Read Sukuma Bible 2015 – Bibilia Ilagano Lya Kale 2015 Ezekia 30 Bible Online

Ezekia 30 - Sukuma Bible 2015 – Bibilia Ilagano Lya Kale 2015 bible

Ezekia 30

¹Ū mhayo go ng'wa Seeba gūnizīīla hangī gūlīhaya:

²Ng'wana wa munhū, funyaga būhangi ūhaye gīkī, “Ū Seeba MULUNGU alīhaya gīkī, ‘Līlaga ūhaye, Gakūbiza ho mayanga ū mu lūshikū lwenūlo!’

³Nguno ū lūshikū lūlī hihī, ū lūshikū lwa ng'wa Seeba lūlī hihī; lūshikū lwa malunde, ikanza lya lūshilo ū kū mahanga.

⁴Ī Misili īkūsangwa būlūgū, mayanga mataale gakwīyikīīla ī Kushi nguno ya banhū kūbūlagwa mu Misili; nī sabo jaamo jikūsolwa jijanwe, nī misingi yamo īkambagūlwe.”

⁵Bana Kushi na Puti na Lidya na Alabuni ī yose kūja Libya, na a banhū ba mu sī y'ilagano; pye a benaba bakūmalwa būlūgū hamò nī sī ya Misili.

⁶Ū SEEBA alīhaya gīkī, “Abo bal'isangī na Misili bakūgwa, nū wikumīlīja wa nguzu jakwe būkūleba. Abo balīmo ū mu gatī yakwe bakūmalwa būlūgū, kwandīja Migidoli kūshisha Aswani; alīhaya Seeba MULUNGU.

⁷Bakūbiza buyīkī gīt'ūmo jilī sī ījo jilī buyīkī; nī mizengo yabo īkūsakaala gīt'ūmo īlī mizengo īyo yagaalūka kūbiza misaka.

⁸Ūlū nītiima moto ī Misili, na a bagunanhi bayo būtobagūlwa pye a bose, a henaho bakūdeeba gīkī ū nene nalī SEEBA.”

⁹Ū mu lūshikū lwenūlo nakūtūma nhūng'wa bo meeli kūjūbabbamula a bana Kushi, bīnge ū mu wilendeja wabo. Bakwikīīlwa mayanga mataale ū mu lūshikū lwa lūshilo lwa Misili, nguno ū lwene ng'hana lūlī mu nzīla lwizile.

¹⁰Ū Seeba MULUNGU alīhaya gīkī, “A mabità ga bana Misili nakūgamala bo nkono go ng'wa Nebukadineza ntemi wa Babuloni.

¹¹Ū wei na a bashilikale bakwe līl'ibità lya biboneeji kūtinda mahanga gose; akwenhwa kwiza kwīkenaagūla ī sī. Ī Misili bakwīdumīla bo shū, bakwīyookaja mibimba ī sī.

¹²A matambī ga Mongo gwa Nile nakūgūūmīcha, ī sī nakwījinja kū banhū babūbi; mu nkono gwa banhū ba kūle nakwīkenaagūla ī sī, nī shose īsho shilīmo shikūshila. Nene Seeba nalīhaya.

¹³Ū Seeba MULUNGU alīhaya gīkī, ‘Nakūshikenaagūla ī shiikolile sha kūlamiwa, nakūgamala a mashigīmbo ayo galī Menfisi. Atalabiza ho nsugi hangī ū mu Misili; ī sī nakwīyookaja ng'hahū.

¹⁴Ī Misili ya Magūlya nakwīkenaagūla shishile mo shose shose; ī Zoa yene nakwītiima moto, Ī Tebesi nīyinhe nsango.

¹⁵Ī Pelusiumu īyo īlī būpīlīlo bo Misili, nakwīyitīīla būpelanu bone, a mabità ayo galī Tebesi nakūgapyagūla gashile ho.

¹⁶Nakūpemba būpī ū mu Misili, Ī Pelusiumu īkūgalagala kūlwa kūsaatwa; ī Tebesi īkūja na nyanga; Ī Menfisi īkūbiza mu nduha ya būja na būja.

¹⁷A basūmba ba Heliopoli[20] na a ba Bubasiti[21] bakūmalwa būlūgū; nīyo ī mizengo yenīyo īkūsaamījiwa kū būding'wa.

¹⁸Ūlū nūlībīnzagūla ī lijoki lya Misili giiti shikwīkundīkīja ī Tapanesi, ū kwikumīlīja kwa nguzu jayo kūkūshila. Īkūkundīkījiwa malunde, a banhū bayo bakūtwalwa mu būsaamiwa.

¹⁹H'ūmo nakwīgwisīja nsango ī Misili; bamane gīkī ū nene nalī Seeba.’”

²⁰Mu lūshikū lwa mpungatī ng'weji gwa kwandya, ng'waka gwikūmi na gūmò, mhayo go ng'wa SEEBA gūnizīīla gūlīhaya:

²¹Ng'wana wa munhū, ū nkono go ng'wa Falao ū ntemi wa Misili naagūbīnzile, gūtaalī ū kūtungwa būlūngo gīkī gūpīle, nūūlū gūtaalī kūtūūlīlwa mantī ga būlūngo, gīkī gūdaame gūdūle kūdima lūshū.

²²Alilūūlū, ū Seeba MULUNGU alīhaya gīkī, Ū nene nalī ng'wilwisha wakwe ū Falao ū ntemi wa Misili, nakūmīnzagūla pye a makono būbīlī waago; ū nkono ū ndaamu nū yūyo gūbīnzīkile, nantūje ū lūshū lwakwe lūlagale ū mu nkono gwakwe.

²³A Bamisili nakūbabbalasanya mu mahanga, nabasambaagīje mu masī.

²⁴A makono ga ntemi wa Babuloni nakūgaguzuhya, natūūle lūshū lwane ū mu nkono gwake; alīyo a makono ga ng'wa Falao nakūgabīnza, akūng'oola ū kū būtongi bokwe gītī munhū alabūkile ha taale.

²⁵Nakūgaguzuhya a makono ga ntemi wa Babuloni, alīyo a ga ng'wa Falao gakūsalala. Ūlū nūlūtūūla ū lūshū lwane ū mu nkono gwa ntemi wa Babuloni, hūna wandya kūlūhubenga ū mu Misili, a henaho bakūnideeba gīkī ū nene nalī SEEBA.

²⁶A Bamisili nakūbabbalasanya mu mahanga, nabasambaagīje mu masī. Hūna bakūdeeba gīkī ū nene nalī SEEBA.