Read Sukuma Bible 2015 – Bibilia Ilagano Lya Kale 2015 Ezekia 48 Bible Online

Ezekia 48 - Sukuma Bible 2015 – Bibilia Ilagano Lya Kale 2015 bible

Ezekia 48

¹Ī ng'anda ījo jitūūlilwe mu kwihela kwa mina gajo jiiji: Ū kū lūbīmbī lwa sukuma lūganda lwa Dani, ngabo gūmò. Ū lūbīmbī lwabo lūkūlondeela ikūūwa lya Hesiloni kūbītīla Lebo-Hamasi na Hazali-enani. Damasiko na Hamasi jilī sukuma ya lūbīmbī lwenūlo, ūlo lūfumile kīya lūūkagadya ng'weli.

²Lūganda lwa Asheli lūkūbīmbīkanwa nū lwa Dani kūfuma kīya kūshisha ng'weli, ngabo gūmò.

³Lūganda lwa Nafutali lūkūbīmbīkanwa nū lwa Asheli kūfuma kīya kūshisha ng'weli, ngabo gūmò.

⁴Lūganda lwa Manase lūkūbīmbīkanwa nū lwa Nafutali kūfuma kīya kūshisha ng'weli, ngabo gūmò.

⁵Lūganda lwa Efulaimu lūkūbīmbīkanwa nū lwa Manase kūfuma kīya kūshisha ng'weli, ngabo gūmò.

⁶Lūganda lwa Lubeni lūkūbīmbīkanwa nū lwa Efulaimu kūfuma kīya kūshisha ng'weli, ngabo gūmò.

⁷Lūganda lwa Yuda lūkūbīmbīkanwa nū lwa Lubeni kūfuma kīya kūshisha ng'weli, ngabo gūmò.

⁸Ī sī ya lūganda lwa Yuda ū kūfuma kīya kūshisha ng'weli īkūbīmbīkanwa nī libbaala īlo mukūlīfunya kūlwa nīmo ūyo gūsolilwe. Ū būgalī galī w'ibbaala lyenīlo būlī kilomiita ikūmi n'ibīlī na nusu; ū būlīhu walyo kūfuma kīya kūja ng'weli būkūlenganīla na sī īmò yaho ū mu sī ījo jigabilwe kū ng'anda ja Isilaeli; ī lipandī lyeela līkūbiza ha gatī y'ibbaala lyenīlo.

⁹Ī libbaala lya sī īyo mukūmfunīja SEEBA līkūbiza na būlīhu bo kilomiita ikūmi n'ibīlī na nusu na būgalī galī bo kilomiita itanò.

¹⁰Ī libbaala lya sī neela īyo īkūbiza ya bagabīji līīlī: Ū kū lwande lo sukuma līkūbiza na būlīhu bo kilomiita ikūmi n'ibīlī na nusu, ū kū lwande lo ng'weli būgalī galī bo kilomiita itanò; nī kīya būgalī galī bo kilomiita itanò; hama nī dakama būlīhu bo kilomiita ikūmi n'ibīlī na nusu. A ha gatī yalyo lyūbiza ho ī lipandī lyeela lya ng'wa SEEBA.

¹¹Ī libbaala lyenīlo līkūbiza lya bagabīji abo bitīīlwa maguta, a balekwa Sadoki, abo baalī bishigwa ū mu kūnitūmamīla, na batajile sagala ūmo bakīītīla a Balawī ikanza lyene Baisilaeli baalī baatagaalīja.

¹²Ī libbaala lyenīlo līkūbiza shakwinha ū kūbo kūfuma ū ng'wibbaala lya sī neela; ī lyoi līlī lyeela no no no, sī īyo yihelile nī sī ya Balawī.

¹³A Balawī bakūpandīka sī ya kūbīmbīkanwa nī sī ya bagabīji, īkūbiza ya būlīhu bo kilomiita ikūmi n'ibīlī na nusu na būgalī galī bo kilomiita itanò. Ū būlīhu wayo ū bose būkūbiza kilomiita ikūmi n'ibīlī na nusu ū būgalī galī kilomiita itanò.

¹⁴Batazunīlīgije kūjinja nūūlū kūtīna'ibudīka lya kūkaaba, ī sī yenīyī īlī sī yawiza no, ītigeleelilwe kūbiza ha sīlīlī ya makono ga munhū ūngī; nguno ī yoi īlī neela kūlwa ng'wa SEEBA.

¹⁵Ī libbaala īlo līlīsaagīīla, ī lya būgalī galī bo miita magana abīlī na mkūmi atanò na būlīhu bo kilomiita ikūmi n'ibīlī na nusu līkūbiza lya banhū bose ū mu nzengo, lya kūzenga numba na būdīīmīlo, ū nzengo gūkūbiza ha gatī gatī yalyo,

¹⁶na gūkūbiza na shipimo īshi: Ū lwande lo sukuma miita shihūmbī shibīlī na magana a bīlī na makūmi atanò, nū lwande lo dakama miita shihūmbī shibīlī na magana a bīlī na makūmi atanò, nū lwande lo kīya miita shihūmbī shibīlī na magana abīlī na makūmi atanò, nū lwande lo ng'weli miita shihūmbī shibīlī na magana a bīlī na makūmi atanò.

¹⁷Ī sī y'idīīmīlo lya nzengo īkūbiza na shipimo īshi: Ū kū lwande lo sukuma miita igana na makūmi abīlī n'itanò, nū lwande lo dakama miita igana na makūmi abīlī n'itanò, nū lo kīya miita igana na makūmi abīlī n'itanò, nū lo ng'weli miita igana na makūmi abīlī n'itanò.

¹⁸Ī sī īyo īlīsaagīīla kū mhelo mhelo y'ibbaala lya sī neela, īyo ībīmbīkanilwe nalyo nū būlīhu yūlenganīla nalyo ū kū lwande lo kīya nū kū lwande lo ng'weli, īkūbiza kilomiita itanò būlī lwande. A batūmami ba mu nzengo bakūyūpandīkīla ng'wenūmo ī shilīwa sha kūbalisha.

¹⁹A batūmami ba mu nzengo, abo bakūyūlīlīma bakūbiza ba kūfuma mu ng'anda jose ja Isilaeli.

²⁰Ī libbaala ī lyose līkūbiza lya būlīhu būlenganīlile nū būgalī galī walyo, kilomiita ikūmi n'ibīlī na nusu būlī lwande. Ī libbaala lya sī neela ūkūlīkomà lībize shakwinha shisolwa, hamò nī sabo ya banhū ba nzengo.

²¹Ī sī īyo īlīsaagīīla ū lwande ūlū nū lwande ūlū ū ng'wibbaala lya sī neela nī sabo ya banhū ba nzengo, īkūbiza ya nsugi. Ū kūfuma a ha būlīhu bo kilomiita ikūmi n'ibīlī na nusu īkūlola kīya, yūshika kū lūbīmbī lo kīya; nū kū ng'weli yandīja a ha būlīhu bo kilomiita ikūmi n'ibīlī na nusu kūja ng'weli, yūshika kū lūbīmbī long'weli. Ī sī ja matogolo genaya būbīlī wago jikūbiza sabo ya nsugi, ū būlīhu waago būlenganīlile nū bo sī ījo jigabīlilwe ng'anda ja Baisilaeli; ī sī neela ya wikalo bo hekalu gakwītingata ha gatī na ha gatī.

²²Hū kūhaya ī sī ya Balawī nī ya nzengo jikūbiza ha gatī na ha gatī ya sī ya nsugi. Ī sī ya nsugi īkūbiza ha gatī ya lūbīmbī lo sī ya lūganda lo Yuda na lūbīmbī lo sī ya lūganda lo Benjamini.

²³Ī ng'anda ījo jilīsaagīīla: Ū lūganda lo Benjamini lūkūbiza na ngabo gūmò; lūkūfuma lwande lo kīya kūshisha ng'weli.

²⁴Nū lūganda lo Simioni ngabo gūmò; lūbīmbīkanwa nī sī ya Benjamini kūfuma kīya kūshisha ng'weli.

²⁵Nū lūganda lo Isakaali ngabo gūmò; lūbīmbīkanwa nī sī ya Simioni kūfuma kīya kūshisha ng'weli.

²⁶Nū lūganda lo Zabuloni ngabo gūmò; lūbīmbīkanwa nī sī ya Isakaali kūfuma kīya kūshisha ng'weli.

²⁷Nū lūganda lo Gadi ngabo gūmò; lūbīmbīkanwa nī sī ya Zabuloni kūfuma kīya kūshisha ng'weli.

²⁸Ū lūbīmbī lo dakama ya Gadi lūkūlola dakama, hūna lūūnyamuka lūjile Tamali kūshisha kū minzī ga Meliba-kadeshi; hanuma lūlondeela longa lo Misili kūshisha kū Nyanza Nhaale.

²⁹Ī yenīyī h'ī sī īyo ūkūbagabīlī a Baisilaeli kūlwa wingīji bo ng'anda jabo; ī jenīji hū jikūbiza sī jabo. Alīhaya Seeba MULUNGU.

³⁰Ūbū hū būbītīlo bo kwingīla na kūfuma ū mu nzengo, ū lwande lo sukuma lūlī na būlīhu bo miita shihūmbī shibīlī na magana abīlī na makūmi atanò.

³¹Ī mibita idatū ya kū lwande lo sukuma īkūbiza, mita gwa Lubeni, mita gwa Yuda, na mita gwa Lawī. Ī mibita ya nzengo pyī ī yose īkwitanwa a mina gayo kūlondeela ng'anda ja Isilaeli.

³²Nū būlīhu bo kū lwande lo kīya būlī miita shihūmbī shibīlī na magana abīlī na makūmi atanò. Nū kwene īkūbiza ko mibita idatū, mita gwa Yosefu, mita gwa Benjamini, na mita gwa Dani.

³³Nū būlīhu bo kū lwande lo dakama būlī miita shihūmbī shibīlī na magana abīlī na makūmi atanò. Nū kwene īkūbiza ko mibita idatū, mita gwa Simioni, mita gwa Isakaali, na mita gwa Zabuloni.

³⁴Nū būlīhu bo kū lwande lo ng'weli būlī miita shihūmbī shibīlī na magana abīlī na makūmi atanò. Nū kwene īkūbiza ko mibita idatū, mita gwa Gadi, mita gwa Asheli, na mita gwa Nafutali.

³⁵Ū būlīhu bo kūgūpīndya pye ū nzengo būkūbiza kilomiita shihūmbī kenda. Kwandīja ikanza lyenīlo ī lina lya nzengo gwenūyo līkūbiza, Ū SEEBA ALĪ NG'WENŪMO.