Read Sukuma Bible 2015 – Bibilia Ilagano Lya Kale 2015 Danyeli 9 Bible Online

Danyeli 9 - Sukuma Bible 2015 – Bibilia Ilagano Lya Kale 2015 bible

Danyeli 9

¹Mu ng'waka go kwandya go ng'wa Dalio ng'witūnja o ng'wa Ahasūlo, munhū wa lūganda lwa Bamedi, ūyo akatūūlwa kūbiza nsugi wa Bakalidayo,[12]

²ū mu ng'waka gwakwe go kwandya go būsugi, ū nene Danyeli nakitegeleja kūfuma mu Shandīkwa, ūmo gūhayīlile ū mhayo go ng'wa SEEBA ūyo akinhwa ng'hangi Yelemia, gīkī ī Yelusalemu īkwikala mu būkenaagūku kūshisha ikanza lya myaka makūmi mpungatī.

³Hūna lūūlū nūgalūka kūlī Seeba Mulungu nūng'wikūmbīlīja mu kūlomba na kūlombela, mu kūfunga na kūzwala shizwalo sha magūnīla na kwifudīka mu mabu.

⁴Nūnomba ū SEEBA Mulungu wane na kūtambūūla nalīhaya, “Ee Seeba, bebe ūyo ūlī Mulungu ntaale na wa lyogohya, ū bebe ūlīdimīīlile ī lilagane lyako lya būtogwa kū bose abo bakūtogilwe na kūshiigwa ī shilagīlo shako.

⁵A bise tūlī ba shibi hangī twakūhūba ū bebe; tūlī babūbi kūlwa kūkūgomela na kūgalūka, tūshileka ī shilagīlo shako na a malange gako.

⁶Tūtabadegelekile a batūmami bako a bahangi, abo baahayaga mu lina lyako, bakūbawīlaga a batemi na a basugi bise, na a basīswe, na a banhū ba mu sī yise pye a bose.

⁷“Seeba ū bebe ūlī ntūngīlīja, alīyo a bise tūlī mu magooke gabūbi no gīt'ūmo tūlī ī lelo yenīyī banhū ba Būyudaya na Yelusalemu, nī Isilaeli ī yose; abo balī bbihī na a babo tūlī kūle, kū sī jose ūko watūsambaagīja kūlwa nguno ya būtūsanyiwa wise ū kūlī bebe.

⁸Ee SEEBA, a bise na a batemi bise na a basugi bise, na a basīswe tūlī mu magooke kūlwa nguno ya kwīta shibi kū būtongi wako.

⁹Ū Seeba Mulungu wise ng'wene wa shigongo na nekeja wa banhū, nūūlū īkī tūlī bagomi ū kūlī we;

¹⁰tūtībiigwi ū kūlī SEEBA Mulungu wise, nī shilagīlo shakwe īsho watwinha mu nzīla ya batūmami bakwe a bahangi tūtashidiimile.

¹¹A Baisilaeli a bose baalema ū kūkwigwa ū bebe, būgalūka būshikenaagūla ī shilagīlo shako. “H'ī chene a mazumo nū nsango, mihayo īyo yandīkilwe mu shilagīlo sha ng'wa Musa ntūmami o ng'wa Mulungu shatūgwīlile, kūlwa nguno ya kwīta shibi ū kūlī Mulungu wise.

¹²Wīshikīlīgije ī mihayo yako īyo yalī yahayiwa kūlwa kūtūhūgūla a bise na a basugi bise, ū twenhela būkenaagūji būtaale. Hose pyī ū mu mapande ayo galī ha sīlīlī y'igūlū gūtaalī kwītwa mhayo gīt'ūyo gwītilwe kū nzengo gwa Yelusalemu.

¹³Ū būkenaagūji wenūbū watūgwīlile kūlenganīla nū mumo handīkīlilwe mu shilagīlo sha ng'wa Musa, alīyo nahene tūtaalī ū kūgalūka nūūlū kūshileka ī shibi shise, gīkī tūng'wikūmbīlīje ū SEEBA Mulungu wise, mu nzīla ya kwīdīlīla ī ng'hana yakwe.

¹⁴Ū SEEBA Mulungu wise ng'wene ntūngīlīja mu yose īyo akīītaga, alīyo a bise tūtang'wigwaga, h'ī chene ū SEEBA atasusaanije ū kūtwenhela ū būkenaagūji.

¹⁵“Alilūūlū Seeba Mulungu wise, bebe ūyo ūkabafunya banhū bako mu sī ya Misili na nkono gwa būdūla, wibeegeja lina lya kūshinga ho kūshisha lelo īyī; a bise twīta shibi, tūlī bahūbi.

¹⁶Ee Seeba, ū kūlenganīla nū mumo shilī ī shītīle shako sha būtūngīlīja, būgalūchage ū būdaki wako nū būpelanu wako ūbo ūlī nabo kūlwa Yelusalemu ūyo gūlī nzengo gwako, na lūgūlū lwako lwela. Ī shibi shise nū būsoso wa basīswe h'īsho shenheleja ī Yelusalemu na a banhū bako, kūbiza shikolo sha kūsondagūlwa ū kū bose abo batūpīndije.

¹⁷“Mulungu wise, igwaga ū kūlomba nū kwikūmbīlīja kwa ntūmami wako. Kūlwa nguno yako Seeba, līlolage mu kūlīsaatwa ī lipande lyako lyeela.

¹⁸Ee Mulungu, tegaga gūtū wigwe; lolechaga a miso gako ūkūbone ū kūkenaagūlwa kwa nzengo ūyo gūkitanīlagwa kū lina lyako. Tūtūkwikūmbīlījaga īkī gīkī tūlī batūngīlīja, alīyo kūlwa nguno ya shigongo shako shitaale.

¹⁹Ee Seeba, igwaga! Ee Seeba, lekejaga! Ee Seeba, igwaga na kwīta! Kūlwa nguno yako, Ee Mulungu wane, yaya ū kūdīīla; nguno ū nzengo gwako na a banhū bako bakitanīlagwa kū lina lyako.”

²⁰Aho nalīyomba na kūlomba, kūnū nūshitambūūla ī shibi shane nī shibi sha banhū bane a Baisilaeli, na kūng'wikūmbīlīja ū SEEBA Mulungu wane kūlwa nguno ya lūgūlū lwakwe lwela,

²¹aho nataalī ng'wikanza lya kūlomba, ū Gabulyeli, ū munhū ūyo naalī namona a ha wandījo mu shakoolechiwa, ūchwelemuka izile wangū aho naalī. Yalī bbihī n'ikanza lya shitambò sha mhīndī.

²²Ūniwīla alīhaya, Danyeli, niza lūūlū kūkoolekeja na kūkwinha witegeleja.

²³Īlī gīkī, aho wandya dūhū ū kūlomba, shūfunyiwa shilagīlo, īsho niza kūkūmanīkīja ī haha, nguno ū bebe ūkūjiwe no. Alilūūlū, gwideedeng'hanyage ū mhayo nī shakoolechiwa ūshiitegeleje,

²⁴“Yatūūlagwa ho mifungo makūmi mpungatī[13] kūlwa banhū bako nū nzengo gwako ng'wela; hūna ū būkenaagūji būkūshila, nī shibi shikooyiwa, ū būbi būkūlekejiwa, hūna wenhwe būtūngīlīja bo kūshinga welelo na welelo, ū būhangi būkūshikīīla pyī nī shakoolechiwa, nī lipandī lyeela no no no litīīlwe maguta.

²⁵“Managa na witegeleje gīkī, Kūfuma ikanza lya kūfunyiwa shilagīlo sha nzengo gwa Yelusalemu kūzengwa būpya na kūshoshiwa ūmo gwikalīlaga na kale, kūshisha ikanza lya kwiza Ng'witīīlwa Maguta, ūyo alī nsugi, īkūbiza ho mifungo mpungatī; na mifungo makūmi atandatū n'ībīlī. Gūkūzengwa būpya, gūtūūlīlwa na mabbalabbala na ngoka moi; kwike līkūbiza ikanza lya būluhi.

²⁶Hanuma ya mifungo īyo makūmi atandatū n'ībīlī, ū Ng'witīīlwa Maguta akūbūlagwa, alīyo ītī kūlwa nguno yakwe.[14] A banhū ba nsugi ūyo akwiza bakwiholongeela mo gīt'ihūūma baje bakagūkenaagūle ū nzengo nī lipandī lyeela. Būkūbiza ho būlūgū kūshisha kū būkalīkījo; būhelilwe būkenaagūji.

²⁷Ng'wikanza lya fungo gūmò.[15] Akūtūūla ilagange ha gatī yakwe na banhū bingī. Alīyo ū fungo gūkūshika a ha gatī gatī ūlema ū kūfunyiwa ī shitambò nī shakwinha. Hanuma ū mu hekalu wīmīlīja sha malofu īsho shikenhelejaga būkenaagūji, kūshisha agwisījiwe ū mhayo gwa ng'halīlo ūyo gūhelilwe kūlwa nguno yakwe.”