Read Sukuma Bible 2015 – Bibilia Ilagano Lya Kale 2015 Ezekia 32 Bible Online

Ezekia 32 - Sukuma Bible 2015 – Bibilia Ilagano Lya Kale 2015 bible

Ezekia 32

¹Mu lūshikū lwa kwandya ng'weji gw'ikūmi n'ībīlī, ng'waka gw'ikūmi n'ībīlī, mhayo go ng'wa Seeba gūkanizīīla gūlīhaya:

²Ng'wana wa munhū, tūlaga ng'hūngū kūlwa ng'wa Falao ntemi wa Misili, ūng'wīle: Ū bebe ūkibonaga gīkī ūlī shimba ū kū mahanga ga banhū; alīyo ūtikīlile na ng'wīna mu nyanza, ūkiponanjaga ū mu myongo yako wayūgayūganya a minzī na magūlū gako, nī myongo wīlibangūla.

³Ū Seeba MULUNGU alīhaya gīkī, Nakūkūsanga n'ibità itaale lya banhū nakūponekeje ntego gwane, bakūkūdutanja bo ntego gwane bakūfunye mo.

⁴Nakūkūponya hasī nūūmu, nakūdutanje kūja kū malaale; ī noni ja kūlala nakūjizunīlīja jigwe a halī bebe, nī shiinū ja mu masaka jikūkūlya kūshisha jiigūte.

⁵Ī nofu ja mīlī gwako nakūjanikīla mu ngūlū, nī njonga jikookala masaagīīlwa ga mimba gwako.

⁶Ī sī nakwīnaganya na mininga gako, yose pyī īkūloba kūshisha kū ngūlū; nī myongo īkookala nofu ja mīlī gwako.

⁷Ū ng'wikanza lya kūkūjimīja ī lisana lyako nakūlīfīkīja ī ligūlū, nī sonda nūjītīla giiti; Ī līīmi nakūlīshīkīja ilunde, nū ng'weji gūtūfunya ū būpe wago.

⁸Būlī shene īsho shikang'wekaga ū kwigūlū nakūshīta shibize giiti ū kūlī bebe; Ī sī yako nakwīyenhela giiti; alīhaya Seeba MULUNGU.

⁹Ī likanza lya kūkūkenaagūla nakūkoya ng'holò ja banhū bingī ū mu mahanga, mu sī ījo ūtaalī kūjimana.

¹⁰Nakūbadedebaja banhū bingī kūlwa nguno yako, a batemi babo bakūnibona nalīkūhubengela līlūshū lyane, bakogoha no bayūdetema dūhū. Ū mu lūshikū lwa kūgwishiwa kwako būlī ūmò wabo akūdīīla alīdetema, ogohaga kūlwa būpanga bokwe.

¹¹Nguno ū Seeba MULUNGU alīhaya gīkī, “Ī līlūshū lya ntemi wa Babuloni līkūkūsanga kūkūdumīla.

¹²A mabità gako nakūgagwisha bo nkono gwa bagosha ba nguzu, banhū bibonya kūtinda mahanga gose. Ū wikumīlīja wa Misili būkūbīnzīka, a mabità gakwe gakūgwishiwa.

¹³Pyī ī mitugo jaamo nakūjikenaagūla, jikūshila ū kū mbalama ya minzī mingī, gatūyuugwa na magūlū ga munhū hangī, na gatūūtowa bo chūūga sha mitugo hangī.

¹⁴Hūna a minzī gaamo nakūgaleka gikīnde, nī myongo yamo nīyīte kūyūhūūma mu būlembeezu gītī maguta; alīhaya Seeba MULUNGU

¹⁵Ī Misili nakwīyīta kūbiza buyīkī, nī sī nīyīngīje būlī shose na shose, a bikaji baamo nakūbatūla pye; hūna bakūnideeba gīkī nalī SEEBA.”

¹⁶Īyī yene ng'hūngū ya kūtūmamīlwa kwīlīla Misili; bashīke ba mahanga ga banhū bakwītūmamīla, bakwītūmamīla kwīlīla ī Misili na a mabità gayo pye a gose; alīhaya Seeba MULUNGU.

¹⁷Mu lūshikū lwikūmi n'itanò lwa ng'weji, ng'waka gw'ikūmi n'ībīlī, mhayo go ng'wa SEEBA gūkanizīīla gūlīhaya:

¹⁸Ng'wana wa munhū, līlaga ng'hūngū kūlwa mabità ga Misili, ūgalugalīle mu gatī ya sī kū bafu, gabize ng'wenūmo na a bashīke ba kūfuma mu mahanga a ga nguzu, nī ligelè lya baja ng'wichongo.

¹⁹Bawīlage, “A bing'we hū mubakīlile a bangī ū būsoga? Ikagi kūlimu mukalambalale hamò na banhū batasaalilwe.

²⁰Nabo bakūgwa, babize ū ng'wigelè lya babo baabūlagwa bo līlūshū. Nīyo ī haha ī līlūshū līlīng'waaje; n'adutanjiagwe na a mabità gakwe pye a gose.

²¹Ū mu gatī ya shigila balīmo a basugi ba nguzu bakwīhayaga ī Misili na a babo baal'isangī līmò nayo; balīhaya, ‘Nabo biza hasī kūlambalala na banhū batasaalilwe, banhū abo baabūlagwa bo līlūshū.’”

²²Ī Ashulu īlī kwenūko nī libità lyayo ī lyose, īpīndiwe shigila sha bafu bayo; pye abo baabūlagwa bo līlūshū.

²³Ī shigila shabo shilī mu shimu mu gatī y'ichongo, nī libità lyayo līlambalalile kūshipīndīlīja ī shigila shayo. Pye abo baalī na lyogohya mu shikū ja būpanga wabo balī kwenūko, baagwishiwa līlūshū.

²⁴Ī Elamu īlī kwenūko, na a mabità gayo gashipīndije ī shigila shayo, pye a bose baabūlagwa, baagwishiwa līlūshū. Pye abo baalī na lyogohya mu shikū ja būpanga wabo balī mu gatī ya sī kū bafu, baaja batasaalilwe; balī kwenūko na magooke gabo, balī ng'wigelè lya baja ng'wichongo.

²⁵Wambīlwa būlīīlī ū mu bafu, hamò na a mabità gakwe a gose kūshipīndīlīja ī shigila shakwe; pye a benaba batasaalilwe, baabūlagwa bo līlūshū. Īkī ū mu shikū ja būpanga wabo ī lyogohya lyabo lyalī lyīsambaalīla hose pyī ū mu sī, ī haha balī ng'wigelè lya baja ng'wichongo, balambalalile ng'wenūmo hamò na bafu; bakūkoyaga na magooke gabo.

²⁶Balīko koi na ba Mesheki na Tubali, na a mabità gabo gashipīndije ī shigila shabo; pye batasaalilwe. Baabūlagwa bo līlūshū kūlwa nguno ū mu shikū ja būpanga wabo, ī lyogohya lyabo baalī baalīsambaaja hose pyī ū mu sī.

²⁷Ī gīsī batalambalalile hamò na a bashilikale a bangī abo batasaalilwe, abo baacha būponyiwa mu shigila hamò na shilanga shabo sha būlūgū, nī shū jabo jūtūūlwa kū mitwe yabo būjiisagūja? Ū nsango gwa shibi shabo gūgikalīlile a maguha gabo nūūlū īkī ī lyogohya lyabo lyalī lyīsambaalīla pyī ī sī ū mu shikū ja būpanga wabo.

²⁸Nū bebe Falao ūkūbīnzagūka, ūkūlambalala ū mu batasaalilwe, hamò na a babo baabūlagwa bo līlūshū.

²⁹Nī Edomu īlīho, na a batemi bayo na a basugi, abo nūūlū īkī baalī na būdūla alīyo ī haha balambalalile hamò nabo abo baabūlagwa bo līlūshū. Balambalalile na banhū batasaalilwe, hamò na baja ng'wichongo.

³⁰Pye a basugi ba sī ja sukuma na a Basidoni balīko koi; baaja nūūlū īkī baalī na lyogohya nguno ya būdūla wabo, balī ū ng'wigelè lya bafu bachile soni. Balīko batasaalilwe, bakūkoyaga na magooke gabo balambalalile hamò na baja ng'wichongo abo baabūlagwa bo līlūshū.

³¹Ū Seeba MULUNGU alīhaya gīkī, “Ū Falao nī libità lyakwe ī lyose ūlū ūbabona koi akūlūngūja ū ng'wiyanga lya bashilikale bakwe a bose, abo baabūlaagwa bo līlūshū.

³²Nūūlū īkī ū mu shikū ja būpanga bokwe naalī nanzunīlīja ī lyogohya lyakwe līsambaale hose pyī ū mu sī, alīyo nang'hwe akūlambalala nī libità lyakwe, isangīje na banhū batasaalilwe, abo baabūlagwa bo līlūshū; alīhaya Seeba MULUNGU.”