Read Sukuma Bible 2015 – Bibilia Ilagano Lya Kale 2015 Danyeli 12 Bible Online

Danyeli 12 - Sukuma Bible 2015 – Bibilia Ilagano Lya Kale 2015 bible

Danyeli 12

¹Ū mu shikū jenījo, ū Mikaeli, ū nsugi ntaale ūyo akabalang'hanaga a banhū bako akwilonga. Līkūbiza ho ikanza lya makoye ayo gataalī kwilonga kūfuma ikanza lya wandījo wa mahaga kūshisha ikanza lyenīlo. Alīyo ū kū banhū bako, būlī ng'wene ūyo lina lyakwe līkwilonga lyandīkilwe ū mu shitabo, akūpījiwa.

²A mabità ga banhū abo balaalile mu lūbuubu lwa hasī bakūmisha, bamò kwingīla mu būpanga bo welelo na welelo, bangī mu magooke na būdalahwa bo welelo na welelo.

³A ba masala[17] bakūng'weka gītī būng'weku w'igūlū, na a babo bakabatongaga bichabo mu mihayo ya būtūngīlīja bakūng'weka gītī sonda shikū jose welelo na welelo.

⁴Alīyo ū bebe Danyeli, shikundīkījage ī shitabo shenīshi, wībambīle gete ī mihayo yamo kūshisha ikanza lya kū būkalīkījo. Bingī bakūyūja ūko na ūko kūkooba nzīla ja kwiyongegeja būmani.

⁵Hūna ū nene Danyeli aho naaponya a miso nūbona a ha būtongi bone babīlī bangī bīmīīlaga, ūmò kū lūgegu ūlū ū lwa mongo, na ūngī ū kū lūgegu ū lūngī.

⁶Ūmò wabo ūng'wīla ū munhū ūyo walī azwalile shizwalo sha kitaani, ūyo walī higūlya ya minzī ga mongo; “Ī mihayo ya magaka yenīyī īkūshila nanalī?”

⁷Ū munhū wa shizwalo sha kitaani ūyo walī higūlya ya mongo ūbūūcha ū nkono gwakwe gwa būlyo nū gwa lūmoso, oolota ng'wigūlū; nūng'wigwa wilahīla mu lina lyakwe ūyo alī mpanga welelo na welelo; ūhaya, “Līkūbīta ikanza, makanza, na nusu ikanza.[18] SŪ kūkenaagūlwa kwa būdūla wa banhū beela ūlū kūshika ha būkalīkījo, pyī ī yenīyī īkūshikīīla.”

⁸Ū kwigwa nakigwa, alīyo natitegelegije. Hūna nūbūūja, “Baba ī ng'halīlo ya mihayo yose yenīyī īkūbiza kinehe lūūlū?”

⁹Ūnishokeja, “Danyeli bebe ng'wene jaga na yako, ī mihayo yenīyī īkundīkīgije gete yūbambīlwa, kūshisha ikanza lya kū būkalīkījo.

¹⁰Banhū bingī bakwejiwa beele, bīngījiwe ū būsoso; lelo a babūbi bakongeja kūbiza babūbi, ū mu babūbi atīho nūūlū ūmò ūyo akwitegeleja, alīyo a ba masala bakwitegeleja.

¹¹Kwandīja ikanza lya kūlemejiwa shitambò sha būlī lūshikū kūshika a ha'ikanza lya kwīmīlījiwa sha malofu īsho shikenhelejaga būkenaagūji, jikūbiza ho shikū shihūmbī shimò na magana abīlī na makūmi kenda.

¹²Alī na ūyo ajilindīīlile, na akūshika ū ng'wikanza lya ī shikū ījo shihūmbī shimò na magana adatū na makūmi adatū n'itanò.

¹³Alīyo ū bebe ng'wene jaga na yako kūshisha kū ngelelo y'ikanza. Ūkwifuula, hanuma ū kū būkalīkījo wa shikū ūkūjūūka kūgwanukūla ū ngabo gwa wingīji wako ūbo ūtūūlīlilwe.”