Read Sukuma Bible 2015 – Bibilia Ilagano Lya Kale 2015 Ezekia 37 Bible Online

Ezekia 37 - Sukuma Bible 2015 – Bibilia Ilagano Lya Kale 2015 bible

Ezekia 37

¹Ū nkono go ng'wa SEEBA gwalī hamò nane, ūnifunya hanze mu nzīla ya ng'wa Moyo o ng'wa SEEBA ūūkanitūūla ha gatī gatī ya mbūga; gaalīmo maguha mingī no.

²Wandya kūniyeeja yeeja akūnoolekejaga, nakabona maguha mingī no a hasī ū mu mbūga yenīyo; naago gaalī maguha mūūmu kīngī nasho.

³Hūna ūniwīla, “Ng'wana wa munhū, a maguha genaya gadūgije kūbiza mapanga hangī?” Nane nūhaya, “Ee Seeba MULUNGU, ū gwenūyo ūgūmanile bebe dūhū.”

⁴Hūna ūniwīla, “Gahangīlage a maguha genaya ūgawīle, ‘Bing'we maguha mūūmu, gwigwagi ū mhayo go ng'wa SEEBA!

⁵Ū Seeba MULUNGU alīgawīla a maguha genaya gīkī, Nakūlagīja myūyī[25] yingīle ū mu bing'we, mubize bapanga.

⁶Nakūmutūūlīla nge jimulūnganye, na nofu nakūlagīja jiize a ha bing'we, hūna namukundīkīje n'ikūnza; hanuma namutūūlīle myūyī ū mu gatī ying'we mubize bapanga. Hūna mukūdeeba gīkī ū nene nalī SEEBA.’”

⁷Na ng'hana nūhanga gīt'ūmo nakalagīīlīlwa. Aho nalīhanga kwimanīla yabiza ho yoge, ilaka lya kūgogolong'hanya; a maguha gandya kwiyeegeela, būlī iguha kū lyichalyo.

⁸Kwimanīla aho nalolile, jilonga nge na nofu a higūlya yago, n'ikūnza lyūkundīkīja; alīyo yalī ītīmo myūyī ū mugo.

⁹Ūniwīla, “Ng'wana wa munhū hangaga, īhangīlage ī myūyī wīwīle, ‘Ū Seeba MULUNGU alīhaya gīkī, Bing'we myūyī, nzūgi kūfuma kū miyaga ya mhandī inè, bahaahīlage a bafu benaba babize bapanga.’”

¹⁰Ng'hana nūhanga gīt'ūmo akanilagīīlīla, myūyī yūbingīla būbiza bapanga, bīmīīla na magūlū gabo; ibità itaale no!

¹¹Hūna ūniwīla “Ng'wana wa munhū, a magūha genaya h'ī numba ngima ya Isilaeli. Bakahayaga, ‘A maguha gise gūūma, nū kwisagīlwa kwise kwamala kūshila; tūlī kūle no twakomanyiwa.’

¹²Alilūūlū bahangīlage ūbawīle, ‘Ū Seeba MULUNGU alīhaya gīkī, Bing'we banhū bane, nakūshikundagūla ī shigila shing'we nang'wīnje moi, namushoshe hangī ū kū sī ya Isilaeli.

¹³Ūlū nūshikundagūla ī shigila shing'we nūmufunya moi a bing'we banhū bane, hū mukūdeeba gīkī ū nene nalī SEEBA.

¹⁴Nakūmutūūlīla Moyo wane ū mu bing'we hū mukūbiza bapanga, hanuma ya henaho nakūng'wikaja hangī ū mu sī ying'we ya benekīlī. A henaho hū mukūdeeba gīkī ū nene Seeba naayombaga, hama nītaga; alīhaya Seeba.’”

¹⁵Ū mhayo go ng'wa SEEBA gūnizīīla hangī:

¹⁶Ng'wana wa munhū, solaga nang'ha ūgwandīke gīkī, “Gwa sī ya Yuda, na a Baisilaeli balī n'isangī mo.” Hanuma ūsole nang'ha gūngī ūgwandīke, “Nang'ha go ng'wa Efulaimu, sabo ya ng'wa Yosefu, nī numba ya Isilaeli ī yose īlī n'isangī nang'hwe.”

¹⁷Hūna īdimanyage būbīlī wayo, gūbize nang'ha gūmò ū mu nkono gwako.

¹⁸A banhū ba sī ya ng'wing'we ūlū būkūbūūja gīkī, “Bebe ūtūtūwīlaga būlī a makūlū ga mihayo yenīyī?”

¹⁹Bawīlage, “Ū Seeba MULUNGU alīhaya gīkī, Nakūgūsola ū nang'ha go ng'wa Yuda nagūlūnganīje nū go ng'wa Yosefu, ūyo gūlī mu nkono go ng'wa Efulaimu, ūyo na a Baisilaeli a bangī bal'isangī līmò nang'hwe; nakwīyīta gūbize nang'ha gūmò, babize ūmò ū mu nkono gwane.”

²⁰Ī milang'ha īyo wīyandīkaga īdimage wīyooleche ū kū būtongi wabo

²¹hūna ūbawīle, “Ū Seeba MULUNGU alīhaya gīkī, A banhū ba Isilaeli nakūbīnja ū kū mahanga ūko baaja; nakūbabilinga kūfuma mhandī jose nabenhe hangī mu sī yabo.

²²Nakūbīīta babize ihanga līmò ū mu sī yabo, ū mu ngūlū ja Isilaeli. A bose bakūbiza na ntemi ūmò, hama batalalekana hangī kūbiza mahanga abīlī, nūūlū kūgabanhīka kūbiza būtemi būbīlī.

²³Nīyo batikala bakwisosohajaga hangī na mashiikolile gabo ga kūlamiwa, na a mashigīmbo gabo ga malofu, nūūlū mu būhūbi wabo būngī na būngī; nguno nakūbapīja kūfuma ū mu kūshoka numa kwabo, na nakūbeeja babize banhū bane, nū nene nakūbiza Mulungu wabo.”

²⁴Ū Ntūmami wane ū Daūdi akūbiza ntemi wabo, bakūbiza na ndīīmi ūmò. Ī shilagīlo shane bakūshilondeela, na a malange gane bakūbiza na būkalalwa ū kūgadima.

²⁵Bakwikala ū mu sī īyo nakang'winha ntūmami wane Yakobo, sī īyo bikalaga babyaji bing'we. A boi bakwikala mo ilalī, na a baana babo, na a baana ba baana babo. Hūna ū Daūdi ū ntūmami wane akūbiza nsugi wabo welelo na welelo.

²⁶Nakūbeeja nabo Ilagane lya mhola, Ilagane lya welelo na welelo. Hama nakūbazenga nalyongeje nī lisaabu lyabo, nī lipandī lyane lyeela nakūlītūūla ha gatī yabo welelo bose.

²⁷Ī lipandī lyane lya kwikala līkūbiza hamò nabo; nakūbiza Mulungu wabo na a boi bakūbiza banhū bane.

²⁸A mahanga gakūdeeba gīkī ū nene SEEBA nakabeejaga a Baisilaeli, ī lipandī lyane lyeela ūlū lyūbiza ha gatī yabo welelo bose.