Read Sukuma Bible 2015 – Bibilia Ilagano Lya Kale 2015 Ezekia 38 Bible Online

Ezekia 38 - Sukuma Bible 2015 – Bibilia Ilagano Lya Kale 2015 bible

Ezekia 38

¹Ū mhayo go ng'wa SEEBA gūnizīīla hangī:

²Ng'wana wa munhū, ng'hangīlage ū Gogi ū wa sī ya Magogi, ū nsugi ntaale wa Mesheki na Tubali; hangaga

³ūlīng'wīla, Ū Seeba MULUNGU alīhaya gīkī, Nalī na wilwisha nang'ho Gogi, bebe nsugi wa Mesheki na Tubali.

⁴Nakūkūhīnjūūla hūna nakūgwashe malobo ū mu saya jako, nakūfunye nī libità lyako pyī ī lyose, nī falasa jalyo, na a badamhīji ba falasa na shilanga shabo; n'ibità itaale lībūūkije mūda nhaale na ndo, pye a bose bakūhubengaga shū jabo.

⁵Būajemi, Kushi na Puti bakūbiza hamò nabo, bose pye bakūbiza na mūda jabo na mahima ga chūma.

⁶Nī Gomeli na a mabità gayo, na Beti-togama kūfuma sukuma ya kūle na a mabità gayo pye a gose; mahanga mingī ayo galī kū lwande lwako.

⁷Malīīlaga, nīyo wikale nzūgūlūmatū ū bebe na a mabità ayo wibilingīlile; hama wikale ūgalang'hanile.

⁸Hanuma ya shikū ningī ūkūlagījiwa kūdima shilanga; kū myaka ya kū būtongi ūkūja kūdumīla sī īyo yapīlile kūfuma mu būlūgū, sī īyo banhū bayo baabibilingilwe kūfuma mu mahanga mingī, biza kū ngūlū ja Isilaeli ījo jalī jalekwa dalali ikanza ilīhu. A banhū benabo benhilwe kūfuma kū mahanga, ī haha pye a bose bakwikalaga mu mhola.

⁹Ū bebe na a mabità gako, na mahanga mingī gakūbiza hamò nang'ho, mukūlinha mujile mukūfeefenyaga gītī nyaga ntaale; ī sī mukwīkundīkīja gītī ilunde.

¹⁰Ū Seeba MULUNGU alīhaya gīkī, Ū mu lūshikū lwenūlo gakūkwizīīla maganiko ū mu ng'holò yako, hūnū ūkūhela mhayo mi.

¹¹Ūkwiwīla, “Nakūjūsakamīla sī ya magūngūli gatapīndīlījiwe ndugu; nadumīle banhū abo batī na sha kūbibakīja, pye batī na magoobe ga mibita, nūūlū batī na būgong'ho bo kūpagīgīja.

¹²Nakūja nakūsolaga shikolo na kūbataaja bo nguzu, ū nkono gwane nakūgūgalūkīja ū kū misaka īyo yapandīkile mo bikaji haha, banhū abo bizile kūfuma kū mahanga, bizile kwikala ha gatī ya sī bibilinga henaho; basabi ba mitugo nī shikolo ī shingī.”

¹³A bana Sheba na Dedani na a basūlūja ba Talishishi na a magūngūli gaamo pye a gose bakūkūwīla, “Wizile kūsola shikolo bo nguzu? Wabilingile mabità gako kwiza kūtaaja shikolo, kūbūūcha feza na zahabu, kūjaana mitugo na sabo jingī, na kūdima shikolo shingī bo nguzu?”

¹⁴Hūna lūūlū ng'wana wa munhū, hangaga ūng'wīle ū Gogi, Ū Seeba MULUNGU alīhaya gīkī, “Ū lūshikū lwa banhū bane a Baisilaeli kwandya kwikala mu mhola, ūtūbabyūlīla miso?

¹⁵Ūkwiza kūfuma ū kū wikalo wako, ī sukuma ya kūle; na mahanga gangī mingī gakūbiza galī hamò nang'ho, pye badamhīji ba falasa. Līkūbiza ibità itaale na lya nguzu ningī.”

¹⁶Ū bebe Gogi ūkūbahoolekela a banhū bane a Baisilaeli, ūbize gīt'ilunde kūkundīkīja sī. Ū mu shikū ja kū būtongi, nakūkwenha wize kwīdumīla ī sī yane, a mahanga ganideebe kūlwa kūboolecha ū wela bone mu nzīla yako, nago galībona.

¹⁷Ū Seeba MULUNGU alīhaya gīkī, Ūtī bebe ūyo naakūhaya kwīngīīla shikū ja kale mu nzīla ya batūmami bane a bahangi ba Isilaeli? Ū ng'wikanza lyenīlo baahanga no myaka na myaka, gīkī nakwizūkwenha ūbadumīle.

¹⁸Ū mu lūshikū lwa kwīdumīla ī sī ya Isilaeli ū Gogi, ū būpelanu bone būkūbaka gītī moto; alīhaya Seeba MULUNGU.

¹⁹Nguno nalīhaya mu būpelanu bo wilu bone gīkī, ū ng'wikanza lyenīlo kūkūbiza ho kūtingina kūtaale ū mu sī ya Isilaeli.

²⁰Ī ndīlo ja mu nyanza nī noni ja kūlala, pyī nī shiinū ja mu masaka; nī shiseeng'wa pyī īsho shikayeelaga higūlya ya sī, na a banhū pye abo balī mu sī bakūdetema ū kū būtongi wane. Ī ngūlū jikūsalingūlwa, na a mang'ong'ho gakūsambaajiwa, na būlī ndugu īkūgwa hasī.

²¹Nakūsamīlīja būlūgū kūlwa ng'wa Gogi būlī kwene ū kū ngūlū jane, alīhaya Seeba MULUNGU; pye bakwiyūbūkīla, būlī munhū na g'wiye.

²²Nakūngwisīja nsango ū wei na a mabità gakwe, na a mahanga pye ayo galī hamò nang'hwe; nsango gwa mabūsaatu n'icha, nakūng'wenhela na mbula nhaale ya malambo, na ya mawe, na moto gwa kūbaka na būgota wa shibiliti.

²³Ū mu gīko nakūbūkumūcha ū būtaale bone, nū wela bone, nakwiyoolecha hape kū būtongi bo mahanga mingī. Hūna bakūdeeba gīkī ū nene nalī SEEBA.