Read Sukuma Bible 2015 – Bibilia Ilagano Lya Kale 2015 Ezekia 41 Bible Online

Ezekia 41 - Sukuma Bible 2015 – Bibilia Ilagano Lya Kale 2015 bible

Ezekia 41

¹Hūna ūnitwala ū mu chumba sh'ipandī lyeela ī sha ha būshikīlo, būlī lwande shalī na ndugu jizengilwe gītī ng'hīngī, ūjipima; ū būgalī galī wajo būbiza miita idatū.

²A ha kwingīlīla haalī na būgalī galī bo miita itanò; būlī lwande jalīho ndugu ja kūkīngītīīla ja būgalī galī bo miita ibīlī na nusu. Hūna nī shoi ī chumba sh'ipandī lyeela ī sha ha būshikīlo ūshipima; shalī na būlīhu bo miita makūmi abīlī, ū būgalī galī miita ikūmi.

³Hanuma wingīla nū mu chumba sh'ipandī lyeela ī sha mu gatī, ū mu nzīla ya kwingīlīla jalīho ndugu ja nyakīngī jīkīngile ha gatī; ūjipima; būlī yene yalī na būgalī galī bo miita īmò. Ī nzīla ya kwingīlīla yalī na būgalī galī bo miita idatū, būlī lwande yalīho ndugu ya kūkīngītīīla, ya būgalī galī bo miita idatū na nusu.

⁴Ī chumba sh'ipandī lyeela ī sha mu gatī ūshipima ū būlīhu washo, shalī na miita ikūmi, ū būgalī galī washo ū kū lwandī ūlo lwikuumije na chumba sh'ipandī lyeela ī lya ha būshikīlo walī miita ikūmi. Hūna ūniwīla, “Ī lyenīlī h'ī Lipandī Lyeela no no no.”

⁵Hanuma wīpima nī ndugu ya hekalu, yalī na būgīnu bo miita idatū; na būlī chumba sha mu kabazu ū mu hekalu shalī na shipimo sha būgalī galī wa miita ibīlī.

⁶Ī chumba sha mu mhelo mhelo shalī shihelilwe mu misafa idatū ya wilondeele kūja igūlya, nsafa gūmò higūlya ya gūngī; būlī nsafa chumba makūmi adatū. Gaalīho makīngītīīlīlo gīpīndīlīgije pyī ī ndugu ya hekalu, ī chumba sha mu mhelo mhelo shūzengwa henaho shūdaama, shitadaamiwe na ndugu ya hekalu.

⁷Pyī ī chumba sha mu mhelo mhelo ya hekalu ī sha mu nsafa gwa higūlya ya ng'wichaago shalī shigalī. Ī hekalu yaalī īzengilwe mu mbika ya kūzunīlīja kūgalīha ūlū īlīlīīha kūja igūlya. Nose ū munhū ūlū alīlinha kūja igūlya nī chumba shajaga shikūgalīhaga. Yalīho ngaji īfumile a ha nsafa gwa hasī, yūlinha ījile kū nsafa gwa kwigūlya kūbītīla mu nsafa gwa ha gatī.

⁸Nūbona gīkī ī hekalu yalī īzengilwe ha nsingi gwa būgūngūhu bo miita idatū, ūyo gwalī nsingi nū kū chumba sha mu mhelo mhelo ya hekalu.

⁹Ī ndugu ja hanze ya chumba sha mu mhelo mhelo jalī na būgīnu bo miita ibīlī na nusu. Ibbaala lyape lītī na shose shose lyalīho ū kwīnga a ha chumba sha mu mhelo mhelo ya hekalu

¹⁰kwiza a ha chumba sha bagabīji; ū būgalī galī walyo walī miita ikūmi kwīpīndīlīja pyī ī hekalu.

¹¹Yalīho milyango ya kūfuma ū mu chumba sha mu mhelo mhelo ya hekalu, kwiza a h'ibbaala īlo lītī na shose shose lyenīlo; gūmò gwalī kū lwande lo sukuma, gūngī lwande lo dakama. Nsingi ngūngūhu gwa būgalī galī bo miita ibīlī na nusu gwalī gwīpīndije pyī ī hekalu, gūūkagelela a h'ibbaala īlo lītī na shose shose.

¹²Ū lwande lo ng'weli yalīho numba yilolile nī gwalugwa ya ha hekalu, ū būlīhu wayo walī miita makūmi anè n'itanò, ū būgalī galī miita makūmi adatū n'itanò; ī ndugu yayo yalī na būgīnu bo miita ibīlī na nusu pyī ī yose.

¹³Hūna wīpima ī hekalu, yūbiza na būlīhu bo miita makūmi atanò; nī gwalugwa ya hekalu nī numba ī yīngī nī ndugu jayo, nasho shaalī na būlīhu bo miita makūmi atanò.

¹⁴Ū būgalī galī bo gwalugwa ya hekalu ū kū lwande lwa kīya, kūsanja nū bo hekalu ū kū būtongi wayo, boolī miita makūmi atanò.

¹⁵Hūna ūbūpima nū būlīhu bo numba īyo yalī yilolile na gwalugwa ya kū numa ya hekalu; yalī na miita makūmi atanò, ū kūgasanja na a mabīndo gayo. Ī lipandī lyeela ī lya ha būshikīlo, nī lipandī lyeela ī lya mu gatī, nī libīndo īlo liilolile na gwalugwa,

¹⁶nī shisho shalīho hose hose a ha shidatū shenīshi, gītī, wingīlīlo bo ha nyango, madilisha a mado mado, na a mabīndo gasho; pyī ī shose shenīshi kwandīja ha nyango kūja kū būtongi, shalī shikundīkīgije būlenji bo mbawa. A hasī jalīho mbawa, nū mu ndugu kūshika mu madilisha, na a madilisha menekīlī gaalī gakundīkīgije būlenji.

¹⁷A ha ng'wanya gwa higūlya ī hanze ya nyango gwa kūja ng'wipandī lyeelya lya mu gatī, na a ha ndugu pyī ī jose ū ng'wipandī lyeela lya mu gatī nī lya ha būshikīlo,

¹⁸walī boolilwe hoi būlenji bo makelubi na mitī ya nhende. Ī mitī ya nhende yalī yitobanīgije na a makelubi, būlī ikelubi lyalī na būshū būbīlī,

¹⁹būshū bo munhū būlolelile kwikelubi lya lwandī ūlū, na būshū bo shimba ū kwikelubi ī līngī. Gaalī goolilwe pye a hose ū mu hekalu.

²⁰Ī ndugu ya ngw'ipandī lyeela ī lya ha būshikīlo yaalī yoolilwe makelubi na mitī ya nhende, kwandīja hasī kūja kwigūlya kūshisha kū ng'wanya gwa higūlya ya nyango.

²¹Ū būlīhu nū būgalī galī bo felemu ya ha nyango gwa h'ipandī lyeela ī lya ha būshikīlo boolī būtikīlile; h'ūmo yalī ībeegegije nī ya kū būtongi w'ipandī lyeela no no no.

²²Gwalīho ng'walīlò gwa mantī gwa būgūngūhu bo miita īmò na nusu, ū būgalī galī nū būlīhu wago boolī būlenganīlile, miita īmò īmò. Ī ng'ongo jago jalī ja mitī nī ligaasījo lyago, nū mu kabazu. Ū munhū ng'wenūyo ūniwīla, “Ī yenīyī h'ī meeza īyo īkikalaga kū būtongi bo ng'wa SEEBA.”

²³Ī lipandī lyeela ī lya ha būshikīlo nī lipandī lyeela no no no, a gose gaalī na milyango migalī ya kwigela milyango ībīlī.

²⁴Ī yose būbīlī wayo yaalī na malugalīlo abīlī, būlī nyango na malugalīlo gago abīlī.

²⁵A malugalīlo ga ha nyango gwa h'ipandī lyeela ī lya ha būshikīlo gaalī goolilwe būlenji bo makelubi na mitī ya nhende, gīt'īyo yalī yoolilwe ha ndugu; hama a ha būtongi a higūlya y'ibīndo lyalī līnungelejiwe hoi līntī.

²⁶Ī ndugu j'ibīndo ī ja mu kabazu jalī na madilisha mado mado goolilwe būlenji bo mitī ya nhende būlī lwande. Na a ha chumba sha mu mhelo mhelo ya hekalu gaalī ganungelejiwe a mantī.