

¹²Ū mulī bebe balīho bangī bakahongagwa gīkī babūlage banhū; hama mukasolaga magasa kūfuma kū biching'wi gīkī mupandīke solobo nhaale mu nzīla ya wiboneeji. Alīyo ū kūnizūkwa ū nene yaya; alīhaya Seeba MULUNGU.

¹³Ū nene nakwipaala makono kūlwa faida ja wiboneeji ījo mukūpandīkaga, nū būbūlagi wa banhū ūbo mukūwītaga ū mu bing'we.

¹⁴A bing'we mukwiyūmīlīja gete, nūūlū a makono ging'we gakūbiza na nguzu ū mu lūshikū lwa kūmudīlīla ū nene? Nalīhaya nene SEEBA, na nakūgwīta ū gwenūyū.

¹⁵Nakūmubbalasanya mu mahanga namusambaagīje mu masī, nabūmale ū būsoso wing'we.

¹⁶Ūlū ng'ūsosohala ū mu būtongi bo mahanga, hū mukūdeeba gīkī ū nene nalī SEEBA.

¹⁷Hūna ū mhayo go ng'wa Seeba gūnizīīla:

¹⁸Ng'wana wa munhū, ī numba ya Isilaeli yabizile būsoso ū kūlī nene; pye a bose balī gītī shaba, mabbaadi, chūma na lisaasī ng'wisulīlo. Batikīlile na būsoso bo kūfuma mu feza.

¹⁹Hūna lūūlū ūyo alīgūhaya SEEBA gūūyū, “Īkī pye a bose mulī būsoso ī haha, nakūmubilingīla mu nzengo gwa Yelusalemu.

²⁰Ūmo banhū bakabilingīlaga feza, shaba, chūma, lisaasī ng'wisulīlo kūshaabya mu lūhiiza lwa moto nkalī, h'ūmo nū nene nakūmubilingīla ū mu nzengo gwa Yelusalemu kūlwa būpelanu na būdaki bone namutūūle ū mu gatī ya nzengo nang'waabye.

²¹Nakūmubilingīla ū mu nzengo namubugutīīle moi moto gwa būpelanu bone ng'waabe.

²²Ūmo feza jikaabījiagwa ng'wisulīlo, na a bing'we mukwaabiwa ū mu gatī ya nzengo, hūna mukūdeeba gīkī ū nene Seeba nang'witīīlaga ū būpelanu bone.”

²³Ū mhayo go ng'wa SEEBA gūnizīīla hangī gūlīhaya:

²⁴Ng'wana wa munhū, īwīlage ī sī: Ū bebe ūlī sī īyo ītī napandīka mbula nūūlū iswalala mu lūshikū lwa būpelanu.

²⁵Īlīho gwīnda yabūbi ū mu bahangi[16] baamo; batikīlile na shimba īkūhīītaga kūnū īlītandagūla mimba gwa shihwīng'wa shaayo; bakababūlagaga a banhū, bakabataajaga sabo jabo na shikolo sha mpango na kwenheleja bakīma bingī bachīlwe bagoshi babo.

²⁶A bagabīji baamo bakashikenaagūlaga ī shilagīlo shane na kūshisosohaja ī shikolo shane sheela; batalekanyaga a ha gatī ya shikolo sheela nī sha katūmamīle ka būlī lūshikū. Bakalangaga gīkī ī shikolo ī sheela nī shisho shitī sheela shitikīlile dūhū; bakagalilimyaga a miso gabo ū kū mhayo gwa kūjilang'hana ī sabato jane, nose nakasosohajiagwa ū mubo.

²⁷A basugi abo balī ū mu gatī ya nzengo batikīlile na mhūūge ījo jikatandagūlaga īsho jikadimaga, na kwiita mininga bakūkenaagūlaga būpanga wa banhū bapandīke nīīlo mu nzīla ja būnyeecha.

²⁸A bahangi babo bakababilīlaga swakala ī mihayo yenīyī mu nzīla ya shakoolechiwa sha būlomolomo, na būchūja bo kūlembagūla. Bakahayaga, Ū Seeba MULUNGU alīhaya gīkī, nūūlū atahayile mhayo ū SEEBA.

²⁹A banhū ba mu sī yenīyī bakatūmamīlaga wiboneeji na wibi, na kūbakandīkīja a bahabī na a bagayiwa; na kūbaluhya a balobeji, na atīho wa kūbīītīla ī ng'hana.

³⁰Nakakooba mhunhū ū mubo, ūyo iigeleelilwe kwīzenga ī ndugu na kwīmīīla kū būtongi bone a ha gatī ya lyoma kūlwa nguno yayo ī sī, gīkī natizīkenaagūla; alīyo natapandīkile.

³¹Alilūūlū nakūbitīīla būpelanu bone, nabayagaje na moto gwa būkalī bone; nakūbabalīla pyī īyo bīyīta, alīhaya Seeba MULUNGU.