Read Sukuma Bible 2015 – Bibilia Ilagano Lya Kale 2015 Ezekia 24 Bible Online

Ezekia 24 - Sukuma Bible 2015 – Bibilia Ilagano Lya Kale 2015 bible

Ezekia 24

¹Mu lūshikū lw'ikūmi ng'weji gw'ikūmi, ng'waka gwa kenda, mhayo go ng'wa SEEBA gūkanizīīla gūlīhaya,

²“Ng'wana wa munhū, lwandīkage ū lūshikū lwenūlū, wītūūle mu kwihela ī talehe yenīyī; nguno ī lelo yenīyī ū ntemi wa Babuloni wandyaga kūgūpīndya mabità ū nzengo gwa Yelusalemu.”

³A banhū ba numba ya būshitiigwa benaba yombaga nabo mu lūsumo ūbawīle, u Seeba MULUNGU alīhaya gīkī, “Lītūūlage ha mahiga ī lisabiga, lītūūlage hoi ūsaamīje mo na minzī.

⁴Gadītīlage mo a mapingili ga nyama; ūsolanhya a masoga masoga, gītī gūlūmbū na nkono. Tūūlaga na a maguha a masoga, lyokajage.

⁵Ū ng'widaale ūsolanhya ī ng'īnu. Sooselaga ng'hwi ningī ū mu moto gwa kūgazugīla a ma guha; gūkūbīkīīlage ū moto gapogome a maguha gatogoteele.”

⁶Nguno ū Seeba MULUNGU alīhaya: Gūlī mu kwihīga ū nzengo gwa babūlagi, ī līsabiga īlo līlī na lūgogà mu gatī, Īlo lītamalaga būsoso! Jizubūlagi mo, a mapingili ng'ūjīnja būlī lyene līmò līmò; yaya ū kūsolanhya.

⁷Nguno a mininga ga banhū abo wababūlaga gataalī galīmo ū mulī we. Akagiita h'itale, atagiitile hasī aho nigafukīīlwa lūbūūbū.

⁸Kūlwa kūbūsamīlīja ū būpelanu, a mininga ayo wagiita naagiita h'itale gatizūfukīīlwa.

⁹Hūna lūūlū ū Seeba MULUNGU alīhaya gīkī, “Gūlī mu kwihīga ū nzengo gwa babūlagi!” Nū nene nakūsoosela mo ng'hwi ningī.

¹⁰Alilūūlū ongejaga ū kūtūūla ī ng'hwi, gūsooselage ū moto gūligime; ī nyama jizugage jipye jinogele, nī shisanjo tūūlaga mo; a maguha gajige.

¹¹Hanuma ya henaho ī sabiga Īlekage ha moto īlī dalali, īsebe kūshisha yalalūke za, waabe ū būsoso; lūlīmo na lūgogà nalo lūjige.

¹²Ū nīmo gwenūyū itabanya bamani; ū lūgogà lwaamo lūdaamīīlile no, lūlemile gete ū kwīnga nūūlū bo moto.

¹³Ū lūhya hū būsoso wako; hūna lūūlū īkī naagemile no ū kūkweja, alīyo ūlemile ū kwejiwa ū būsoso wako, ūtaleela hangī, kūshisha ū būpelanu bone ū kūlī bebe būpole.

¹⁴Ū nene SEEBA nalīhaya gīkī, Ī haha lūūlū ī likanza lyane lya kwīta lyashikaga, natilemeja hangī; natūsaatwa, nūūlū natūlekeja; ū bebe ūkwinhwa nsango kūlenganīla nī nhūngwa jako nī shītīle shako; alīhaya Seeba MULUNGU.

¹⁵Ū mhayo go ng'wa SEEBA gūnizīīla hangī:

¹⁶Ng'wana wa munhū, nalīhaya nakwīngīje īsho shikayejaga miso gako kūkīla shose; nakūtūla kamò dūhū. Kwike ūtizūtūla ng'hūngū, nūūlū kūlīla, yaya nūūlū kwita shisoji.

¹⁷Pīnīhalaga, alīyo ūtizūnīla ū mfu; ī shikooye shako ūkwikala nasho ū kū ntwe, nī shilatū ū kū mhambala jako. Yaya nūūlū kwikundīkīja ū nomo gwako; nī shilīwa sha ha waalami kūlwa nguno yakwe ūtizūshilya.

¹⁸Hūna lūūlū a makanza ga dilū nūhooya nabo a banhū, mu mhīndī ūcha ū nke wane. Ntondo yaho ī dilū nīta gīt'ūmò naalī naalagīīlīlwa.

¹⁹A banhū būnibūūja: Bebe, ūtūdūla ū kūtūwīla ī mihayo īyo ūkwītaga yenīyī īlī na makūlū kī ū kū bise?

²⁰Nane nūbawīla, “Mhayo go ng'wa Seeba gwalī gwanizīīlile gūlīhaya:

²¹Īwīlage ī numba ya Isilaeli, u Seeba MULUNGU alīhaya gīkī, ‘Nalī hihī kūlīsosohaja ī lipandī lyane lyela, īlo mulīgīmbile gīkī ipilinga ling'we lya kūpīlīla, hangī mukikumīlīgījaga, na a miso ging'we galīyegelile, īlo mulītogilwe no no no. A baana bing'we bagosha na bakīma abo ng'wabaleka kū numa bakūmalwa būlūgū.

²²Ning'we mukwīta gīt'ūmo nalīītīla ū nene; yaya ū kwikundīkīja ī milomo ying'we; nī shilīwa sha ha waalami kūlwa nguno yabo mutizūshilya.

²³Ī shikooye shing'we mukwikala nasho ū kū mitwe, nī shilatū ū kū mhambala jing'we. Yaya ū kūtūla ng'hūngū nūūlū kūlīla, alīyo mukūganda no kūlwa nguno ya shibi shing'we, na kwilīla bing'we benekīlī.

²⁴Ū Ezekia akūbiza būmanīkījo ū kū bing'we; mukwīta ūmo wītīlaga ū wei. Ū gwenūyū ūlū gūshikīīla hū mukūdeeba gīkī ū nene nalī Seeba MULUNGU.’”

²⁵Hūna lūūlū ū bebe ng'wana wa munhū, ū mu lūshikū lwa kūbīngīja ī lipandī īlo balīgīmbile gīkī ipilinga lyabo lya kūpīlīla, īlo balītogilwe, na līkabinhaga shingilima, na a miso gabo galīyegelile, na līlī ha ng'holò jabo; nūbīngīja na a baana babo bagosha na bakīma,

²⁶ū mu lūshikū lwenūlo akwiza munhū wapūlūgūkaga, ize kūkūwīla mihayo.

²⁷Ī likanza lyenīlo ū nomo gwako gūkūtungūlīlwa; ūkūlūngalūnga nang'hwe, ūtikala njomba hangī yaya. Hūna lūūlū ūkūbiza būlolelo ū kūbo, nabo bakūdeeba gīkī ū nene nalī SEEBA.