Read Sukuma Bible 2015 – Bibilia Ilagano Lya Kale 2015 Danyeli 1 Bible Online

Danyeli 1 - Sukuma Bible 2015 – Bibilia Ilagano Lya Kale 2015 bible

Danyeli 1

¹Mu ng'waka gwa kadatū gwa būsugi bo ng'wa Yehoyakimu ntemi wa Yuda, Nebukadineza ntemi wa Babuloni akiza kwīdumīla ī Yelusalemu wīpīndya na mabità gakwe ga bashilikake.

²Ū Seeba ūntūūla ū Yehoyakimu ū ntemi wa Yuda mu makono gakwe, hamò na shiseme shimò na shimò sha mu hekalu ya ng'wa Mulungu. Akashibūūcha ūshijana Babuloni mu hekalu ya ng'wa mulungu wakwe, ūūkashitūūla mu chumba sha ng'wa mulungu wakwe sha kūbīkīla sabo.

³Hūna ū ntemi ūnagīla Ashipenazi, ntaale wa ng'wikūlū lyakwe, gīkī abenhe bamò na bamò ba Baisilaeli a ba kūfuma ng'wikūlū na lūganda lwa ntemi,

⁴basūmba basoga kūlola, abo baalī batī na shisembo sha mīlī, boolechaga gīkī balī na būdūla bo kwilanga mihayo ya mbika na mbika, banhū bangū kwitegeleja, na biigeleelilwe kūtūmama ng'wikūlū lya ntemi. Ūlagīlwa abalange ū lūlīmi nī shandīkwa sha Bakalidayo.[1]

⁵Ū ntemi ūbahelela ngabo nebe gwa shilīwa sha būlī lūshikū, hamò na divai, shiyūsolwa kūfuma ha meeza ya ntemi. Yalī gīkī balangwe ng'wikanza lya myaka idatū, hanuma y'ikanza lyenīlo bingīle ū mu nīmo gwa ntemi.

⁶Bamò ba basūmba benaba baalī ba kūfuma Yuda ba, Danyeli, Hanania, Mishaeli na Azalia.

⁷Ū ntaale wa ng'wikūlū ūbinha mina mapya, ū Danyeli, lina lya Belitishaza, ū Hanania Shadulaka, ū Mishaeli Meshaki, ū Azalia lya Abedinego.

⁸Alīyo ū Danyeli wilemeja ū kwisosohaja kūlwa shilīwa na divai ya ng'wikūlū; ūnomba ū ntaale wa ng'wikūlū anzunīlīje atizisosohaja mu nzīla yenīyo.

⁹Ū Mulungu ūng'wīta ū ntaale wa ng'wikūlū abize na moyo gwa kūnzunīlīja ū Danyeli na kūng'wītīla yawiza.

¹⁰Kwike ū ntaale ng'wenūyo ūng'wīla ū Danyeli, “Nalīng'ogoha ū baba būgonzo ū ntemi, ūyo walagīlile ng'winhwe ī shilīwa nī shakūng'wa shenīshi. Nibūlī amubone ng'wagoobbeelile, nū būshū wing'we būtī būzalabanu gīt'ūmo balī a badinha b'ilika ling'we? Ū ntemi akūnibbuta ū ntwe kūlwa nguno ying'we.”

¹¹Alīyo ū Danyeli ūng'wīla ū munhū ūyo walī watūūlwa nū ntaale wa ng'wikūlū kūbalang'hana a ba Danyeli, Hanania, Mishaeli nū Azalia; ūhaya,

¹²“Nalīkwikūmbīlīja ūtūgeme a bise batūmami bako ng'wikanza lya shikū ikūmi: Twinhwe makūbī dūhū a ga kūlīīla, nī sha kūng'wa twinhwe minzī.

¹³Hanuma ūtūlenganīje na a badinha abo balīīlya shilīwa sha ng'wikūlū ūbone ūmo tūlabonekanīle, hūna a bise batūmami bako ūkūtwītīla kūlenganīla nū mumo ūlabonele.”

¹⁴Ūlīzunya ī liganiko lyenīlo, ūbagema ng'hana ikanza lya shikū ikūmi.

¹⁵Aho jashika ī shikū īj'ikūmi ī lihanga lya būshū wabo lyūbonekana isoga, nī mibīlī yabo migīlīng'hanu kūtinda pye a basūmba abo balyaga ī shilīwa sha ng'wikūlū.

¹⁶Ū nang'hani ng'wenūyo ūshīnja ī shilīwa ī shinonu īsho baalī bahelelilwe, nī divai ya kūng'wa īyo baalī babalīlilwe, a ha ng'wanya gwaho ūyūbinha makūbī a ga kūlīīla.

¹⁷A basūmba a bane benaba ū Mulungu ūbinha būmani na witegeleja mu nzīla ya kūsoma shandīkwa na kwilanga. Nīyo ū Danyeli ūpandīka na būdūla bo kwitegeleja shakoolechiwa na shilooti sha būlī mbika.

¹⁸Aho lyashika ī likanza īlo lyalī lyatūūlwa nu ntemi gīkī batwalwe ū kū būtongi bokwe, ū ntaale wa ng'wikūlū ūbatwala ū kūlī Nebukadineza.

¹⁹Ū ntemi aho walūngalūnga nabo, atabonile ūngī ose ose wa kūlenganīla na a ba Danyeli, Hanania, Mishaeli nū Azalia; hūna lūūlū bingījiwa ū mu būtūmami bo ntemi.

²⁰Mu būlī mhayo gwa masala na witegeleja ūyo wababūūjaga ū ntemi, akababona gīkī balī na būdūla būtaale, babaheebile ng'hangala ikūmi pye a bafumu na a bachūja ū mu būsugi bokwe ū bose.

²¹Ū Danyeli akikala ho kūshisha ng'waka gwa kwandya gwa ntemi Koleshi.