Read Sukuma Bible 2015 – Bibilia Ilagano Lya Kale 2015 Hosea 11 Bible Online

Hosea 11 - Sukuma Bible 2015 – Bibilia Ilagano Lya Kale 2015 bible

Hosea 11

¹“Ū Isilaeli aho walī ataalī nīgīnī naalī nantogilwe no, nakang'witana ū ng'wana wane kūfuma Misili.

²Alīyo būlī kongeja kūbitana a Baisilaeli, nabo h'ūmo bongegejaga ū kūnisegenela, kūja kū Mabaali kūgafunīja shimbò; na kū būtongi bo mashiikolile ga kūlamiwa, kūjūfunya shitambò sha kūzuukīja.

³Ū nene hū nakandima nkono ū Efulaimu nūnanga ū kūshimīza; alīyo batitegelegije gīkī hū nene ūyo nakabapīja.

⁴Ū nene nakabatunga mu katungīle ka shigongo sha banhū, mu ngoye ja būtogwa; nūbīngīja ī lijoki īlo lyalī mu nhingo jabo, ninama kūbalisha.

⁵Īkī balemile ū kūgalūka bakūshoka Misili, nīyo bakūsugwa na Ashulu.

⁶Līlūshū līkūbaheleela ū mu mizengo yabo; līkwīkenaagūla ī mibita yabo, lībakenaagūje pyī īyo bīhelile.

⁷A banhū bane bahahaalīlile kūja banileke; nūūlū būnīlīīla ūyo alī Higūlya no, atīho ū wa kūbagūngūhya.

⁸Efulaimu, nakūdūla kinehe ū kūkūlekanīja? Isilaeli, nakūkūponya kinehe? Nadūgije kinehe ū kūkwītīla gītī bana Adima? Nakūdūla kinehe ū kūkwisaaba gītī Zeboimu? Ī ng'holò yane ī haha yagaalūkaga; ī shigongo shane shilībīlīla.

⁹Natīshikīlīja īyo nīhelile mu būdaki wa būpelanu bone, natūgalūka kwīkenaagūla ī Efulaimu. Nguno ū nene nalī Mulungu, natī munhū; nalī Ng'wela ū mu bing'we, natiza mu būpelanu yaya.[15]

¹⁰Bakūnondeela ū SEEBA, nang'hwe akūzumīīlaga gītī shimba, ūlū ūzumīīla a baana bakwe bakwiza bakūdetemaga kūfuma ng'weli.

¹¹Bakwiza bakūdetemaga gītī noni kūfuma Misili, gītī mhunda jifumile Ashulu. Nane nakūbalembeeja mu kaya jabo, alīhaya SEEBA.

¹²Ū Efulaimu anipīndīlīgije būlomolomo hose hose, ī numba ya Isilaeli yokala būmaama. Ū Yuda nang'hwe shitiigwa no ū kūlī Mulungu; atī ng'wigwi ū kūlī Ng'wela na nsanyiwa.