Read Sukuma Bible 2015 – Bibilia Ilagano Lya Kale 2015 Ezekia 8 Bible Online

Ezekia 8 - Sukuma Bible 2015 – Bibilia Ilagano Lya Kale 2015 bible

Ezekia 8

¹Mu lūshikūū lwa katanò ng'weji gwa katandatū, ng'waka gwa katandatū, naalī nigashije mu numba yane, na a banamhala ba Yuda baalī bigashije hamò nū nene, ū nkono go ng'wa Seeba MULUNGU gūnizīīla a henaho.

²Aho naalola nūmona wa kūbonekana gīkī munhū, ū kwandīja aho yalī gītī ha nkīmbīlī gwakwe kwika sīlīlī, wabonekenaga gītī moto; ū kwandīja a henaho kūja igūlya, wabonekanaga gītī chūma shiteemagīzu.

³Ūgoloola gwa kūbonekanaga gītī nkono, ūnidimīla kū nzwīlī jane; hūna ū Moyo ūnibūūcha higūlya,[9] ūnitwala Yelusalemu nalī mu koolekegeje ka ng'wa Mulungu. Ūnishikīja ha wingīlīlo wa mita gwa sukuma gwa ng'wibīndo lya mu gatī, shiikolile sh'ipelanya[10] shaalī shikīndīkilwe henaho.

⁴A ha būtongi wane lyalīho ī likūjo lya ng'wa Mulungu wa Isilaeli gītī īlo naalī nalībona mu shakoolechiwa aho nalī kū mbūga.

⁵Ūniwīla, “Ng'wana wa munhū, alilolaga ī sukuma.” Nūlola ko, a ha wingīlīlo ī sukuma ya mita gwa kūja ha ng'walīlò, nūshibona ī shiikolile sh'ipelanya shenīshi.

⁶Ūniwīla, “Ng'wana wa munhū ūlīyībona īyo balīta, ī y'ipelanya īyo banhū ba numba ya Isilaeli bakwīyītaga a henaha, īyo īkūnipeejaga nīnge naje kūle nī lipandī lyane lyeela? Alīyo ūkūbona yīngī y'ipelanya kūkīla a henaho.”

⁷Hūna ūnenha a ha kwingīlīla ng'wibīndo. Aho nalola gwalīho ng'obo ha ndugu.

⁸Ūniwīla, “Ng'wana wa munhū, alisīmbaga a ha ndugu henaho.” Nūsīmba ng'hana a ha ndugu, nūbona ho nyango.

⁹Ūniwīla, “Ingīlaga mo ūkīībone ī yabūbi na y'ipelanya īyo bakwīyītaga ū ng'wenūmu.”

¹⁰Ningīla mo, aho naalola nūbona shiinū ja malofu ja būlī mbika joolilwe a ha ndugu pyī ī jose, shiinū ja kwigwesa hasī, na ja kūshimīza, na būlī mbika ya shiikolile īsho banhū ba numba ya Isilaeli bashilamyaga.

¹¹Banamhala makūmi mpungatī ba Isilaeli baalī bīmīīla a ha būtongi wa shose shenīshi; nū Yazania ng'witūnja o ng'wa Shafani walī īmīīlile hamò nabo. Būlī ūmò wabo ū mu nkono walī na shinje ya shitambò sha kūzuukīja; lyochi lya ng'waso gwawiza lyadundumūkaga kūj'igūlya gītī ilunde.

¹²Hūna ūniwīla, “Ng'wana wa munhū wībona īyo bakīyītaga a banamhala ba numba ya Isilaeli ū mu giiti, būlī ng'wene mu chumba sha shiikolile shakwe sha kūlamiwa? Bakiwīlaga gīkī, ‘Ū SEEBA atūtūbona, ū SEEBA wīgumanīja ī sī.’”

¹³Ūhaya hangī, “Ūkūbabona balīta na mihayo y'ipelanya kūheeba ī yenīyī.”

¹⁴Hūna ūnitwala kū wingīlīlo wa kū mita gwa sukuma ya numba ya ng'wa SEEBA, nūsanga koi bakīma bigashaga bakūnīlaga Tamuzi.

¹⁵Ūniwīla, “Bebe ng'wana wa munhū, ūlīgūbona ū gwenūyū? Ūkūbona mihayo y'ipelanya kūheeba a ha yenīyī.”

¹⁶Hūna ūnenha mu ng'wibīndo lya mu gatī ya numba ya ng'wa SEEBA, a ha kwingīlīla mu hekalu, a ha gatī y'ibīndo lya hanze na ng'walīlò, baalīho bagosha gītī makūmi abīlī na batanò. Ī numba ya ng'wa SEEBA baalī bīyinhīla migongo; ū būshū wabo babūlogegije kīya, bakūlīlamyaga līīmi ī kīya kwenūko.

¹⁷Ūniwīla, “Wagūbona ū gwenūyū ng'wana wa munhū? Gūlī ndo ū mhayo gwa numba ya Isilaeli kwīta ī y'ipelanya īyo bakwīyīta ū ng'wenūmu? Nibūlī nī sī bīyokaje wiboneeji, na kūmanūnipelanya dūhū? Alibalolage ūmo bakwitūūlīlaga itambī kū mūūlū gabo!

¹⁸Alilūūlū, nakūbīītīla ya kūbīītīla, nguno baanipelanije no; Ī liso lyane lītūbachīla shigongo, nūūlū natūbasaatwa na hado yaya; h'ūmo batandūkīle bakūnilīlīīlaga mu matū, natūbigwa nūūlū hado.”