Read Sukuma Bible 2015 – Bibilia Ilagano Lya Kale 2015 Ezekia 46 Bible Online

Ezekia 46 - Sukuma Bible 2015 – Bibilia Ilagano Lya Kale 2015 bible

Ezekia 46

¹Ū Seeba MULUNGU alīhaya gīkī, Ū mita go gwalugwa ya mu gatī ūyo gūlolelile kīya gūkūlugalwa pyī ī shikū ja milīmo ī j'itandatū. Alīyo ū mu lūshikū lo sabato nū mu shikū ja shigukulu sha Ng'weji Mpya, gūkūlugūlwa.

²Ū nsugi akwingīla kūbītīla ng'wibīndo lya ha mita, ūūkīmīīla ha ng'hīngī ya ha mita. Hūna a bagabīji būfunya ī shitambò shakwe sha kūpemvwa nī shitambò sha būsangī. Ū wei akūlamīja a haho wingīlīlo bo ha mita, hūna ūfuma ūja; kwike ū mita gūtūlugalwa kūshisha mhīndī.

³Ū mu shikū ja sabato nī ja Ng'weji Mpya a banhū ba sī bakūyūnamīja ū SEEBA a ha nyango gwa mita gwenūyū.

⁴Ī shitambò sha kūpemvwa īsho nsugi akwenha kūlwa ng'wa SEEBA ū mu shikū ja sabato, shikūbiza baana ba ng'holo batandatū na ng'ondi īmò, pyī jitī na shilingo.

⁵Ī shitambò sha būsu īsho akūshifunya hamò nī ng'ondi īkūbiza ngele ya efa īmò; alīyo ī shitambò sha būsu īsho akūshifunya hamò na a baana ba ng'holo, ī shene ūmo alatogelwe wei ng'wenekīlī, hamò na hini ya maguta kū būlī efa īmò.

⁶Ū mu lūshikū lwa Ng'weji Mpya, akūfunya nzagamba songi, baana ba ng'holo batandatū, na ng'ondi īmò, pyī jitī na shilingo.

⁷Ī nzagamba akwīfunya hamò na efa īmò ya shitambò sha būsu; nī ng'ondi akwīfunya hamò na efa īmò ya shitambò sha būsu, alīyo ī shitambò sha būsu ī sha kūfunya hamò na a baana ba ng'holò, ī shene ūmo alatogelwe wei ng'wenekīlī, hamò na hini ya maguta kū būlī efa īmò.

⁸Ū nsugi ūlū alingīla akūbītīla ng'wibīndo lya ha mita, nū kūfuma akūtūmamīla nzīla yenīyo.

⁹A banhū ba sī ūlū baliza kū būtongi bo ng'wa SEEBA ū kū shigukulu īsho shihelilwe, būlī ng'wene ūyo aliza kūlamya ūlū wingīlīla kū mita go sukuma, akūfumīla mita go dakama; ūyo wingīlīla mita go dakama akūfumīla mita go kū sukuma. Munhū ose ose atizūfumīla mita ūyo wingīlīlaga, alīyo būlī ng'wene akūfumīla mita ūyo gūlī kū būtongi bokwe ūlū alingīla.

¹⁰Hūna nū nsugi akwisangīja nabo a banhū, ingīle hamò nabo ū ng'wikanza lya kwingīla, na afume hamò nabo ūlū balīfuma hanze.

¹¹Ū mu shikū ja shigukulu, ī nzagamba īkūfunyiwa hamò na efa īmò ya shitambò sha būsu, nī ng'ondi īkūfunyiwa hamò na efa īmò ya shitambò sha būsu, alīyo ī shitambò sha būsu ī sha kūfunya hamò na a baana ba ng'holò, ī shene ūmo alatogelwe būlī ng'wene, hamò na hini ya maguta kū būlī efa īmò.

¹²Ū nsugi ūlū alīmfunīja SEEBA shitambò sha wiyaabī; shibize shitambò sha kūpemvwa nūūlū shitambò sha būsangī, akūlugūlīlwa ū mita gwa kīya. Ī shitambò shakwe sha kūpemvwa nūūlū ī shitambò sha būsangī akūshifunya gīt'ūmo akīītīlaga mu shikū ja sabato. Ūlū ūmala akūfuma hanze, hūn'ū mita gūlugalwa.

¹³Būlī lūshikū ī dilū ūkūmfunīja ū SEEBA ng'wana wa ng'holo kūlwa shitambò sha kūpemvwa; ng'wana wa ng'holo o ng'waka gūmò ūyo atī na shilingo.

¹⁴Hama būlī lūshikū ī dilū ūlū ūlīfunya ū ng'wana wa ng'holo, ūkūfunya na shitambò sha būsu, īmò ya ng'witandatū ya efa; na maguta ga kūbūdotya ū būsu, īmò ya ng'widatū ya hini. Ī shilagīlo sha kūmfunīja SEEBA ī shitambò sha būsu shenīshi shilī sha būja na būja.

¹⁵Hūna lūūlū, ū ng'wana wa ng'holo nī shitambò sha būsu na a maguta, shikūfunyiwa būlī lūshikū ī dilū, kūbiza shitambò sha kūpemvwa sha būja na būja.

¹⁶Ū Seeba MULUNGU alīhaya gīkī, Ūlū nsugi ūmeegeja shakwinha ūmò wa bitūnja bakwe kūfuma mu wingīji bokwe, īkūbiza sabo yabo na a ba shibyalīlwe shakwe; ī yenīyo yabizaga sabo ya wingīji wabo.

¹⁷Alīyo ūlū ūmeegeja ūmò wa batūmami bakwe ī shakwinha kūfuma ū mu wingīji bokwe, ū ntūmami ng'wenūyo akwikala nasho ī shakwinha shenīsho kūshisha ng'waka gwa wiyaabī; hūna shikūnshokela hangī ū nsugi. Ū wingīji bokwe būlī sabo ya bitūnja bakwe dūhū; ī yenīyo sabo yabo.

¹⁸Ū nsugi atī wa kūpeeja banhū bose bose bīnge ha sabo jabo, gīkī abūsole ū wingīji wabo; akūbinha a bitūnja bakwe ū wingīji wabo kūfuma mu sabo yakwe we ng'wenekīlī, a banhū bane bose bose batī ba kwīnjiwa ha sabo jabo.

¹⁹Hūna ū munhū ng'wenūyo ūnibītya ha nyango gwa mu mhelo ya mita, ūnishisha kū chumba sheela sha bagabīji, shaalī shilolelile sukuma, ūnoolekeja ipandī lyalī kū lwande lo ng'weli kū būkalīkījo.

²⁰Ūhaya, “Ī lyenīlī h'ī lipandī lya bagabīji ūmo bakazugīlaga shitambò sha kwīnja būhūbi na shitambò sha kweja shibi; h'ūmo bakookejaga nī shitambò sha būsu, gīkī batizūshibītīja ū ng'wibīndo lya ha būshikīlo ūmo badūgije kūbenhela makoye a banhū.”

²¹Hanuma ūnitwala kū gwalugwa ya hanze, ūnibītya bītya ū mu mhembeelo jayo būnè wajo, nūbona gīkī būlī hene yalīho gwalugwa yīngī hangī.

²²Ū mu gatī ya gwalugwa ya hanze yenīyo, ī gwalugwa būnè wajo ījo jalī ū mu mhembeelo, būlī yene yalī na būlīhu bo miita makūmi abīlī na būgalī galī bo miita ikūmi n'itanò; hama pye jalī jilenganīlile na jipīndīlījiwe ndugu.

²³Ī gwalugwa ī jose būnè wajo būlī yene ū mu gatī yalī n'ikīgījo lya mawe līpīndīlīgije pye a hose; na mahiga ga kūzugīla gaalī gatūūlile gūūpīndīlījiwa pye pye pye ū mu sīlīlī ya makīgījo.

²⁴Ū munhū ng'wenūyo ūniwīla, “A geneya h'a mahiga ga kūzugīla, a batūmami ba mu hekalu bakūyūzugīla ng'wenūmu ī shitambò sha banhū.”