Read Sukuma Bible 2015 – Bibilia Ilagano Lya Kale 2015 Ezekia 23 Bible Online

Ezekia 23 - Sukuma Bible 2015 – Bibilia Ilagano Lya Kale 2015 bible

Ezekia 23

²Ng'wana wa munhū, baalīho bakīma babīlī, ba kūfuma mu nda īmò;

³bakaja Misili būūkabiza bamalahya, bifunya kū wīīmīlīzu kwandīja shikū ja ha būdo wabo. Ū mu sī yenīyo ī ndutu jabo jūyikala jikūdimagūlagwa, ī mbeele ja ha būnya wabo jūyūbbaabbaashiwa sagala.

⁴Ū ntaale witanagwa Ohola, ū nzunaye Oholiba. A benabo baalī bane, nīyo baalī baanibyalīla na baana bagosha na bakīma. Ū Ohola ng'wene Samalia, ū Oholiba Yelusalemu.

⁵Ū Ohola aho alandya ū būmalahya walī ataalī wane; ūyikala wabikūmbagwa bashihya bakwe, bana Ashulu.

⁶Baalī bashilikale, ba shizwalo sha langi ya būlulu, basugi ba sī na (makalwe) bataale ba mabità ga būlūgū; pye baalī basūmba banyalaali, badamhīji ba falasa.

⁷Akifunya būmalahya ū kū Baashulu pye a bose a bakūjiwa, ūyisosohaja mu nzīla ya shiikolile sha kūlamiwa sha ng'wa ose ose ūyo ūng'wikūmvwa.

⁸Ū būmalahya ūbo olī owandya Misili atalekanile nabo, ūbo owītaga mu shikū ja ha būdo bokwe, mu shikū jene bagosha balaalaga nang'hwe; nī mbeele ja ha būnya bokwe būyūjibbaabbaasha, kūnū bakūnsosohajaga na būsoso bo kwikūmvwa kwabo.

⁹Nakaneka mu makono ga bashihya bakwe, a Baashulu abo walī abikūmbilwe.

¹⁰Būnzuuja ī shizwalo būneka alī dūūhū, na a baana bakwe bagosha na bakīma, būng'wīngīja; bīīta būmūlaga ū wei bo līlūshū. Akagūpandīka ū nsango gwakwe ūbiza lūsumo ū mu bakīma.

¹¹Ū ng'wanong'wawe ū Oholiba akībona ī yenīyī, alīyo kūlwa kwikūmvwa kwa būmalahya bokwe, ū wei h'akabiza na soso nhaale no kūtinda ū nkūlūye.

¹²Nū wei ūbikūmvwa a Baashulu, a basugi ba sī na a bataale ba mabità ga būlūgū, baalī bashilikale mu shizwalo shabo sha būlūgū; pye basūmba banyalaali, badamhīji ba falasa.

¹³Nakabona gīkī nang'hwe wasosohala; bose būbīlī wabo būbiza badima nzīla īmò.

¹⁴Kwike ū wei akongeja no ū mu būmalahya bokwe, nguno akabona sanamu ja banhū joolilwe ha ndugu; Bakalidayo balī mu shizwalo shaza

¹⁵na mishipi ū mu mikīmbīlī, na shikoye sha būlenji ū kū mitwe yabo. Pye a bose baabonekanaga gītī bashilikale ba magogoteni ga būlūgū ga bana Babuloni, bajigajiga ba sī ya Būkalidayo.

¹⁶Aho wajibona ī sanamu jenījo ūbikūmvwa a Bakalidayo, ūtūma nhūng'wa ū kū sī yabo.

¹⁷Hūna a bana Babuloni benabo biza ng'hana, būlaala nang'hwe mu būlīīlī, būnsosohaja na būsoso wa kwikūmvwa kwabo. Aho bansosohaja gīko kwimanīla ogalūka, ūbabbyeda ūbaleka obakolagwa.

¹⁸Aho akwītaga ī mihayo yakwe ya būmalahya mu būbi būtaale hape hape, nakambyeda no nūgalūka nūneka kūlwa kūnkolwa, gīt'ūmò nakagalūkīla nūneka dūhū nū nkūlūye.

¹⁹Kwike akongeja ū mu būmalahya wakwe, nguno akajiizūkwa ī shikū ja ha būdo bokwe, a makanza gene alī mu sī ya Misili akūkoolanaga na mihayo ya būmalahya.

²⁰Nīyo aho alī kwenūko walī abikūmbilwe no a bagosha abo washihyaga nabo, abo mīlī gwabo gwa nyagosha gwalī gūtikīlile na gwa nzobe, īsho shabafumaga shalī gītī sha falasa.

²¹H'ūmo ūkalūkūmbūlīla ū lūhya lwako lwa ha būdo, aho mbeele jako jiikalaga jikūbbaabbaashiagwa, nī ndutu jako jiikalaga jikūdimagūlagwa aho jitaalī ndo.

²²Alilūūlū bebe Oholiba, Ū SEEBA MULUNGU alīhaya gīkī, Abo washihyaga nabo, abo ūkababbyeda ūgalūka ūbaleka obakolwa, nakūbasamīlīja bakūsange kūfuma mhandī jose.

²³Bakwiza banhū ba kūfuma Babuloni, na a Bakalidayo pye a bose; bagosha ba sī ja Pekoda, Shoa, na Koa. A Baashulu nabo bakūbiza hamò nabo pye a bose; basūmba banyalaali, pye basugi ba sī na bataale ba mabità ga būlūgū, bataale ba magogoteni ga būlūgū, na bakūjiwa mu mabità ga bashilikale; pye bakwiza badamhīlile falasa.

²⁴Bakūkūsanga bal'ibità itaale lya banhū bingī na magogoteni ga būlūgū, na ga kūbūūkīja miligo. Bakūshika bīme ng'hīga ng'hīga bakūnyame būlī kwene, bakwiza babūkije shilanga shabo na mūda nhaale na ndo, bazwalile mahima ga chūma. Nakūkūtūūla mu makono gabo bakwinhe nsango gwa kūlenganīla na kalamulīle kabo.

²⁵Ū būpelanu bone nakūbūlogeja kūlī bebe, nīyo bakūkwītīla ī mihayo mu būkalī būtaale no. Bakūyūgatīna a mūūlū na a matū ga banhū bako; hama abo balasaage bakūshilīla mu būlūgū. A baana bako a bagosha na a bakīma bakūbasola; a bangī abo balasaage bakūkenaagūlwa bo moto.

²⁶Nī shizwalo shako bakūkūzuuja bashijane, nū būlenji wako pyī ū bose.

²⁷Ū mu gīko nakūlūmala ū lūhya lwako nū būmalahya wako ūbo ūkiza nabo kūfuma Misili. Hūna ūtūshiikūmvwa hangī ī shikolo shenīshi, nūūlū ī Misisli ūtūkūmbūla koi hangī.

²⁸Nguno ū Seeba MULUNGU alīhaya gīkī, Nalī hihī kūkūtūūla mu makono ga banhū abo batakūtogilwe, abo ūkababbyeda ūgalūka ūbaleka obakolagwa.

²⁹Bakūkwītīla mu kūkūkolwa kūtaale, na bakūkwīngīja pyī ī shikolo shako īsho washinoga nogela. Bakūkūleka ūlī dūūhū, nīyo ūlī makono dalali, ī minala ya būmalahya wako yitendaga hape. Ū lūhya lwako nū būmalahya wako

³⁰h'īsho shakwenhelegije mihayo īlī gīko; nguno ya kūgikūmvwa mahanga, na kwisosohaja bebe kūlwa shiikolile shaago sha kūlamiwa.

³¹Īkī wasolile nzīla ya nkūlūyo, nū nene nakūkūtūūlīla mu nkono gwako ī shikombe shakwe.

³²Ū Seeba MULUNGU alīhaya gīkī, “Ūkūshing'wa ī shikombe sha nkūlūyo, Ī shoi shilī shikombe shishimu hangī shitaale; shikūkwenhela būdalahwa na kūsekwa, nguno shokalile pa.

³³Ūkūbimbeelwa shikoji na būpīna, shilī shikombe sha mayanga na būbi, shikombe sha nkūlūyo Samalia.

³⁴Ūkūshikwelela shūūme kūlū, hama ūshitaalīke hasī shibelagūke, hūna wandye kwidatagūla ī mbeele jako, kūshisha jitandagūke. Nene nayombaga.” Alīhaya Seeba MULUNGU.

³⁵Alilūūlū ū Seeba MULUNGU alīhaya gīkī, Īkī ū nene wanīība ūniponya kū numa yako, ūkūgūbūūcha ū nsango gwa lūhya na būmalahya wako.

³⁶Ū SEEBA ūniwīla gīkī, “Ng'wana wa munhū, ūmalīīlile ū kūnamula ū Ohola nū Oholiba? Boolekejage pyī ī shītīle shabo sh'ipelanya.

³⁷Nguno bashihani a benabo, na a makono gabo gadabbalanhile mininga; bakashihyaga na mashiikolile gabo ga kūlamiwa. Nīyo na a baana babo abo baanibyalīla nene bakabafunyaga shitambò sha kūgalyisha.

³⁸A higūlya ya yenīyo ū nene ng'wenekīlī baanīītīla īyī: Ī lipandī lyane lyeela baalīsosohaja, nī sabato jane būjisosohaja ng'wikanza līmò lyenīlo dūhū.

³⁹Ū mu lūshikū lwene baababafunyaga shitambò baana babo kū mashiikolile gabo ga kūlamiwa, bakingīla ū ng'wipandī lyane lyeela būūkalīsosohaja; h'ūmo bakīītīla ū mu numba yane.”

⁴⁰Nīyo bakatūma na nhūng'wa kū bagosha ba kūle gīkī bize; aho biza, ū bebe ūkooga kūlwa nguno yabo, wibila na wanja kū miso, witūūlīla na būlenji wako.

⁴¹Hūna wigasha h'isumbī ly'ikūjo, na meza īgolanije a ha būtongi walyo; ūtūūla ho būbbani na maguta, ī shose shenīsho shane.

⁴²Hama walī apīndiwe yoge ya banhū baayombagīlaga mihayo ītī y'ikūjo; baalī benhwa na Basabena kūfuma kū sī y'itogolo. Na bagosha bangī ba sagala baalī basolelejiwa benhwa; būyūnzwalīkīja bangili mu nkono ū nkīma ng'wenūyo nū ng'wanong'wawe, nū kū mitwe yabo mahima masoga.

⁴³Niwīla nakūng'hayaga ūyo walī wagoobbeejiwa būmalahya: A benaba bakūlaala nang'hwe nū ng'wenūyū ūmo alī ng'wenūmu?

⁴⁴Ng'hana būlaala nang'hwe ūmo jilī nhūngwa ja bamalahya; h'ūmo bakaīla nū kū ba Ohola na Oholiba, a bakīma a bīmīlīzu benabo.

⁴⁵Alīyo a banhū a batūngīlīja bakūbabalīla nsango ūyo gūbigeleelilwe bakīma bashihani na babūlagi ba banhū, nguno ng'hana bashihani, na a makono gabo gadabbalanhile mininga.

⁴⁶Ū Seeba MULUNGU alīhaya gīkī, Benhelagi ibità lya banhū liize kūbadetemya lībataaje nī shikolo shabo.

⁴⁷Ī lībità lyenīlo līkūyūbatūla mawe na kūbamala bo shū, na kūbabūlaga a baana babo bagosha na bakīma, nī numba jabo lījitiime moto.

⁴⁸Ū mu gīko nakūlūmala ū lūhya ū mu sī; pye a bakīma bakwilanga, batizīta ūmo mukwītīlaga a bing'we.

⁴⁹Nīyo ū lūhya lwing'we lūkūng'wenhela makoye no, mukūgūbūūcha ū nsango ūyo gūlamugwīle kūlwa shibi shing'we sha kūlamya shiikolile. Hūna mukūdeeba gīkī ū nene nalī Seeba MULUNGU.