Read Sukuma Bible 2015 – Bibilia Ilagano Lya Kale 2015 Ezekia 27 Bible Online

Ezekia 27 - Sukuma Bible 2015 – Bibilia Ilagano Lya Kale 2015 bible

Ezekia 27

¹Ū mhayo go ng'wa SEEBA gūnizīīla gūlīhaya:

²Ng'wana wa munhū, tūlaga ng'hūngū kūlwa Tulo.

³Gūwīlage ū nzengo gwa Tulo ūyo gūlī mu nzīla ya kūja kū nyanza, ū gwa byashala kū banhū ba mu sī ningī ja kū mbalama ya nyanza, Ū Seeba MULUNGU alīhaya: Ū bebe Tulo ūkwikumīlījaga gīkī, “Nalī nsoga no natī na shilingo.

⁴Ū wikalo wako būlī ha gatī ya nyanza, a bazengi bako baabūshikanya ū būsoga wako.

⁵Pyī ī migamba yako ībeegije kūfuma mu mizule ya Senili; bakasola nkoola kwīngīīla Lebanoni būbeeja nongooti gwitanga lyako.

⁶Ī ngahi jako bakajibeeja ja mitūndū ya kūfuma Bashani; ī shidako shako būshibeeja sha mbawa ja mibanga ya kwīngīīla kū mbalama ya nyanza ya Kupulo, hūna būtūūla mo na būlenji bo mapembe ga mhūlī.

⁷Ī litanga lyako lyalī lībeegije lya kitaani īdosilwe chiza, ya kūfuma Misili; nīyo hangī lyatūmamaga gītī lūbembeela. A mapazia gako gaalī ga būlūba wa būlulu na wa nzulunge, ga kūfuma sī ya Elisha kū mbalama ya nyanza.

⁸A babugi ba ngahi jako baalī bana Sidoni na Alivadi; Ee Tulo, a batongeeji bajo baalī ba kūfuma mu banhū bako ba masala.

⁹Banamhala ba kūfuma Gebali baalī bamò ba bakoolī, bajibeejaga ī meeli jako ūlū jabiipa. Pyī ī meeli ja mu nyanza jizaga na a batūmami baajo, jizaga kū byashala ya kūkaaba ī shikolo shako.”

¹⁰Ū ng'wibità lya bashilikale bako baalīmo na ba kūfuma Būajemi, Luda na Libya. Ī mūda jabo na a mahima ga chūma babīkaga mu ng'hambī ja bashilikale bako. A benabo h'abo bakwenhelaga ikūjo.

¹¹Bashilikale ba Alivadi na Heleki baalī balang'hani ba ndugu jako pye a hose, ū mu ng'hambī jako ja bashilikale baalīmo bagosha ba kūfuma Gamadi, banungelejaga ī mūda jabo ha ndugu jako; ū būsoga wako h'abo bawīta būbeele jigi būmale shilingo.

¹²Ī Talishishi yītaga byashala nang'ho kūlwa nguno ya būsabi būtaale wa shikolo īsho walī nasho; ū mu kwisūlūgīja nang'ho yakaabaga shikolo gītī feza, chūma, mabbaadi, na lisaasī.

¹³Bayunani na bana Tubali, na Mesheki nabo bīītaga nang'ho ī byashala; baakaabaga ī sabo jako, ū bebe wasola basese na shikolo sha shaba.

¹⁴A bana Bet-togama a bene wakaabaga nabo ī sabo jako, ū bebe wasola falasa ja milīmo na ja būlūgū, na nzobe nhaale.[17]

¹⁵Bana Dedani nabo wītaga byashala nabo, na banhū bingī ba sī ja mbalama ya nyanza baalī bigūlīji bako; ū bebe baakwinhaga mapembe ga mhūlī na mitī ya gembe.

¹⁶Nī Alaamu wisūlūgījaga nayo kūlwa nguno ū bebe walī na shikolo shingī; wakaabaga nabo ī shikolo shako baakūlekela takwiyo, būlūba wa langi ya nzulunge, myenda īsumilwe chiza, kitaani yawiza, na mawe ga mpango ga mu nyanza.

¹⁷Nī Yuda nī Isilaeli najo jītaga nang'ho ī byashala; ng'wikaabīlaga jasola shikolo ū kūlī bebe; nang'ho wapandīka ngano, zeituni, mitini, būūkī, maguta, na maguta ga būgota.

¹⁸Nī Damasiko yītaga nang'ho byashala kūlwa wingī wa shikolo shako. Ī yoi yalī na shikolo gītī divai ya Helimoni, na booya bo ng'holo kūfuma Zahali.

¹⁹Badani na Bayunani ba kūfuma Uzali benhaga divai kūkaabanya chūma shisulilwe, kasia na ndago.

²⁰Ī Dedani nayo yītaga nang'ho ī byashala, bakwenhelaga myenda midito ya kwambīkīja ha ndamhī.

²¹Ī sī ya Balabu na a basugi ba Kedaali pye a bose walī ūbayegelile no kūlwa nguno bakūjingījaga baana ba ng'holo na ng'ondi na mbūli.

²²Basūlūja ba kūfuma Sheba na Lama baasūlūjaga nang'ho ī shikolo shako, bakwinha shisanjo sha mu shilīwa shisoga sha būlī mbika, na mawe ga mpango, na zahabu.

²³Bana Halani, Kane, Edeni; na basūlūja ba Sheba na Ashuli na Kilimadi bīītaga byashala nang'ho.

²⁴A benaba bizaga ū kū magūlilū gako kwīta nang'ho byashala ya shizwalo shawiza, myenda ya būlulu, shitambaala shisumilwe chiza, na masulia masoga ga langi soga ccsoga, na ngoye jidosilwe chiza jūlūngwa magundo mu būleji būsoga.

²⁵Ī meeli ja Talishshi hū jalūbūūchaga Ī shikolo shako sha byashala, walī okalile, hangī walī na ntili ū mu gatī ya būjiba bo nyanza.

²⁶A babugi ba ngahi bako baakūkolobegije kūle kū būjiba. Lūyaga lwa kīya lūkūkūpaanagūla paza paza ū mu būjiba bo nyanza.

²⁷Ū būsabi wako, nī byashala yako, na a banhū ba mu nyanza nī shikolo shako; a batūmami ba mu meeli jako, na a babugi bako ba ngahi, na a babeeja ba meeli ūlū jabipa; a basūlūja ū mu byashala jako, na a bashilikale bako; na a bangī pye abo balī ū mu meeli bakūnwela mu nyanza ū mu lūshikū lwene yatubīlaga.

²⁸A bikaji ba mu sī ja kū mbalama ya nyanza bakūdetema no ūlū būbigwa baalīla a batūmami ba mu meeli jako.

²⁹Pye a badiimi ba ngahi bakūjileka ī meeli, a banhū ba mu nyanza na a batūmami ba mu meeli bakwikīga kū ng'walo,

³⁰bakūlīle ng'hūngū n'ilaka lya higūlya mu kūkūsaatwa no no no; bakwiyisīīla lūbuubu kū mitwe, kūnū bakūgalagalaga mu mabu.

³¹Bakwihalūla mapala kūlwa nguno yako, bazwale na magūnīla bakūkūlīlaga ng'hūngū mu kūsaatwa kūtaale kwa mu ng'holò.

³²Bakūtūla ng'hūngū kūlwa kūkūlīla, kūnū bakūhayaga, Nani ūyo wabīta kūhuumūjiwa sele sele gītī Tulo ūyo apīndiwe minzī kose kose?

³³Ī byashala jako jalūsambaalaga ū mu nyanza, mahanga mingī gapandīka sha kūgiigelwa; kūlwa wingī wa sabo jako na shikolo shako, walūbasabyaga batemi ba mu sī.

³⁴Al'īhaha angū wakenaagūkīla mu nyanza, mu būjiba bo minzī; ī shikolo shako na a banhū bako baanwela hamò nang'ho.

³⁵Pye a bikaji ba mu sī ja mbalama na nyanza wabajinjimajaga ū bebe; a batemi babo bakūtinginaga kūlwa ng'hahū, ū būshū wabo wabipaga no kūlwa boobà.

³⁶A basūlūja ba mu mahanga bakwishoolagūlaga kūlwa nguno yako; nguno wakalīla habi no, nīyo ūtūbiza ho hangī.