Read Sukuma Bible 2015 – Bibilia Ilagano Lya Kale 2015 Ezekia 7 Bible Online

Ezekia 7 - Sukuma Bible 2015 – Bibilia Ilagano Lya Kale 2015 bible

Ezekia 7

¹Ū mhayo go ng'wa SEEBA gūnizīīla gūlīhaya,

²“Ng'wana wa munhū ū Seeba MULUNGU alīyīwīla ī sī ya Isilaeli gīkī, Ng'halīlo! Ī ng'halīlo yashikaga, yakwīlīkanaga ū kū mhandī jose inè ja sī.

³Ī ng'halīlo yamupandīkaga, nīyo ī haha nakūbūlekela ū būdaki bone būng'widīkīle. Nakūmulamula kūlenganīla na shītīle shing'we, nang'winhe nsango kūlwa shītwa shing'we sha malofu pyī ī shose.

⁴Nīyo ī liso lyane lītūmuchīla shigongo, nūūlū natūmusaatwa na hado yaya. Nakūmumalīla shiilī kūlwa nzīla jing'we nī shītwa sha malofu īsho shilīmo ū mu bing'we; hūna mukūdeeba gīkī ū nene nalī SEEBA.

⁵Ū Seeba MULUNGU alīhaya gīkī, Būkenaagūji! Būliza būkenaagūji ūbo būtaalī kwigwiwa na kamò.

⁶Ī ng'halīlo yashikaga! Yashikaga ī ng'halīlo! Ī haha yamupandīkaga. Nīyo yashikaga!

⁷Ng'wasangwa lūshilo bing'we bikaji ba mu sī; ī likanza lyashikaga, lwegeelaga ū lūshikū; ī haha ikanza lya būpīna, lītī lya kūjūyega kū ngūlū.

⁸Nalī hihī kūng'witīīla būpelanu bone, būng'wikamīīle ū būdaki bone. Nakūmulamula kūlwa nhūngwa jing'we, namumalīle shiilī kūlwa shītīle shing'we sha malofu.

⁹Ī liso lyane lītūmuchīla shigongo, nūūlū natūmusaatwa na hado yaya. Nakūmumalīla shiilī kūlwa nzīla jing'we nī shītwa sha malofu īsho shilīmo ū mu bing'we; hūna mukūdeeba gīkī ū nene hū nalī ng'wene ū SEEBA ūyo alīmutūla.

¹⁰“Ū lūshikū lwashikaga, nīyo lūlīho ī haha! Lyashikaga ikanza lya lūshilo, ū nang'ha gwītile būlabo; ū wiboneeji botang'anhīlile!

¹¹Ī haha ū wiboneeji bokomeelile, hū nang'ha gwa bakenaagūji; atīho wa kūshiiga, ndūhū nūūlū ūmò ū ng'wibità lyenīlo, yaya nūūlū sabo, nūūlū shikolo sha mpango ntaale.

¹²Ī likanza lyang'waga, ū lūshikū lwashikaga; ū ngūji wa shikolo atizikumīlīja, nū njinja atizūminyiwa būpīna; nguno pyī ī libità līpelanīlilwe.

¹³Ū njinja atīko kwīshokela hangī ī sī īyo wījinja, aho bataalī balīho būbīlī wabo; nguno ī shakoolechiwa īsho shilīfunyiwa kūlw'ibità lyose shitī sha kūshoka numa. Kūlwa būkenaagūji wabo atilonga nūūlū ūmò wa kūdūla kūlang'hana būpanga bokwe.

¹⁴Nūūlū bafuule nhaaninga, na kūgolanya būlī shikolo, alīyo atīho wa kūja kū būlūgū, nguno ū būpelanu bone būlīho kūlw'ibità.”

¹⁵Ī hanze būlīho būlūgū, ū mu gatī būsaatu na nzala; abo balī kū matogolo bakūmalwa būlūgū, lelo abo balī mu nzengo bakūhūlūlwa nzala na mabūsaatu.

¹⁶Abo balapūlūgūke bakūpeelela kū ngūlū, bakalīle kwenūko gītī ng'hūūlū ja mu njonga; būlī ng'wene akwilīlaga kūlwa shibi shakwe.

¹⁷Būlī nkono gūkūnogoleka, na būlī izwi līkūyogoma gītī minzī.

¹⁸Bakūzwala myenda ya magūnīla, boobà būkūbakundīkīla. Ū būshū wabo būkūkundīkījiwa magooke, ī mitwe yabo īkūmoogwa mapala.

¹⁹Ī hela jabo bakūyūjiponya mu mapanda, nī zahabu jabo jikūbiza būsoso. Ū mu lūshikū lo būpelanu bo ng'wa SEEBA jitūbapīja ī hela nī zahabu jabo. Batūjilya bigūtye nda jabo, nūūlū lūtuubo jitūbīngīja, nguno h'ījo jabenheleja kūgwa mu shibi.

²⁰Baalī badoshiwa būsoga wa shikolo shabo sha būlenji, būyūshitūmamīla kūbeeja shiikolile shabo sh'ipelanya sha kwilamīlīgīja, na mashigīmbo ga malofu. Alilūūlū, ī shenīshi nakūshīta shibize līshikolo ly'ipelanya ū kūbo.

²¹Nakūlīfunya lībize nding'wa, lījanwe na banhū ba mahanga ga kūle, lītwalwe kū sī y'ihanga lyabūbi līkasosohajiwe kwenūko.

²²Nakūgalūka nalolele kūngī, ū būshū bone būbīngīle, bize bakenaagūji balīsosohaje ī lipandī lyane ī lya mpango ntaale; basambo bakwingīla mo balīsosohaje.

²³“Bebe beejaga minyololo; ī sī yakwīlīlilwe babūlagi, ū nzengo gookalile biboneeji.

²⁴Nakwenha ihanga lyabūbi kūtinda gose, lize lījidime ī numba jabo; a ba nguzu nakūbīngīja ū wikumīlīja, a mapandī gabo a meela gasosohajiwe.

²⁵Ī likanza lya būkenaagūji ūlū lyūshika bakwandya kūkooba mhola, alīyo ītilonga.

²⁶Bakūgwīlwa mayanga higūlya ya mayanga, bakwigwa ma lūkumo ga būlī mbika. Bakūyūkooba shakoolechiwa kūfuma kūlī ng'hangi; a malange ga mu shilagīlo gakūnjimīīla ū ngabīji, na a banamhala bakūjimīīlwa ū kūganikīla.

²⁷Ū ntemi akūlīla mazumanda, ū kūzwangana shikūbiza h'ī shizwalo sha nsugi, a makono ga banhū ba sī gakūyūdetema. Nakūbīītīla kūlenganīla na shītīle shabo, hama nakūbalamula gīt'ūmo bakalamulīlaga a boi. Hūna bakūdeeba gīkī ū nene nalī SEEBA.”