Read Sukuma Bible 2015 – Bibilia Ilagano Lya Kale 2015 Ezekia 26 Bible Online

Ezekia 26 - Sukuma Bible 2015 – Bibilia Ilagano Lya Kale 2015 bible

Ezekia 26

¹Mu lūshikū lwa kwandya lwa ng'weji, ng'waka gwikūmi na gūmò, mhayo go ng'wa SEEBA gūkanizīīla gūlīhaya:

²Ng'wana wa munhū, īkī ū Tulo akīyanīīla ī Yelusalemu alīhaya: Būlī ng'wabona! Ū mita gwa mahanga gwabīnzagūka, yanilugūkīla ī milyango yaago, nīyo ī haha īkī gwabiza misaka, nakūsaba no,

³alilūūlū ū mhayo ūyo alīgūhaya ū Seeba MULUNGU gūūyū: Nalī na wilwisha nang'ho ū bebe Tulo, nakūkwenhela mahanga mingī gītī nyanza ūmo īkaponejaga mahuuli gayo, gakwiza gakūdumīle.

⁴Gakūjikenaagūla ī ndugu ja Tulo, nī ng'hambi ja bashilikale baamo gajikambagūle; ū nene nakūpyagūla būlī shikolo shishile, heele gītī ha lūbūūga.

⁵Hakūbiza gītī ha wanikīlīlo bo mitego ya ndīlo kūfuma mu nyanza; nguno nene naayombaga, alīhaya Seeba MULUNGU. Ī Tulo īkūbiza nding'wa kū mahanga.

⁶Nī ng'hambī jakwe ījo jihelile kū sī nūūmu jikūkambagūlwa būlūgū. Hūna bakūdeeba gīkī nalī SEEBA.

⁷Nguno ū Seeba MULUNGU alīhaya gīkī, Nakūng'wenha Nabukadineza ntemi wa Babuloni, ntemi wa batemi, ize kwīdumīla ī Tulo; akwiza kūfuma sukuma alī na falasa na magogoteni ga būlūgū na badamhīji ba falasa, n'ibità lya bashilikale itaale no.

⁸Ī mizengo yako ī ya kū sī nūūmu akwīkenaagūla bo līlūshū; nguno akūtūūla ng'hambī ja kūkūpīndīlīja, na akūtūlīīla itūūgo lya malongo lya kūlinhīla ū kū ndugu jako, hūna adiime mūda jakwe kūlwa kūkūdumīla.

⁹Ī ndugu jako akūyūjitūlīīla na makambagūlīlo gakwe, hūna ī ng'hambī jako ja bashilikale akūjikambagūla na shilanga shakwe.

¹⁰Akwingīla a ha mibita yako gītī munhū akwingīlaga mu nzengo ūyo gwamalaga kūkambagūlwa. Ī falasa jakwe jikūbiza ningī no, ū lūbuubu lwajo lūkūkūfukīīla; ī ndugu jako jikūtingina kūlwa yoge ya falasa ja būlūgū, na a magogoteni ga būlūgū na a ga miligo.

¹¹Ī chūūga sha falasa jakwe jikūgapandagīla pye a mapanda gako; a banhū bako akūbabūlaga bo līlūshū, nī ng'hīngī jako ja bashilikale ba nguzu jikūgwa hasī.

¹²Bakūjisola ī sabo jako, nī shikolo shako sha byashala bakūshijana; ī ndugu jako bakūjikambagūla, nī numba jako ī jawiza bajisambaagūle, hama a mawe gako nī mitī na a makambagūkīle a gangī bakūgaponangīja mu nyanza.

¹³Ī yoge ya mīmbo gako na a malaka ga malimba jako nakūshimala, shitizigwiwa hangī na kamò.

¹⁴Nakūkwīta ūbize itale lītī na shose shose, ūbize ipandī lya kwanikīlīla mitego ya ndīlo; ūtalazengwa hangī na hado yaya nguno ū nene SEEBA nayombaga, Seeba MULUNGU alīhaya.

¹⁵Ū Seeba MULUNGU alīhaya gīkī, “Ī sī ja kū mbalama ya nyanza jitūdetema ūlū jūshiigwa ī shiligityo sha kūgwa kwako, nū kūgang'hīla kwa banhū abo bakūgulajiagwa, nū būbūlagi ūbo būkwītagwa ū mulī bebe?”

¹⁶Ī likanza lyenīlo pye a basugi ba sī ja mbalama ya nyanza bakūgalekela a masumbī gabo ga būtemi, nī ng'hanjo jabo ja makūjo bakūjitūūla, nī shizwalo shabo īsho shisumilwe na būlenji bakūshizuula. Bakwifadīka hasī bakūdetemaga bogohaga ilalī, kūlwa nguno ya mihayo īyo yakūgwīlaga.

¹⁷Hanuma bakūkūlīla balīhaya: Bebe nzengo nkumūku wakenaagūka būlī; banhū ba mu nyanza baalikalaga mulī bebe. Ū bebe na a banhū bako walī na būdūla ū mu mihayo ya mu nyanza; lyogohya lyako lyalī lībikalīlile pye abo bakikalaga kwenūko

¹⁸Ī haha ī sī ja kū mbalama ya nyanza jilīdetema ū mu lūshikū lwa kūgwa kwako; alichene, a majinga ga mu nyanza gaazwanganile kūlwa kūshila kwako.

¹⁹Ū Seeba MULUNGU alīhaya gīkī, “Ūlū lyūshika ī likanza lya kūkwīta ūbize nzengo gūtī na shose shose, gīt'ūmo īlī ī mizengo īyo yagayiwa bikaji, hūna nūwenha higūlya yako ū būjiba bo nyanza, a minzī gayo gūūkwihoolekela na nguzu jago gūkūkundīkīja,

²⁰nakūkwicha hasī, ūkisangīje nabo abo balī ng'wichongo; kū banhū ba kale. Nakūkwīta ūbize ng'wikaji wa mu gatī ya sī kū bafu, gītī mu misaka yalekwa kale; ūkikale nabo abo baaja hasī ng'wichongo. Ūtalashoka hangī, nūūlū ūtalalīshokela hangī ī lisumbī lyako ū mu sī ya bapanga.

²¹Nakūkwenhela ng'halīlo mbi no, hama ūtalabiza ho hangī; bakūkūkooba alīyo batūkūpandīka nūūlū hado; alīhaya Seeba MULUNGU.”