Read Sukuma Bible 2015 – Bibilia Ilagano Lya Kale 2015 Ezekia 43 Bible Online

Ezekia 43 - Sukuma Bible 2015 – Bibilia Ilagano Lya Kale 2015 bible

Ezekia 43

¹Hūna ū munhū ng'wenūyo ūnenha kū mita ūyo gwalī gūlolelile kīya.

²Nūlībona ī likūjo lya ng'wa Mulungu wa Isilaeli līliza kūfumīīla mu kīya. Ī lilaka lyakwe lyalī gītī ng'huutumo gwa minzī mingī gakūhūūmaga; ī sī yang'wekaga kūlwa nguno y'ikūjo lyakwe.

³Ū koolechiwa ūko nakakūbona kwalī gīt'ū koolechiwa ūyo naalī naagūbona aho akiza kūgūkenaagūla ū nzengo; gītī ī shakoolechiwa īsho naalī nashibona kū Mongo gwa Kebali, nūgwa hasī nabundaalile.

⁴Ī likūjo lya ng'wa SEEBA lingīla ū mu hekalu, lyūbītīla ha mita ūyo gūlolelile kīya.

⁵Hūna ū Moyo o ng'wa Seeba ūnibūūcha ūnenha mu gwalugwa ya mu gatī, ī likūjo lya ng'wa Seeba lyokala pa ū mu hekalu.

⁶Ū munhū ng'wenūyo aho ataalī īmīīlile hamò nū nene, kwimanīla nigwa ilaka lya munhū līlīniyombya kūfuma ū mu hekalu.

⁷Ūniwīla, “Ng'wana wa munhū, ī lipandī lyenīlī h'ī lisumbī lyane lya būtemi, hama hū būtūūlo bo mhamabala jane. H'ī lipandī īlo nakwikala mo nalī hamò nabo a Baisilaeli. A ba numba ya Isilaeli batalalīsosohaja hangī ī lina lyane lyeela mu nzīla ya būmalahya wabo; a boi benekīlī nūūlū a batemi babo, batalagatūmamīla hangī a mapandī gabo ga higūlya, nūūlū ī shiikolile sha kūlamiwa sha batemi babo.

⁸Aho baagwiheja ū nyango gwabo nū gwane, ī ng'hīngī ja ha nyango gwabo jūtandaala nī jane, shūlekanyiwa ndugu dūhū; bakalīsosohaja ī lina lyane na mashītīle gabo ga malofu. H'ī chene nakabakenaagūla kūlwa kūnipelanya.

⁹Ī haha lūūlū ni bawīnjage ū būmalahya wabo ū kū būtongi wane, pyī nī shiikolile sha kūlamiwa sha batemi babo, a henaho hū nakwikala hamò nabo welelo bose.”

¹⁰Bebe ng'wana wa munhū, a banhū ba Isilaeli basomboolelage ūmo īlī ī hekalu, bagooke kūlwa shibi shabo. Ni bīyiganikage ūmo īlī;

¹¹ūlū būgooka kūlwa yose īyo bīyīta, ūkūbalanja ī hekalu ūmò īlī; ūmo īhelelilwe, nī milyango yayo ya kūfumīla na kwingīlīla; pye ūmo īlī gete na a kaīle kaamo nī shilagīlo. Ī mihayo yenīyī yandīkage mu būtongi wabo balolile, bīdiime ūmo īlī gete, bayūlondeela akaīle kaamo.

¹²Alilūūlū, ī shilagīlo sha hekalu shiishi: Pyī ī libbaala lya higūlya ya lūgūlū īlo lyīpīndīlīgije ī hekalu līkūbiza lyeela no no no. Ī shenīsho h'ī shilagīlo sha hekalu.

¹³Īshi h'ī shipimo sha ng'walīlò, mu kapimīle ako kaatūmamīlagwa makanza genayo. Ī shidako būgūngūhu wa nusu miita nū būshimu nusu miita, a higūlya kabize ho kakīgījo ka sentimiita makūmi abīlī n'ibīlī. Ū wenūbū hū ū būgūngūhu wago ū ng'walīlò.

¹⁴Miita īmò ū kwīnga a hasī a higūlya ya ngoka kwiza h'ikīgījo lya ha sīlīlī, ū būgalī galī nusu miita. Ū kwīnga a h'ikīgījo ī lido kwiza h'ikīgījo ī litaale miita ibīlī, ū būgalī galī nusu miita.

¹⁵Ī lipandī lya ng'walīlò a ha kūpembela moto gwa shitambò līkūbiza na būgūngūhu bo miita ibīlī, na gūkūbiza na mapembe anè gasongile kūja igūlya kwīnga a ha bookejo bo shitambò.

¹⁶A higūlya ya ng'walīlò a ha kūpembela moto gwa shitambò hakūbiza na shipimo sha miita itandatū ū būlīhu nū būgalī galī miita itandatū.

¹⁷Ī likīgījo lya higūlya nalyo līkūbiza na shipimo sha būlenganīle, ū būlīhū miitī mpungatī nū būgalī galī miitī mpungatī, na lūgala lo sentimiita makūmi abīlī n'itanò kūlīpīndīlīja ī lyose. Ī ngaji ja kūlinhīla a ha ng'walīlo jikūbiza kū lwandī lwa kīya.

¹⁸Hūna ūniwīla, “Ng'wana wa munhū, ū Seeba MULUNGU alīhaya gīkī, Aka h'a kaīle ka kafunīje ka shitambò sha kūpemvwa na kūseeseebela mininga ha ng'walīlo ūlū gūlazengwe.

¹⁹A bagabīji ba lūganda lo Lawī, a balekwa Sadoki, abo bakegeelaga kū būtongi bone kūnitūmamīla, ūkūbinha nzagamba songi ya kūfunya shitambò kūlwa shibi; alīhaya Seeba MULUNGU.

²⁰Ūkūsola mininga gayo gamò ūgabile a ha mapembe ja ng'walīlo būnè waago, na a higūlya ya mhembeelo j'ikīgījo būnè wajo, nū lūgala ū lose; ū mu gīko ūkūgweja ū ng'walīlo na kūgūbeegeja isangī.

²¹Hūna ī nzagamba ya shitambò sha kweja shibi ūkwīsola ūkīpembe mu moto kwipandī īlo līsolilwe, hanze y'ipandī lyeela.”

²²A ha ntondo yaho ūkūfunya ngulyati songi ītī na shilingo, ībize shitambò sha kweja shibi, nū ng'walīlo gūkwejiwa gīt'ūmo gūleegejiwe mu nzīla ya nzagamba.

²³Ūlū ūmala ū kūgweja, ūkūsola nzagamba songi na ng'ondi kwīnga ū ng'widaale ūjifunye, ī jose jitī na shilingo.

²⁴Ūkūjitūūla kū būtongi bo ng'wa SEEBA, hūna a bagabīji bakūjimemeleja munhu, hanuma bajifunye kūbiza shitambò sha kūpemvwa kū būtongi bo ng'wa SEEBA.

²⁵Ng'wikanza lya shikū mpungatī, būlī lūshikū ūkūfunya ng'hulyati ya mbūli kūlwa shitambò sha kweja shibi, ūkūfunya na nzagamba songi na ng'ondi kūfuma ng'widaale, ī jose jitī na shilingo.

²⁶Jikūbīta shikū mpungatī bakūgwejaga ū ng'walīlo, kūlwa kūgūbeegeje isangī; h'ūmò bakūgūkomanīja kūlwa nīmo go ng'wa SEEBA.

²⁷Ī shikū mpungatī ūlū jūshika, ū kwandīja lūshikū lwa kanaane na kūja kū būtongi, a bagabīji bakūshifunya a ha ng'walīlo ī shitambò shing'we sha kūpemvwa nī sha būsangī.[28] Nane nakūng'wanukūla; alīhaya Seeba MULUNGU.