Read Sukuma Bible 2015 – Bibilia Ilagano Lya Kale 2015 Ezekia 6 Bible Online

Ezekia 6 - Sukuma Bible 2015 – Bibilia Ilagano Lya Kale 2015 bible

Ezekia 6

¹Ū mhayo go ng'wa SEEBA gūnizīīla gūlīhaya,

²“Ng'wana wa munhū, galūkaga ūjilolele ī ngūlū ja Isilaeli ūjihangīle, jiwīlage gīkī,

³‘Bing'we ngūlū ja Isilaeli, gwigwagi ū mhayo go ng'wa Seeba MULUNGU! Ū Seeba MULUNGU alījiwīla ī ngūlū ī nhaale nī ndo, nī myongo nī sī ja ntubīlo, alīhaya: Nalī hihī kūng'wenhela būlūgū, na nakūgakenaagūla a mapandī ging'we a ga higūlya.’”

⁴Ī myalīlo ying'we īkūkenaagūlwa, nī myalīlo ying'we ya shitambò sha kūzuukīja īkūseesagūlwa; hama a banhū bing'we nakūbabūlagīla kū būtongi wa shiikolile shing'we sha kūlamiwa.

⁵Ī mibimba ya Baisilaeli nakwīlambalaja kū būtongi wa shiikolile shabo sha kūlamiwa; a maguha ging'we nakūgasalang'hanīja mu myalīlo ying'we.

⁶Būlī kwene ūko mukwikalaga ī mizengo īkūbiza dalali, a mapandī ga higūlya gakūkambagūlwa; ī myalīlo ying'we īkūkenaagūlwa īlekwe īlī dalali; ī shiikolile shing'we sha kūlamiwa shikūseesagūlwa shibipe, nī myalīlo ying'we ya shitambò sha kūzuukīja īkūkambagūlwa, na shose shose īsho ng'wibeegeja shikūshila ho gete.

⁷Banhū bingī no ū mu bing'we bakūbūlagwa; hūna mukūdeeba gīkī ū nene nalī SEEBA.

⁸Alīyo bamò bing'we nakūbalekeela bikale bapanga, nguno balīho abo bakūpūlūgūka ū mu būlūgū ūlū ng'ūsambaagījiwa kū masī na mahanga.

⁹Hūna ū kū mahanga ūko bakūsaamījiwa abo balasaagīīle bakūnizūkwa ūmo naapīnīhalīlaga kūlwa ng'holò jabo ja būshihani,[8] ūmo baalī bagalūkīla kū bamulungu bangī, ū nene būnileka; na kūlwa miso gabo ga kwikūmvwa shiikolile shabo sha kūlamiwa. Bakwidalaha no kūlwa būbi ūbo baawīta, nī mihayo yabo ī y'ipelanya pyī ī yose.

¹⁰Hūna bakūdeeba gīkī ū nene nalī SEEBA; natihayīlile dūhū ī gīkī nakūbenhelela ū nsango gwenūyū.

¹¹Ū Seeba MULUNGU alīhaya gīkī, Ipaalage makono, ūkiinūje nū gūgūlū gwako hasī; ūhaye, “Makoye!” Nguno yabipaga ī mihayo ū kū banhū ba numba ya Isilaeli, kūlwa būbi na shītīle shabo sha malofu; bakūmalwa līlūshū, nzala na mabūsaatu.

¹²Ūyo alī kūle akūbūlagwa būsaatu, ūyo alī bbihī akūbūlagwa būlūgū; hama ūyo alapūlūgūke asaage, akūnanulwa nzala. H'ūmo nakūbūmalīla ū būpelanu bone ū kūbo.

¹³A banhū babo bakūyūchīla kū myalīlo yabo, bayūbabona bachile balambalalile biguulanyaga nī shiikolile shabo sha kūlamiwa, a henaho hū bakūdeeba gīkī ū nene nalī SEEBA. Nguno būlī kwene bakūgwa, ū kū mapandī ga kwigūlya, kū ngūlū jose na jose; mu mbeho ja mitī īfulumile nūūlū mitūndū ya madūūtū mingī. A genayo h'a mapandī ayo baagatūmamīlaga kūfunya shitambò sha kūzuukīja kū shiikolile shabo sha kūlamiwa shose.

¹⁴Nakūbagoloolela nkono gwane, ī sī yabo nīyīte kūbiza dalali na buyīkī, kwandīja kwitogolo lya kūjīlīīla Dibula; a henaho hūna bakūdeeba gīkī ū nene nalī SEEBA.