Read Sukuma Bible 2015 – Bibilia Ilagano Lya Kale 2015 Ezekia 47 Bible Online

Ezekia 47 - Sukuma Bible 2015 – Bibilia Ilagano Lya Kale 2015 bible

Ezekia 47

¹Ū munhū ng'wenūyo ūnishosha ū kū nyango gwa hekalu, nūbona minzī galīzwīlīīla kūfuma hasī a ha nyango gwa hekalu, hama gaahūūma galolile kīya (nguno ī hekalu yalī īlolelile kīya). A minzī genayo gafumīīlaga kū lwande lo dakama ya hekalu, dakama ya ng'walīlo.

²Ūnibītya kū mita go sukuma ūnenha hanze, tūbītīla hanze anitongeelile tūjile, tūūkashika kū mita go hanze ūyo gūlolelile kīya; a minzī gahūūmaga gafumile kū lwande lo dakama.

³Walī na nang'ha gwa kūpimīla ū mu nkono gwakwe, ūshimīza alolile kīya, hūna ūpima būkūle bo nusu kilomiita; ūnitonga tūūbīta mo ū mu minzī, gaalī ga mu shing'ongwa.

⁴Ūpima hangī būkūle bo nusu kilomiita, ūnitonga hangī tūūbīta mo ū mu minzī; gūbiza na būshimu bo kūshisha mu mazwi. Ūpima hangī nusu kilomiita, ūnitonga hangī tūūbīta moi; gūūshika mu nkīmbīlī.

⁵Ūpima hangī nusu kilomiita, lelo gūbiza mongo ūyo naalī natadūgije ū kūgūkīla, nguno a minzī gaalī mingī no, hangī mashimu ga kwigela munhū kūjiha mo; mongo ūyo atīho wa kūgūkīla.

⁶Hūna ūnibūūja, “Ng'wana wa munhū, ūlīyībona ī yenīyī?” Ūnitonga tūshoka ū kū ngegu ja mongo.

⁷Aho nashika koi nūbona mitī mingī ū kū ngegu ja mongo jose būbīlī wajo.

⁸Ūniwīla, “A minzī geneya gakahūūmaga gajile kū sī ja kīya, gajile kūshisha kū ntubīlo gwa Alaba, kūja kwingīla mu nyanza.[35] Ūlū gingīla ū mu nyanza, a minzī ga nyanza yenīyo gakagalūkaga gaabiza manweki.[36]

⁹Būlī kwene ūko gūhūūmīīla ū mongo shiseeng'wa na shiseeng'wa shikūbiza shipanga. Nī ndīlo jikūkwīla no, nguno a minzī genaya galīhūūma gajile koi, gakagagalūcha a minzī ga munhu kūbiza manweki. Hūna lūūlū būlī kwene ūko gūhūūma gūjile ū mongo būlī shikolo shikūbizī shipanga.

¹⁰Bategi ba ndīlo bakwihela ū mu ngegu; kwandīja Engedi kūja En-eglaimu gakūbiza ho mabbaala ga kwanikīgīja mitego. Ī ndīlo jikūbiza ja mbika na mbika, gīt'ūmò jilī ndīlo ja mu Nyanza Nhaale.[37]

¹¹Alīyo a mataba ga mu mhelo mhelo na a malutende gatūbeela, a gene gakūlekanījiwa gikale na munhu.

¹²Mitī ya matwajo ya būlī mbika īkūkūla ū kū ngegu ja mongo būbīlī wajo. A madūūtū gayo gatūnyaala, nī shisuumo shayo ītūholoosha. Būlī ng'weji īkūyūtwaja nguno a minzī ga kūfuma h'ipandī lyeela gakūhūmīīlaga ūko īlī. Ī shisuumo shayo shikūbiza shilīwa, a madūūtū gayo gakūbiza ga kūlagūlīla.”

¹³Ū Seeba MULUNGU alīhaya gīkī, “Īji h'ī mbīmbī ījo ūkūjitūmamīla ū kwīgaba ī sī kūlwa wingīji bo ng'anda ikūmi n'ibīlī ja Isilaeli, ū lo Yosefu migabo ībībī.

¹⁴Ū nene nakalahīla na nkono gūnunjiwe ng'wigūlya, gīkī nakūbinha a bakūlūgenji bing'we ī sī yenīyī. Ī yoi īkūbiza ying'we kūlwa wingīji wing'we; ūkūbagabanhya mu būlenganīja.”

¹⁵Ūlū hū lūkūbiza lūbīmbī lwayo ī sī: Ū kū lwande lo sukuma lūkwandīja kū Nyanza Nhaale lūūlondeela ikūūwa lya Hesiloni lūūbīta lūjile Lebo-Hamasi, kūja Zedadi,

¹⁶Belosa, Sibulaimu (kū lūbīmbī lwa Damasiko na Hamasi), kūshisha Hazeli-hatikoni, nzengo gwa mu lūbīmbī lwa Haulani.

¹⁷Ū lūbīmbī lūkwandīja kū nyanza lūūbīta lūjile kūshisha Hazali-enani, ū kū lwande lwa sukuma yaho īlīho Damasiko na Hamasi. Ū lwenūlū hū lūkūbiza lūbīmbī lo sukuma.

¹⁸Ū kū lwande lo kīya ū lūbīmbī lūkūbīta ha gatī ya Haulani na Damasiko lūlondeela mongo gwa Yolodani, lūja lūlikilimbīja Gileadi na sī ya Isilaeli, kūja kū nyanza ya kīya hūna lūūnyamuka lūjile kūshisha Tamali. Ū lwenūlū hū lūkūbiza lūbīmbī lo kīya.

¹⁹Ū kū lwande lo dakama ū lūbīmbī lūkūfuma Tamali lūūkashika kū minzī ga Meliba-kadeshi, hūna lūsīngīja longa lo Misili kūjīlīīla kū Nyanza Nhaale. Ū lwenūlū hū lūkūbiza lūbīmbī lo dakama.

²⁰Ū kū lwande lo ng'weli ī Nyanza ī Nhaale hū lūkūbiza lūbīmbī, kūjīlīīla sukuma lūūkashika kwipande īlo liilolile na Lebo-Hamasi. Ū lwenūlū hū lūkūbiza lūbīmbī lo ng'weli.

²¹Ī sī yenīyī mukwigabanhya bing'we benekīlī kūlenganīla nū mumo jilī ī ng'anda ja Isilaeli.

²²Mukwīgabanha bo mbale ībize ya wingīji wing'we a bing'we, na a balobeji ba kūfuma kū mahanga abo balī hamò ning'we, abo balī na baana. Nabo mukūbisaaba gīkī balī bajiga jiga, gītī babyalīlwa ba mu Isilaeli; nabo bakūbiza hamò ning'we, batūlīgījiwe ī mbale kūlwa kwanukūla wingīji ū mu ng'anda ja Isilaeli.

²³Mu sī ya lūganda lose lose ūmo alakikale ū nobeji, mukūng'winhīla ng'wenūmo ū wingīji bokwe, alīhaya Seeba MULUNGU.