Read Sukuma Bible 2015 – Bibilia Ilagano Lya Kale 2015 Ezekia 4 Bible Online

Ezekia 4 - Sukuma Bible 2015 – Bibilia Ilagano Lya Kale 2015 bible

Ezekia 4

¹Hūna lūūlū ū bebe ng'wana wa munhū, solaga idafaali ūlītūūle ha būtongi wako; oole a higūlya yalyo shiikolile sha nzengo gwa Yelusalemu.

²Hanuma ya henaho ūgūpīndīlīje ngītīli, ūtūūle n'itūūgo lya malongo lya kūlinha kwingīla moi; ūgūzengeele na ng'hambī ja kūgūtingata, hūna ūgūpīndīlīje makīgo ga mantī ga kūkambagūlīla ndugu.

³Ūsole n'ibbaadi, ūlītūūle lyīmīīle lībize gītī ndugu ya chūma a ha gatī yako nū nzengo, hūna ūgalūke ūgūlolele. Ū nzengo gwenūyo gūkūpīndīlījiwa mu gīko; ū bebe hū ūkūboolecha ū būpīndīlījiwa wenūbo. Ī shenīshi hū shikūbiza shimanīkījo ū kū numba ya Isilaeli.

⁴Hanuma ūkūlaala kabazu, kū nkono gwako gwa lūmoso, ūshibūūche mu mīlī gwako ī shibi sha numba ya Isilaeli. Ūkūshibūūcha ī shibi shabo ū ng'wikanza lya shikū ījo ūkūlaala kabazu.

⁵Naakūhelelaga ī lisaabu lya shikū kūlenganīla nī myaka ya shibi shabo. Hūna lūūlū ī shibi sha numba ya Isilaeli ūkūshibūūcha ikanza lya shikū magana adatū na makūmi kenda.

⁶Ūlū ūmala ī gīko, ūkūlaala hangī, lelo kū nkono gwako gwa būlyo; ūshibūūche ī shibi sha numba ya banhū ba Yuda. Naakūhelelaga shikū makūmi anè, būlī ng'waka lūshikū lūgima.

⁷Hūna ūkūgalūka ūlolele ūko gūlī ū nzengo ūyo gūlīpīndīlījiwa ūgūhangīle mayanga, ū nkono gwako gūlī ng'waaje.

⁸Nakūkūtunga ngoye ūlemeelwe ū kūgalūka kū lwandī ūlū nūūlū ūlū, kūshisha ūjishikaanyī ī shikū ja kūpīndīlījiwa kwa nzengo.

⁹“Ūkūsola ngano na būsīga, mahalage na nduulu, būbele na būlegi ūshitūūle ng'wibīkīlo līmò; ūyūbeeja ngatī gwa kūyūlya ū bebe. Ūkūyūlya ū mu shikū ja kūlaala kabazu, ījo magana adatū na mkūmi kenda (390).

¹⁰Ī shilīwa ūkūyūlya bo kūshigeleka; gulamu magana abīlī na makūmi adatū būlī lūshikū. Nīyo ūkūyūlya ng'wikanza ilebe dūhū īlo līhelilwe.

¹¹Na a minzī ūkūyigelekela, shikombe shibīlī, ga kūng'wa ng'wikanza ilebe dūhū īlo līhelilwe.

¹²Ī shilīwa ūkūyūshilya ūmo ngatī gwa būsīga gūkalīīlagwa; ūgoocha balolile a banhū ha shipembo sha maashi mūūmu ga banhū.”

¹³Ū SEEBA ūhaya, “A Baisilaeli bakūyūlya shilīwa shisoso gīko ū kū mahanga ūko nakūbatwala.”

¹⁴Alīyo nūhaya, “Seeba MULUNGU, ītī gīko! Ū nene nataalī kwisosohaja na kamò yaya, kwīngīīla kū būdinha bone kūshisha lelo īyī nataalī kūlya shikolo sha kūkūga shichiile shoi dūhū, nūūlū sha kūbūlagwa mashiinū ga mu masaka. Nyama nsoso yose yose ītaalī kwingīla mu nomo gwane.”

¹⁵Ūhaya, “Nahene watūngīlīja, nakūkūzunīlīja ūyoocha ū ngatī gwako ha ndeelya ja ng'ombe, yaya a ha maashi ga banhū.”

¹⁶Hūna ūniwīla, “Ng'wana wa munhū, nakūshigehya no ī shilīwa ū mu nzengo gwa Yelusalemu. A banhū bakūyūzwangana no kūlwa kūlya shilīwa sha kūgelekwa, na a minzī bakūyūng'wa ga kwigelekela mu kūzwangana kūtaale.

¹⁷Nguno ī shilīwa na a minzī shikūlamba no, bakūyilola baayūdedebala; shibi shabo shikūbenheleja kūganda bagongoje.”