Read Sukuma Bible 2015 – Bibilia Ilagano Lya Kale 2015 Ezekia 25 Bible Online

Ezekia 25 - Sukuma Bible 2015 – Bibilia Ilagano Lya Kale 2015 bible

Ezekia 25

¹Ū mhayo go ng'wa SEEBA gūnizīīla gūlīhaya:

²Ng'wana wa munhū, galūkaga ūlogeje ū būshū wako kū sī ya Baamoni ūbahangīle.

³Bawīlage gīkī, “Gwigwagi ū mhayo go ng'wa Seeba MULUNGU.” Ū Seeba MULUNGU alīhaya, Īkī a banhū bane mukabawīla, “Būlī ng'wabona!” Aho lyasosohajiwa ī lipandī lyane, na a haho yakenaagūlwa ī sī ya Isilaeli na kūlekwa īlī buyīkī, na a banhū ba Yuda aho baatwalagwa mu būsaamiwa,

⁴managi lūūlū gīkī nakūmutūūla mu makono ga banhū ba kīya, mubize sabo yabo. Bakūtūūla ng'hambī jabo ū mu bing'we, bakome na mahema gabo; bakūgalya a matwajo ga mitī ying'we na a mabeelè ga mitugo jing'we būgang'wa.

⁵Ū nzengo gwa Laba nakūgūgalūcha gūbize madīīmīlo ga ngamīla, nī mizengo ya Baamoni īkūbiza matūūgījo ga ng'holo. Hūna mukūdeeba gīkī ū nene nalī SEEBA.

⁶Nguno ū Seeba MULUNGU alīhaya gīkī, A bing'we īkī mukatūla ng'hūbi, muyūtūla na hasī bo mhambala jing'we ng'walīja mitindo, mukūyegaga na kayegele kose nguno ya būbi ūbo ng'wīyiganikīlaga sī ya Isilaeli mu ng'holò jing'we,

⁷hūna lūūlū ū nene nakūgūgoloola ū nkono gwane kwilwisha ning'we, namufunye mubize nding'wa kū mahanga. Nakūmukenaagūla ng'wīnge gete ū mu mahanga, namuyagaje mushile gete ū mu masī. Nakūmukenaagūla, hū mukwitegeleja gīkī ū nene nalī SEEBA.

⁸Ū Seeba MULUNGU alīhaya, Nguno a bana Moabu na a bana Seili bakahaya gīkī, Lolagi, ī numba ya ng'wa Yuda ī haha ītikīlile na a mahanga a gangī.

⁹Nakūlūfunūla ū lūbazu lwa Moabu; nīyīnje ī mizengo ya kū lūbīmbī, kwandīja Bet-Yeshimoti, Baali-Meoni, Kiliataimu, īyo īl'ikūjo lya sī yenīyo.

¹⁰Ī Moabu hamò nī Amoni nakūbinha banhū ba kīya, ībize sabo yabo, a Baamoni batizizūkīlwa hangī ū mu mahanga;

¹¹Ī Moabu nakwīgwisīja nsango. Hūna bakūnideeba gīkī nalī SEEBA.

¹²Ū Seeba MULUNGU alīhaya gīkī, “Īkī a bana Edomu bakīmalīla shiilī ī numba ya Yuda, hūna ū mu kwīta gīko būbiza bingīla mu kwihīga kūtaale,

¹³alilūūlū Ū Seeba MULUNGU alīhaya gīkī, Nakūgūgoloola ū nkono gwane kwilwisha nī sī ya Edomu nababūlage a banhū baamo nī mitugo jabo. Nakwīyīta ībize buyīkī, bakūbūlagwa būlūgū kwandīja Temani kūshisha Dedani.

¹⁴Ī Edomuu nakwīmalīla shiilī mu nguzu ja nkono gwa banhū bane a Baisilseli, ī Edomuu bakwīyītīla kūlenganīla nū būdaki bone nū būpelanu bone; a henaho bakwīyitegeleja ī shiilī yane; alīhaya Seeba MULUNGU.”

¹⁵Ū Seeba MULUNGU alīhaya gīkī, “Īkī a Bafilisiti bakīīta mu nzīla ya kūmala shiilī, na ng'hana būmala shiilī mu kūlondeela būbi ūbo baalī nabo mu ng'holò jabo, nguno baalī na ng'hūmbū ja kwīkenaagūla ī Yuda kūlwa wanishi bo kale,

¹⁶hūna lūūlū ū Seeba MULUNGU alīhaya gīkī, ‘Nalī hihī kūgūgoloola ū nkono gwane kwilwisha na a Bafilisiti. Nakūbamala a Bakeleti, abo balasaagīīle kū sī ja mbalama ya nyanza nabakenaagūle.

¹⁷Nakūbamalīla shiilī mu būkalī būtaale nabagwisīja nsango mu būpelanu bone. Ūlū nūbamalīla shiilī hū bakūdeeba gīkī nalī Seeba.’”