Read Sukuma Bible 2015 – Bibilia Ilagano Lya Kale 2015 Ezekia 28 Bible Online

Ezekia 28 - Sukuma Bible 2015 – Bibilia Ilagano Lya Kale 2015 bible

Ezekia 28

¹Ū mhayo go ng'wa SEEBA gūnizīīla gūlīhaya:

²Ng'wana wa munhū, ng'wīlage ū nsugi wa Tulo, u Seeb MULUNGU alīhaya gīkī, “Kūlwa wikumīlīja wa ng'holò yako ūkwihayaga, ‘Nalī Mulungu ū nene, nigashije h'isumbī lya ng'wa Mulungu, mu būjiba bo nyanza.’ Managa gīkī ū bebe ūlī munhū dūhū, ūtī mulungu na hado yaya nūūlū īkī ūkiganikaga ūlī na masala gītī Mulungu.

³Ū bebe, ūlī na masala kūntinda Danyeli? Gūtīho mhayo gwa mbisīla ūyo gūdūgije kūgwibisa?

⁴Angū mmho wakwīja no ī sabo kūlwa masala na witegeleja wako! Nū mu mabīkīlo gako ookaja mo zahabu na feza pa pa pa.

⁵Angū mmho ūkongejaga nū kūsaba kūlwa būdeeba būtaale ū mu kasūlūgīje! Nose nī ng'holò yako ī haha īdoosile Īkī ūlī na sabo ningī!

⁶Alilūūlū ū Seeba MULUNGU alīkūwīla: Ū bebe īkī ūkwiyiganikaga gīkī ūlī na masala gītī Mulungu,

⁷nakūkwenhela banishi ba kūle bize bakūdumīle, ihanga liiboneeji kūtinda pye a mahanga; ū būsoga wako na a masala gako shikūmanhya na līlūshū lyabo, ū wiza wako h'ūmo būbizīle bakūbūsosohaja bo shū.

⁸Bakūkūhilimīkīja ng'wichongo, ūkūcha lūfu lūbi lwa mu būjiba bo nyanza.”

⁹Ūkwikala ūkūhayaga, “Nalī Mulungu, mu būtongi wa babūlagi bako? Ū makono ga babūlagi bako, ū bebe ūlī munhū dūhū, ūtī mulungu yaya.

¹⁰Ūkūchīla mu makono ga mahanga ga kūle, ūche lūfu lwa banhū batasaalilwe; naayombaga nene, alīhaya Seeba MULUNGU.”

¹¹Ū mhayo go ng'wa Seeba gūnizīīla hangī:

¹²Ng'wana wa munhū, tūlaga ng'hūngū kūlwa ntemi wa Tulo ūng'wīle, Ū Seeba MULUNGU alīhaya gīkī, “Ū mu būshikaanu ū bebe waalī būlolelo, hama walī na masala no, nū būsoga wako walī būtī na shilingo.”

¹³Walī mu ngūnda gwa Edeni, ngūnda go ng'wa Mulungu; būl'iwe lya mpango lyalīho kūlwa būlenji wako; jalīmo lubi, topazio, alimasi, kilisolito, oniki, yasipi, safilo, takwiyo, na belilo. Ū nsingi gwa milīmo yako yalī zahabu, pyī ī shenīshi shalī shatūūlwa ho kūlwa nguno yako kūfuma lūshikū lwa kūbūmvwa kwako.

¹⁴Ū bebe walī Ikelubi lībilile maguta kūlwa nīmo gwa būlang'hani, nguno h'ūmo naalī nakūhelelile. Hūna lūūlū walī higūlya ya lūgūlū lwela lo Mulungu; wayeela yeelaga ha gatī ya mawe ga moto.

¹⁵Kūfuma lūshikū lwa kūbūmvwa kwako walī ūtī na shisembo ū mu nzīla jako, kūshisha aho wilonga būbi ū mulī bebe.

¹⁶Ū mu byashala jako ī ningī wītaga shibi, nguno walī ookalile wiboneeji. Hūna lūūlū nakakūponya hanze ya lūgūlū lwa ng'wa Mulungu, wīnga mo ūgookile. Bebe Ikelubi ūyo walī nang'hani, nakakūpeeja wīnga ū mu mawe ga moto.

¹⁷Ī ng'holò yako īkadoosa kūlwa nguno ya būsoga wako, a masala gako ūgasosohaja kūlwa wiza wako. H'ī nguno yene nakakūponya mu sī, nūkwīta kūbiza shikolo sh'igekemaja kū batemi

¹⁸Kūlwa wingī wa shibi shako na kūleka kūtūngīlīja ū mu byashala jako, ūkagasosohaja a mapandī gako ga kūlamīja. H'ī chena nakalagīja gūpuumūka moto ū mulī bebe gūūkoocha, nūkūshikīja hasī ūbiza mabu kū būtongi wa bose abo biloleelaga.

¹⁹Pye a mahanga ga banhū abo baalī bakūmanile wabagekemagije, nguno washikile ha ng'halīlo mbi no, hama ūtalabiza ho hangī.

²⁰Ū mhayo go ng'wa Seeba gūnizīīla gūlīhaya:

²¹Ng'wana wa munhū, galūkaga ūlogeje ū būshū wako kū sī ya Sidoni wīhangīle

²²ūlīhaya, Ū Seeba MULUNGU alīyomba gīkī, “Nalī na wilwisha nang'ho ū bebe Sidoni, nīyo ū mulī bebe nakwīta mhayo gwa kūnenhela ikūjo. Ūlū nalang'winhe nsango, hama niyooleche ū mu gatī yakwe gīkī nalī ng'wela, bakūdeeba gīkī nalī SEEBA.

²³Nakūntūmīla lībūsaatu naseje na mininga ū mu mapanda gakwe. Mibimba īkwilaalīla ū mu gatī yakwe; līlūshū līkūbalīlīka būlī kwene ū mulī we. Hūna bakūdeeba gīkī nalī SEEBA.”

²⁴Ī numba ya Isilaeli batikala bazenganilwe na bazenganwa babūbi, abo babange magwata masaatu na ming'hwa mūūgī. A henaho hū bakūdeeba gīkī nalī Seeba MULUNGU.

²⁵U Seeba MULUNGU alīhaya gīkī, “Ūlū nūbabilinga a Baisilaeli kūfuma ū kūmahanga ayo baasambaalīla, nakwiyoolecha ū kū mahanga gīkī nalī ng'wela, hūna bakwikala ū mu sī yabo īyo naalī nang'winha ntūmami wane Yakobo.

²⁶Na bakwikala moi mu mhola, bazenge numba na kūlīma migūnda ya mizabibu; bakūbiza mhola ūlū nūbagwisīja nsango a bazenganwa babo abo bikalaga babaluhije; hūna bakūdeeba gīkī ū nene nalī SEEBA Mulungu wabo.”