Read Sukuma Bible 2015 – Bibilia Ilagano Lya Kale 2015 Ezekia 35 Bible Online

Ezekia 35 - Sukuma Bible 2015 – Bibilia Ilagano Lya Kale 2015 bible

Ezekia 35

¹Ū mhayo go ng'wa SEEBA gūnizīīla gūlīhaya:

²Ng'wana wa munhū, galūkaga ūbūlogeje ū būshū wako kū lūgūlū lwa Seili, ūlūhangīle

³ūlīhaya, “Ū Seeba MULUNGU alīyomba gīkī, Nalī na wilwisha nang'ho ū bebe lūgūlū lwa Seili, nakūkūgoloolela nkono gwane nakūgalūche ūbize dalali na buyīkī.

⁴Ī mizengo yako nakwīyīta ībize mapagale gike gatī na shose shose; hūna ūkūdeeba gīkī ū nene nalī SEEBA.

⁵Nguno walī ūbīkile wanishi bo kale, a Baisilaeli aho balī ng'wikanza lyabo lya makoye ūbabeegeja nzīla ya kūbūlagwa, ikanza īlo nsango gwabo gwalī gūkīlanīgije ū būdito.

⁶Hūna lūūlū ūmo nene nalī mpanga; alīhaya Seeba MULUNGU, nakūkūtūūla mu makono ga babūlagi; nīyo bakūkūkūūbīja būlī kwene. Ū bebe īkī ū būbūlagi wabonaga gīkī mhayo ndo dūhū, na lūūlū ū mhayo gwenūyo gūkūkūkūūbīlīja.

⁷Ū lūgūlū lwa Seili nakūlwīta lūbize itogolo lītī na shose shose, būlī ng'wene ūyo ūbītīla mo nakūmūlaga.

⁸Ī ngūlū jako nakūjookaja mibimba; abo bakūbūlagwa bo līlūshū bakūgwa ū mu ngūlū nū mu mbūga jako, nū mu myongo yako ī yose.

⁹Nakūkwīta ūbize itogolo buyīkī ilalī; ī mizengo yako ītalabiza na bikaji mo hangī. Hūna ūkūdeeba gīkī nalī SEEBA.”

¹⁰Nguno wahayaga, “A mahanga ay'abīlī aya gakūbiza gise, pyī nī sī jago, tūkūgadima bise.” Alīyo ū nene Seeba nalīho.

¹¹Alilūūlū, ūmo nene nalī mpanga, alīhaya Seeba MULUNGU, nakūkwītīla kūlenganīla nū būpelanu wako nū wiilu ūbo ūkaboolecha kūlwa kūbakolwa; ūlū nūkūlamula nakwiyoolecha ū kūbo banimane.

¹²Hūna ūkūdeeba gīkī ū nene SEEBA nīyigwa pyī ī mihayo yako y'ibengwe, īyo ūkīyomba ūkūjihayaga ī ngūlū ja Isilaeli; ī, “Ī haha beejiwe, shitīmo shose shose; ninhilwe nene nalye.”

¹³Nīyigwa ī mihayo yako īyo wikalaga ūkwikumīlījaga mu kūnidalaha, kūko ūkūnihayaga mu kūnisondagūla ndūhū nū logohano.

¹⁴Hūna lūūlū ū Seeba MULUNGU alīhaya gīkī, “Ī sī na sī ūlū jikūyegaga ū bebe nakūkwīta ūbize itogolo buyīkī.

¹⁵Nguno Isilaeli aho bogalūchiwa ū wingīji bo numba ya kūbiza itogolo lītī na shose shose; ū bebe ūkayega, nū bebe nakūkwītīla gīko. Ū bebe lūgūlū lwa Seili ūkūbiza buyīkī, ū bebe nī Edomu ī yose. Hūna bakūdeeba gīkī ū nene nalī SEEBA.”