Read Sukuma Bible 2015 – Bibilia Ilagano Lya Kale 2015 Ezekia 45 Bible Online

Ezekia 45 - Sukuma Bible 2015 – Bibilia Ilagano Lya Kale 2015 bible

Ezekia 45

¹Ūlū mulīyītūlīgīja mbale ī sī kūlwa kūgaba wingīji, mukūsola ibudīka ly'ibbaala mumfunīje SEEBA ībize sī neela; ū būlīhu walyo līkūbiza kilomiita ikūmi n'ibīlī na nusu, ū būgalī galī kilomiita ikūmi; ī libbaala lyenīlo līkūbiza lyeela pyī ī lyose.

²Ū ng'wibbala lyenīlo sī ya būlīhu bo miita magana abīlī na makūmi atanò nū būgalī galī būlī gīko īkūbiza y'ipandī lyeela; īkūpīndīlījiwa na sī ītī na shikolo, ya būgalī galī bo miita makūmi abīlī n'itanò.

³Ū mu sī neela ūkūpima ibbaala lya būlīhu bo kilomiita ikūmi n'ibīlī na nusu, būgalī galī kilomiita itanò. Ū ng'wenūmo h'ūmo līkūbiza ī lipandī lyeela, īlo līlī lyeela no no no.

⁴Ī lyenīlo ibbaala lya sī neela kūlwa bagabīji, a batūmami ba ng'wipandī lyeela, abo bakeegeelaga kūlī SEEBA kūtūmama kū būtongi bokwe. Līkūbiza ibbaala lya kūzenga ho numba jabo, na līkūbiza ipandī lyeela kūlwa hekalu.[30]

⁵Ibbaala lya būlīhu bo kilomiita ikūmi n'ibīlī na nusu na būgalī galī bo kilomiita itanò līkūbiza lya Balawī, abo bakatūmamaga mu hekalu; līkūbiza sabo yabo kūlwa mizengo yabo ya kwikala.

⁶Ū nzengo ūkūgwinha sī yaago, ya būgalī galī bo kilomiita ibīlī na nusu, na būlīhu bo kilomiita ikūmi n'ibīlī na nusu, ībīmbīkanwe nī libbaala lya sī neela; ī yenīyo sabo ya banhū bose ba numba ya Isilaeli.

⁷Ū nsugi akūbiza na sī yakwe; ī libbaala lya kū lwande lwa sī neela nī lya kū lwande lwa sī ya nzengo līkūbiza lyakwe. Ū kū lwande lo ng'weli līkūlola ng'weli, nū kū lwande lo kīya lyūlola kīya; ū mu būlīhu līhu walyo līkūfuma kū lūbīmbī lo ng'weli lyūshika kū lūbīmbī lo kīya; lyūja lihelile n'īmò ya sī ījo jigabilwe kū ng'anda ja Isilaeli.

⁸Ī sī yenīyī īkūbiza sabo yakwe ū mu Isilaeli, hūna lūūlū a basugi bane batūbiza na nguno ya kūbiboneela a banhū bane, alīyo bakūzunya ī sī īgabanhyiwe ū kū banhū ba numba ya Isilaeli kūlenganīla na kwihela kwa ng'anda jabo.

⁹Ū Seeba MULUNGU alīhaya gīkī, Bing'we basugi ba Isilaeli ng'wigegije lūūlū! Lekanagi nabo ū būluhya nū wiboneeji, ng'wandye kwīta mu būdeeba na būtūngīlīja. Oyagi ū kūbasaamya a banhū bane; alīhaya Seeba MULUNGU.

¹⁰Tūmamīlagi shipimo shitūngīlīgije, ī gapani ītūngīlīje nī shibabà shibize sha būtūngīlīja.

¹¹Ī efa[31] nī baat[32] shibize na shipimo sha mpango gūmò; ī baat īlī na īmò y'ikūmi ya homeli, nī efa īlī na īmò y'ikūmi ya homeli; ī homeli h'ībize ngelekelo ya kūlenganīgīja.

¹²Ī shekeli īmò īkūbiza na geela makūmi abīlī, ī miina īmò shekeli makūmi atandatū.[33]

¹³Ī shakwinha īsho mukūyūfunya shiishi, shikūbiza īmò ya ng'witandatū ya efa ū mu homeli īmò ya ngano, na īmò ya ng'witandatū ya efa ū mu homeli īmò ya būsīga.

¹⁴Ū ngabo gwa maguta ūyo gūtūūlilwe ho gūkūgelekwa mu ngelekelo ya baat, gūlī īmò ya ng'wikūmi ya baat kūfuma mu būlī koli (ī koli ītikīlile na homeli īmò; būlī yene īlī na baat ikūmi).

¹⁵Na ng'holo īmò īkūsolwa kūfuma mu būlī idaale lya ng'holo magana abīlī, ū mu ng'holo ja kū madīīmīlo ga maswa mafulumu ga mu sī ya Isilaeli. Ī shenīshi shikūbiza kūlwa kūfunya shitambò sha būsu, shitambò sha kūpemvwa, na shitambò sha būsangī; kūlwa kūbabeegeja isangī a banhū, alīhaya Seeba MULUNGU.

¹⁶Pye a banhū ba sī bakūsangīla ū mu kūshifunya ī shakwinha shenīshi kūlwa shitūmamīlo sha nsugi wa sī ya Isilaeli.

¹⁷Gūkūbiza nīmo gwa nsugi ū kūfunya shitambò sha kūpemvwa, nī shitambò sha būsu nī shitambò sha kūng'wiwa, ū mu makanza ga shigukulu, mu shikū ja Ng'weji Mpya, nū mu shikū ja sabato, ū mu shigukulu shose īsho shitūūlilwe ho kūlwa numba ya Isilaeli. Akūshifunya ī shitambò sha kweja shibi, nī sha būsu, nī sha kūpemvwa, nī shitambò sha būsangī kūlwa kwībeegeja isangī ī numba ya Isilaeli.

¹⁸Ū Seeba MULUNGU alīhaya gīkī, Ū mu lūshikū lwa kwandya lwa ng'weji gwa kwandya ūkūsola nzagamba songi ītī na shilingo, ūlyeeje ī lipandī lyeela.

¹⁹Ū ngabīji akūsola mininga gamò a ga shitambò sha kweja shibi, ūbilīja a ha mitī ya mu kabazu ī ya ha nyango gwa hekalu; na a ha mhembeelo ja h'ikīgījo lya higūlya a ha ng'walīlo, na a ha ng'hīngī ja ha mita go gwalugwa ya mu gatī.

²⁰Nū mu lūshikū lwa mpungatī lwa ng'weji ūkwīta gīko, kūlwa munhū ose ose ūyo wīta shibi mu kūhūbīla nūūlū mu būtūmana; hūna lūūlū ū mu gīko ūkwītūūlīla isangī ī hekalu.

²¹Ū mu lūshikū lw'ikūmi n'inè lwa ng'weji gwa kwandya mukūbiza na Pasaka, shigukulu sha kūshinga ikanza lya shikū mpungatī. Ū ng'wikanza lyenīlo mukūlya migatī ītabeegije mu būtūsanjiwa shibimbya.

²²Ū mu lūshikū lwenūlo ū nsugi akūfunya nzagamba ya ng'ombe, kūlwa kweja shibi shakwe nī sha banhū ba sī yakwe.

²³Hama ū mu shikū mpungatī ī ja shigukulu, būlī lūshikū akūfunya nzagamba mpungatī na ng'ondi mpungatī jitī na shilingo, jibize shitambò sha kūpemvwa kūlwa ng'wa SEEBA, na ngulyati ya mbūli kūlwa shitambò sha kweja shibi.

²⁴Akūfunya na efa ya shitambò sha būsu kū būlī nzagamba ya ng'ombe, efa kū būlī ng'ondi ya ng'holo, hamò na hini[34] īmò ya maguta kū būlī efa.

²⁵Nū mu shikū mpungatī ī ja shigukulu īsho shikandyaga ha lūshikū lw'ikūmi n'itanò ng'weji gwa mpungatī, akūfunya ī shitambò sha kweja shibi, nī shitambò sha kūpemvwa, nī shitambò sha būsu, na a masazu.