Read Sukuma Bible 2015 – Bibilia Ilagano Lya Kale 2015 Ezekia 29 Bible Online

Ezekia 29 - Sukuma Bible 2015 – Bibilia Ilagano Lya Kale 2015 bible

Ezekia 29

¹Mu lūshikū lwikūmi n'ibīlī ng'weji gw'ikūmi, ng'waka gw'ikūmi, mhayo go ng'wa SEEBA gūkanizīīla gūlīhaya:

²Ng'wana wa munhū, ng'hangīlage ū Falao ntemi wa Misili, nī Misili ī yose.

³Yombaga nang'hwe ūng'wīle, Ū Seeba MULUNGU alīhaya gīkī, “Nalī na wilwisha nang'ho ū bebe Falao ntemi wa Misili, bebe ūyo ūl'iyoka itaale ūlambalalile mu myongo yako. Ūkikumīlījaga ūlīahaya, ‘Ū Mongo gwa Nile gwane, naagūtala nene kūlwa nguno yane.’

⁴Alīyo nakūkūgwasha malobo ū mu saya jako, hūna ī ndīlo ja mu myongo yako najidaamīlīje ū mu magambala gako. Nakūkūduta ū mu myongo yako, ūfume nī ndīlo jako jidamīīlile ū mu magambala gako.

⁵Nakūjūkūleka kwitogolo, ū bebe nī ndīlo ja mu myongo yako pyī ī jose. Ūkūgwīla mu mbūga ng'wantenyegele ūgayiwe na wa kūkūkuma nūūlū kūkūyoola. Nakūkūfunya ūbize shilīwa kū shiinū ja mu masaka na noni ja kūlala.”

⁶Hūna pye a bikaji ba mu Misili bakūdeeba gīkī ū nene nalī Seeba. Nguno ū kū numba ya Isilaeli walī nang'ha gwidete.

⁷Bakakūdima na makono gabo ūtandagūka ūbachima a mabega gabo, aho baakūsendamīla ūbīnzīka būlabūka ī migongo yabo.

⁸Alilūūlū, ū Seeba MULUNGU alīhaya gīkī, Nakūkūtūmīla būlūgū, nababūlage a banhū bako nī mitugo jabo.

⁹Ī Misili īkūbiza itogolo lītī na shose shose. Hūna bakūdeeba gīkī ū nene nalī SEEBA. Nguno ūkikumīlījaga ūlīhaya, Ū Mongo gwa Nile gwane, naagūtala nene.

¹⁰Alilūūlū ū nene nalī ng'wilwisha wako nī myongo yako; hama ī sī ya Misili nakwīkenaagūla ībize itogolo lītī na shose shose, kwandīja Migidoli kūja Aswani; kūjūshika kū lūbīmbī lwa Kushi.

¹¹Gūgūlū gwa munhū nūūlū gwa ndimu gūtalabīta mo, nūūlū ītalabiza na bikaji mo kūshisha ikanza lya myaka makūmi anè.

¹²Ī sī ya Misili nakwīyīta ībize itogolo like hamò nī sī ījo jikenaagūkile; nī mizengo yamo īkūbiza dalali ikanza lya myaka makūmi anè, hamò na mizengo īyo īkenaagūkile. Hanuma a Bamisili nakūbabbalasanya mu mahanga, nabasambaagīje mu masī.

¹³Alīyo nahene ū Seeba MULUNGU alīhaya gīkī, Ī myaka makūmi anè ūlū yūshila nakūbabilinga a Bamisili kūfuma ū kū sī ījo baalī basambaalīla.

¹⁴Nakūbashosha kūfuma ū kū būding'wa wabo nabenhe mu sī ya Misili ya Magūlya,[18] ī sī ya bakūlūgenji babo. Ū būtemi wenūbo būkūbiza būgokolo.

¹⁵Būkūbiza būgokolo kūtinda pye a mabūtemi, nīyo būtaligūngūhya hangī higūlya ya mahanga a gangī. Nakūwīta būbize būgokolo no, kūshisha būtūdūla kūgasuga hangī a mahanga a gangī.

¹⁶Ī Misili ītūbiza sī ya kūsanyiwa hangī na banhū ba Isilaeli. Alīyo īkūbiza ya kūbizūkīja dūhū ī shibi shabo ī sha kūshoka kwenūko, kūkooba būgunanhwa. Hūna bakūdeeba gīkī ū nene nalī Seeba MULUNGU.

¹⁷Mu lūshikū lwa kwandya ng'weji gwa kwandya, ng'waka gwa makūmi abīlī na mpungatī, ū mhayo go ng'wa SEEBA gūkanizīīla gūlīhaya:

¹⁸Ng'wana wa munhū, ū Nebukadineza ntemi wa Babuloni akabatūmamya nīmo ndito no a bashilikale bakwe ū kū būlūgū bo Tulo; nguno būlī ntwe gūkahalūka, na būl'ibega lyūchūbūka. Alīyo ū wei na a bashilikale bakwe atapandīkile mheela yose yose kūlwa būlūgū ūbo akabūlwa ī Tulo.

¹⁹Alilūūlū ū Seeba MULUNGU alīhaya gīkī, Ī sī ya Misili nakūng'winha ū Nebukadineza ū ntemi wa Babuloni; ū būsabi waamo akūbūbūūcha pyī ū bose. Akūbūsola, ashidiime ī shikolo sha mu sī yenīyo apandīke mheela mu gīko kūlwa bashilikale bakwe.

²⁰Ī sī ya Misili nang'winhaga inong'ho kūlwa nguzu jakwe, nguno ū wei nī libità lyakwe līkanīītīla ū nīmo gwenūyo; alīhaya Seeba MULUNGU.

²¹Ū mu lūshikū lwenūlo ī sī ya Isilaeli nakwīyīta īzwe ipembe,[19] hūna nū bebe nakūgūlugūla ū nomo gwako ū mubo. Hūna bakūdeeba gīkī ū nene nalī SEEBA.