Read Sukuma Bible 2015 – Bibilia Ilagano Lya Kale 2015 Ezekia 34 Bible Online

Ezekia 34 - Sukuma Bible 2015 – Bibilia Ilagano Lya Kale 2015 bible

Ezekia 34

¹Ū mhayo go ng'wa SEEBA gūnizīīla hangī:

²Ng'wana wa munhū, bahangīlage a badīīmi ba sī ya Isilaeli; hangaga ūbawīle, Ū Seeba MULUNGU alīhaya gīkī, A badīīmi ba sī ya Isilaeli abo bakilishaga boi dūhū balī mu kwihīga kūtaale! Nibūlī a badīīmi baleke ū kūlīlang'hana ī lidaale?

³A mabeelè mukang'waga, nī shizwalo sha kūbeeja kūfuma mu booya wajo mukazwalaga, hama ī ng'īnu mukasīnzaga; alīyo ū kūlīlang'hana ī lidaale yaya.

⁴Ī ngokolo mulemile ū kūjigunanha nū kūjilagūla ī saatu yaya, nūūlū jalabūka mutajitungaga. Nī jijo jikajaga būyaga mutajishoshaga, nūūlū jūjimīīla nahene mutajikoobaga; hama mukajisugaga mu būkalī na wiboneeji.

⁵Nose kūlwa kūgayiwa ndīīmi jalī jasambaala, hūna aho jasambaala jūyūliwa mashiinū ga mu masaka ga būlī mbika.

⁶Ī ng'holo jane jikasambaala mu ngūlū ja būlī mbika na būlī kwene ū kū mapandī ga higūlya. Jalī jasambaala hose pyī ū mu sī; na walī atīho wa kūjikooba nūūlū kūja akūjigīsīlījaga.

⁷Alilūūlū bing'we badīīmi, gwigwagi ū mhayo go ng'wa SEEBA:

⁸Ūmo nene nalī mpanga, alīhaya Seeba MULUNGU, īkī ī lidaale lyane lītī na ndīīmi, nose lyūsolwa nding'wa na kūbiza shilīwa kū mashiinū gose ga mu masaka, hangī nīyo īkī a badīīmi bane batī na būkalalwa bo kūlīkooba ī lidaale lyane, ūlū ītī kwilisha boi benekīlī dūhū; ītī ī lidaale lyane,

⁹Ī haha lūūlū a bing'we badīīmi gwigwagi ū mhayo go ng'wa SEEBA.

¹⁰Ū Seeba MULUNGU alīhaya gīkī, Naabalemile a badīīmi, nakūbalecha ū nīmo gwa kūlīdīīma ī lidaale, boye ū kwilisha boi benekīlī. Nīyo nakūbisaabīla būhūbi kūlwa nguno y'idaale lyane; hama nakūbahulumūja ū kū milomo yabo ī lidaale lyane boye ū kūlīgīmba gīkī shilīwa shabo.

¹¹Nguno ū Seeba MULUNGU alīhaya gīkī, Nene ng'wenekīlī nakūjikooba ī ng'holo jane, naje nakūjigīsīlījaga.

¹²Nakūjilabīīla nene ī ng'holo jane, gīt'ūmo ndīīmi akalabīīlīlaga idaale lyakwe nūūlū līsambaalile alīyo alī hamò nalyo. Nakūjipīja najīnje būlī kwene ūko jikasambaalīla mu lūshikū lwa malunde na giiti.

¹³Nakūjīnja ū kū mahanga najibilinge kūfuma ū kū masī, najenhe mu sī yajo, nayūjidīīmīla mu ngūlū ja sī ya Isilaeli na kū ng'hilimvwa ya myongo, nū mu magoobe pye ayo galīmo moi.

¹⁴Nakūyūjikīgīla mu madīīmīlo masoga, na a magūlya ga ngūlū ja Isilaeli gakūbiza madīīmīlo gajo. Ū mu ngūlū ja Isilaeli ng'wenūmo jikūyūlya maswa mafuuku, nū kūtūja jikūyūtūūgīja mumo madīīmīlo gawiza genayo.

¹⁵Ī ng'holo jane nakūyūjikīgīla nene ng'wenekīlī, na a ha kūtūūgīja naajitwala nene; alīhaya Seeba MULUNGU.

¹⁶Ījo jajimīīla nakūjikooba, nī jijo jaaja būyaga nakūjishosha. Hama ījo jilabūkile nakūjitunga. Ī ngokolo nakūyūjigunanha, alīyo ī ng'īnu nī ja maguzu nakūjikenaagūla; ī lidaale nakūlīdīīma mu būtūngīlīja.

¹⁷Nīyo hangī ū Seeba MULUNGU alīhaya gīkī, Na a bing'we idaale lyane, nakūlamula a ha gatī ya ng'holo na ng'holo, na a ha gatī ya ng'ondi na ngulyati.

¹⁸Ū kūlya sha mu madīīmīlo masoga mugūdalahile gīkī gūlī mhayo ndo no ū kū bing'we? Nibūlī mukabonaga shiigelile mulītobange na magūlū ging'we pyī ī lidīīmīlo? Nū kūgelela kūng'wa minzī a malembeezu mutafulagwa? Mukabonaga shing'wigeleelilwe kūgayuuga na magūlū ging'we na a gangī?

¹⁹Ni būlī ī lidaale lyane līyūlya īsho ng'washitobangaga na magūlū, na kūng'wa minzī ayo ng'wagayuugaga na magūlū ging'we?

²⁰Hūna lūūlū ū Seeba MULUNGU alīhaya gīkī, Nene ng'wenekīlī nakūjilamula ī ng'holo jane a ha gatī ya ng'īnu nī dīīda.

²¹Nguno ī dīīda mukajishindīkaga bo mbazu na mabega ging'we, ng'wayūjikunduga na mapembe kūshisha jasambaala sagala.

²²Nakūlīguna ī lidaale lyane lītizūtwalwa mu būding'wa hangī; hama nakūlamula ha gatī ya ng'holo na ng'holo.

²³Nakūlītūūlīla ndīīmi ūmò ī lidaale lyane, ntūmami wane Daūdi; h'ūyo akūyūjikīgīla, akūyūjikīgīla na akūbiza ndīīmi wajo.

²⁴Ū nene SEEBA nakūbiza Mulungu wabo, ū ntūmami wane ū Daūdi akūbiza nsugi ū mubo; nene SEEBA nalīhaya.

²⁵Nakūbeeja najo ilagane ipya lya mhola, ī sī nīyīngīje a mashiinū a makenaagūji, jiyikala nūūlū kū matogolo, nūūlū kū masaka jiyūlaala jilī mhola dūhū.

²⁶Nakūīlūkīla mbango, ī joi na a mapandī ayo galūpīndije ū lūgūlū lwane. Nī mbula nakūyūjenhela ng'wikanza lyayo, īkūbiza mbula ya mbango.

²⁷Ī mitī ya mu malaale īkūtwaaja a matwajo gayo, nī sī īkūbbiisha īsho shikalīmagwa; a banhū bakūbiza mhola ū mu sī. Ūlū nūgabīnzagūla a mantī ga majoki gabo, nūbīnja nū mu makono ga banhū abo baalī baabatūūla mu būsese, bakūdeeba gīkī ū nene nalī SEEBA.

²⁸Batūjanwa kū mahanga hangī kūjūbiza nding'wa, nūūlū mashiinū makenaagūji gatūbalya hangī. Bakwikala mu mhola, na atalilonga wa kūbogohya.

²⁹Nakūbapandīkīla malaale maponeki ga shilīwa, batizikala bakūkoyiagwa nzala hangī ū mu sī yabo, nūūlū kūsondagūlwa na mahanga.

³⁰Hūna bakūdeeba gīkī ū nene SEEBA Mulungu wabo nalī hamò nabo, na gīkī a boi, a ba numba ya Isilaeli, bene banhū bane; alīhaya Seeba MULUNGU.

³¹Bing'we ng'holo jane, ng'holo j'idīīmīlo lyane, mūlī banhū; ū nene nalī Mulungu wing'we; alīhaya Seeba MULUNGU.