Read Sukuma Bible 2015 – Bibilia Ilagano Lya Kale 2015 Ezekia 36 Bible Online

Ezekia 36 - Sukuma Bible 2015 – Bibilia Ilagano Lya Kale 2015 bible

Ezekia 36

¹Alilūūlū ng'wana wa munhū, jihangīlage ī ngūlū ja Isilaeli ūjiwīle, “Bing'we ngūlū ja Isilaeli, gwigwagi ū mhayo go ng'wa SEEBA.

²Ū Seeba MULUNGU alīhaya gīkī, ‘Ū ng'wanishi wamuhayaga a bing'we, būlī ng'wabona! Ī sī ja magūlya ga kale jabizile jise.’”

³Alilūūlū hangaga ūhaye, “Ū Seeba MULUNGU alīhaya gīkī, Īkī balūmudumīlaga hose hose nose bamukenaagūlile kūshisha ī haha mulī sabo ya mahanga gangī, na mukwikalaga ng'ūhayiwa kībi na kūsīīgwa mu banhū,

⁴na lūūlū a bing'we ngūlū ja Isilaeli gūdegelekagi ū mhayo go ng'wa Seeba MULUNGU. Ū Seeba MULUNGU alīgūhaya ū mhayo gwenūyū kū ngūlū ī nhaale nī ndo, nū kū myongo nī mbūga, nū kū mafuluka ayo galī buyīkī, nī mizengo īyo yalekwa dalali, īyo īkūsekagwa na mahanga gose ayo gamupīndije.

⁵Hūna lūūlū ū Seeba MULUNGU alīhaya gīkī, Naayombile mu būkalī nguno ya wilu bone, naagawīlile pye a mahanga nī Edomu ī yose; nguno aho balīyīta ī sī yane kūbiza yabo gīkī bagadiime a madīīmīlo gayo, baalī na būyegi no kūlwa būbi bo mu ng'holò jabo.”

⁶Alilūūlū ī sī ya Isilaeli īhangīlage; ūjiwīle ī ngūlū īnhaale nī ndo, nī myongo pyī nī mbūga. Hayaga, “Ū Seeba MULUNGU alīhaya gīkī, Naayombile mu būpelanu kūlwa wilu bone nguno ī libengwe lya mahanga lyamuluhije no.

⁷Hūna lūūlū ū Seeba MULUNGU alīhaya: Nalīlahīla na nkono gūnunjiwe ng'wigūlya, gīkī a mahanga ayo gamupīndije, a goi hū gakūbiza ga kwibengelejiwa no.”

⁸Alīyo a bing'we ngūlū ja Isilaeli, mukūfulumya matambī na kūtwaja matwajo kūlwa Baisilaeli banhū bane, nguno batūdīīla kūshoka ī kaya.

⁹Ū nene nalī na maganiko ga kūng'wītīla yawiza; mukūlīng'wa na shikolo shihamve ū mu bing'we.

¹⁰Nakūng'wīta mukwīlīlwe banhū, pye ba numba ya Isilaeli, pyī ī yose gete; ī mizengo īkūpandīka bikaji, nī misaka īkūzengwa būpya.

¹¹Nakūng'ongegeja a banhū nī mitugo, hangī bakūbiza bibyaji no bakwīle. Nakwenha banhū ba kwikala ū mu bing'we gīt'ūmo ng'walī ī kwandya, hūna nakūng'wīta ng'wīlūkīlwe kūtinda ūmò ng'walī ī kale. Hūna lūūlū mukūdeeba gīkī ū nene nalī SEEBA.

¹²Nakūbīīta banhū bashimīze hangī ū mu bing'we: Alichene, a banhū bane a Baisilaeli; a bing'we mukūbiza sabo yabo, wingīji wabo gete; mutalabenheleja hangī kūchīlwa baana babo.

¹³Ū Seeba MULUNGU alīhaya gīkī, Īkī a banhū bakamuhayaga, “Mukalyaga banhū na kūlīkenaagūja ī lihanga a baana balyo,

¹⁴Ī haha lūūlū mutūlya banhū hangī, nūūlū ī lihanga ling'we mutūlyenheleja kūgaya baana; alīhaya Seeba MULUNGU.

¹⁵Natūmulekanīja ng'wikale mukwigwaga mahanga gakūmusondagūlaga, nūūlū mutikala ng'wiyūmīlījaga mukwineenelegejiagwa na mahanga, na mutalalyenheleja hangī ī lihanga ling'we kūgwa; alīhaya Seeba MULUNGU.”

¹⁶Ū mhayo go ng'wa SEEBA gūnizīīla hangī gūlīhaya:

¹⁷Ng'wana wa munhū, a Baisilaeli aho bikalaga ū mu sī yabo, baalī bīsosohaja no kūlwa kashimīzīle kabo na shītīle shabo; ī nhūngwa jabo ū kūlī nene jalī gītī būsoso bo nkīma alī mu shikū jakwe ja ng'weji.

¹⁸Hūna lūūlū nakabitīīla būpelanu bone kūlwa nguno ya mininga ga banhū ayo baalī bagiita ū mu sī yabo, na kūlwa kwīsosohaja mu nzīla ya shiikolile shabo sha kūlamiwa.

¹⁹Nakababbalaasanya būja kū mahanga, būsalang'hanīla mu masī; nakabalamula kūlenganīla na nhūngwa jabo, ūmò shaalī ī shītīle shabo.

²⁰Nīyo būlī kwene ū mu mahanga ayo bajaga balīlīsosohajaga ī lina lyane lyeela, nguno a banhū babahayaga gīkī, “A benaba banhū ba ng'wa SEEBA, alīyo īkabiza gīkī bīnge ū mu sī yakwe.”

²¹Ī lina lyane lyeela naalī naalīsaatwa no, īlo banhū ba numba ya Isilaeli baalīsosohajaga kū mahanga ayo bajaga.

²²Alilūūlū bawīlage a banhū ba numba ya Isilaeli, “Ū Seeba MULUNGU alīhaya gīkī, Ī mihayo yenīyī nakwīyīta ītī kūlwa nguno ying'we ba numba ya Isilaeli, alīyo kūlwa nguno ya lina lyane lyeela; īlo ng'walīsosohaja kū mahanga ūko ng'waja.

²³Nakoolecha ūmo būlī ū wela bo lina lyane, lina'itaale īlo lyasosohajiwa mu mahanga; īlo ng'walīsosohaja bing'we ū kūbo. Ū Seeba MULUNGU alīhaya: Ūlū niyoolecha ū kū būtongi wa mahanga gīkī nalī ng'wela ū mu bing'we, bakūdeeba gīkī ū nene nalī SEEBA.”

²⁴Nguno nakūng'wīnja ū mu mahanga pye a gose namubilinge kūfuma hose hose ū mu masī, namushoshe mu sī ying'we benekīlī.

²⁵Nakūmuseeseebela minzī meela, ning'we mukwela; nakūng'weja pyī ū būsoso wing'we, nī shiikolile shing'we sha kūlamiwa nashīnje pyī ī shose.

²⁶Nakūng'winha ng'holò mhya, nūmutūūlīla na moyo mpya ū mu bing'we. Nakūng'wīngīja ī ng'holò ying'we ī ndaamu gīt'iwe, nang'winhe ng'holò ya nofu.

²⁷Hanuma nakūmutūūlīla Moyo wane ū mu bing'we, nang'winhe ng'hūmbū ja kūgalondeela a malange gane, na kūshimīzīla mu shilagīlo shane mu kwilang'hana.

²⁸Hūna mukwikala hangī ū mu sī īyo naalī naabinha bakūlūgenji bing'we; mukūbiza banhū bane, nū nene nakūbiza Mulungu wing'we.

²⁹Nakūmupīja ng'wīnge ū mu būsoso wing'we pyī ū bose. Nakūshiitana ī shilīwa shimukwīlīle, hama natalang'wenhela nzala hangī.

³⁰Ī shisuumo sha mu mitī nakūmukwīgīja, nī shilīwa sha kūlīng'wa mu malaale, nose mutikala mukūkoyiagwa ibengwe kū būtongi bo mahanga kūlwa nguno ya nzala.

³¹Hūna ūlū ng'ūjiizūkwa ī nzīla jing'we jabūbi nī shītwa shing'we sha malofu mukwibbyeeda no, kūlwa nguno ya shibi shing'we na shītīle shing'we sh'ipelanya.

³²Natogilwe mumane gīkī ū gwenūyū natūgwītaga kūlwa nguno ying'we; alīhaya Seeba MULUNGU. Bing'we numba ya Isilaeli chaagi soni mugooke kūlwa nhūngwa jing'we!

³³Ū Seeba MULUNGU alīhaya gīkī, Ū mu lūshikū lwa kūng'weja ī shibi shing'we pyī ī shose, ī mizengo ying'we nakwīshokeja banhū hangī, nī misaka ying'we īkūzengwa būpya.

³⁴Ī sī īyo īl'itogolo idūhū lītī na shose shose īkūlīng'wa, lītizikala itogolo idūhū ū kū banhū abo bakūbītīlaga moi.

³⁵Bakwandya kwiwīla, “Ī sī yenīyī lyal'itogolo idūhū lītī na shose shose, ī haha yagaalūkile, yabizile gītī ngūnda gwa Edeni; nī mizengo īyo yalī misaka ītī na shose shose hangī makambagūkīle gike, ī haha yabeejiwe chiza, īlī na bikaji hangī īpīndīlīgije ndugu.”

³⁶Hūna a banhū abo basaagīīlile a ba mahanga ayo gamupīndije bakūdeeba gīkī ū nene SEEBA nīzengile būpya īyo yaalī yabipiwa, nī litogolo īlo lyaal'idūhū naalīhambile mo hangī. Nene SEEBA nalīhaya, na nakwīta.

³⁷Ū Seeba MULUNGU alīhaya gīkī, Nakūzunya hangī ī numba ya Isilaeli īnilombe, nane nakwīyītīla ū mhayo ūyū, a banhū babo nakūbīīta bakwīle gītī idaale lya ng'holo.

³⁸Bakūbiza gītī madaale ga ng'holo ja shitambò mu Yelusalemu mu makanza ga shigukulu īsho shihelilwe. H'ūmo īkūbizīla ī mizengo īyo yaalī īkenaagūkile, īkookala mabità ga banhū. Hūna bakūdeeba gīkī ū nene nalī Seeba.