Read Sukuma Bible 2015 – Bibilia Ilagano Lya Kale 2015 Hosea 10 Bible Online

Hosea 10 - Sukuma Bible 2015 – Bibilia Ilagano Lya Kale 2015 bible

Hosea 10

¹Ū Isilaeli walī nzabibu ūyo gwafulumaga chiza; watwajaga matwajo gakwe ng'wenekīlī. Aho gakwīla a matwajo ūzenga myalīlo mingī; aho yameelela ī mihayo yakwe wandya kūyūgaliila mawe meela.

²Ī ng'holò yabo īkabalemba lembaga, alilūūlū ī haha, leka babūbūūche ū būbi wabo. Ū Seeba akwīkambagūla ī myalīlo yabo, na a mawe gabo a meela.

³Hūna bakūhaya, “Tūtī na ntemi nguno tūtankūgije ū SEEBA. Alīyo nahene nūūlū ni twabiza nang'hwe ū ntemi, ni watwītīla mhayo kī a bise?”

⁴Bakisagījaga mihayo mingī no, nū kwilahīla batogilwe, pyī nū kūbeeja ū būlagane. Alīyo ī mihayo yaya ū kūshila ū mu mabanza; Īkamanagūsonga dūhū gītī malandaala mabi gazwīlile mu ngūnda.

⁵A bikaji ba mu Samalia balīdetema kūlwa nguno ya ndama ya shiikolile sha ng'wa mulungu wa Beeti-aveni. A benekīlī bakwīlīla ng'hūngū, na a bagabīji a balamya ba shiikolile, abo balīyegelile ī likūjo lyayo, nabo bakūlīla nguno balīngījiwa ītwalwe nding'wa.

⁶Īkūtwalwa Ashulu īkabize inong'ho lya ntemi ntaale. Ī Efulaimu īkūgooka no, ī Isilaeli īkūpondwa soni kūlwa shiikolile shayo sha mantī.

⁷Ī Samalia nū ntemi wayo īkweleela Īje na minzī gīt'itambi lyūmu.

⁸A mapande ga higūlya ga Aveni, ūko Baisilaeli bīītīlaga shibi shabo, gakūkenaagūlwa. Magwaata na ming'hwa gakūzwa, gakūlūmatīla a ha myalīlo yabo. Hūna ī ngūlū ī nhaale nī ndo bakūyūjiwīla, “Tūkundīkījagi!” Na, “Tūgwīlagi!”

⁹Ee Isilaeli, ū kwīta ī shibi wandya kūfuma shikū ja Gibea; kūshisha haha ūtaalī gīko. Ū būlūgū būtabapandīkile a bīīti ba shibi ū mu Gibea?

¹⁰Ūlū lyūng'wa ī likanza nakūbinha nsango; mahanga gakūbihoolekela kūbatunga ngoye kūlwa būhūbi wabo, ūbo bahūba ng'hangala ibīlī.

¹¹Ū Efulaimu ng'wene ndogoosa ya ng'ombe īlangilwe, agūtogilwe ū nīmo gwa kūpandagīla būsīga h'itūla; kwike ī haha nakūnseseja ijoki a ha nhingo yakwe ī nogoleku. Ū Efulaimu nakūntūmamya, ū Yuda akūlīma; ū Yakobo shiigelile agūndagūle sī.

¹²Hambagi būtūngīlīja kūlwa solobo ying'we, mukūgesa matwajo ga būtogwa būtī bo kūleba ho; ng'wīgūndūla ī sī ying'we ya lūtinde; nguno īlī h'ī likanza lya kūnkooba SEEBA, kūshisha akwiza ang'witīīle iswaalala lya mbula ya būtūngīlīja.

¹³Alīyo mukahamba ya malofu ng'ūgesa būbi, ng'wagaliile a matwajo ga būlomolomo wing'we. Īkī mukūsanyaga nguzu jing'we na bashilikale bing'we gīkī balī bingī,

¹⁴ū ng'wano gwa būlūgū gūkūbalīlīīla a banhū bing'we, kūshisha ī ng'hambī jing'we ja kūpīlīla jikūkenaagūlwa pyī ī jose, ūmo Shalimani akīkenaagūlīla Beti-alibeli mu lūshikū lwa būlūgū, bakīma būyūtaalīkwa hasī na a baana babo.

¹⁵Nū bebe Ee Beeseli īkūkwilongela Ī yenīyo, nguno ū būbi wako būlī būtaale no. Ū lūshikū lwenūlo ūlū būleela dūhū, ū ntemi wa Isilaeli akūyagajiwa.