Read Sukuma Bible 2015 – Bibilia Ilagano Lya Kale 2015 Hosea 13 Bible Online

Hosea 13 - Sukuma Bible 2015 – Bibilia Ilagano Lya Kale 2015 bible

Hosea 13

¹Ū Efulaimu wayombaga baadetema a banhū; walī nkūjiwa ū mu Isilaeli. Alīyo akahūba kūlwa kūnamya Baalī, ūbiza waacha.

²Ī haha bakongejaga ū kwīta ī shibi, Ī feza jabo bakūjitūmamīlaga kwibeegejaga shiikolile sha kwaabya, bakūsulaga shiikolanījo bashibeeja mu būgaliili būtaale; pyī ī yenīyo milīmo ya bakoolī. A banhū benaba bakahayiagwa gīkī, “Bakafunyaga shitambò sha banhū, na kūbbipa shiikolile sha ndama.”

³Hūna lūūlū bakūbiza gītī gabu gabu ya dilū, gītī lūme lwa dilū ūlo lūtadīīlaga kūsambaala, nūūlū gītī meela ayo gakaheheejiagwa nyaga kwīnga ha lūbūūga, gītī lyochi ūmo līkapulukīlaga h'idilisha.

⁴Alīyo ū nene nalī SEEBA Mulungu wako kūfuma na a haho ūlī mu sī ya Misili. Ūtaamanile Mulungu ūngī ūlū natī nene kwike, hangī ndūhū mpīja ūngī ūlū natī nene iyene.

⁵Hū nene naakūlang'hanaga aho ūlī kwitogolo, ū kū sī ya līīmi isebu jigi.

⁶Nakabinha shakūlya būlya bigeja, aho bigūta būdoosa hūna būnīība.

⁷Alilūūlū, nakūbatalūkīla gītī shimba, nakūbibandīīla mu nzīla nyasūbī.

⁸Nakūbatalūkīla nabasaasagūle, gītī ndūba yīngījiagwa baana bayo. Nakūbadakuna nyashimba; shiinū ya mu masaka īkūbatandagūla.

⁹Ee Isilaeli, ng'wakenaagūkile kūlwa nguno mukwilwishaga nū nene, ū nene ūyo nalī nguni wing'we.

¹⁰Alī halī lūūlū ī haha ū ntemi wing'we ū wa kūmupīja? Balī halī na a basugi bing'we ū mu mizengo ying'we, abo ng'wahayaga gīkī, “Twinhage Ntemi na basugi?”

¹¹Ū ntemi nakang'winha mu būpelanu bone, hama nūng'wīnja hangī mu būdaki bone.

¹²Ū būhūbi bo ng'wa Efulaimu būtungilwe ng'wibungī, ī shibi shakwe shibambīlilwe hanhū.

¹³Ū nina aho walung'wa būsūngū bo kūmyala, ū wei wiyoolecha gīkī alī ng'wana mbūūlī, nguno aho lyashikaana ī likanza, ūlema ū kūfuma ū munda.

¹⁴A benaba nakūbapīja gete bīnge ū mu būdūla bo shigila?[16] Nakūbapīja bīnge ū mu kūcha? Ee kūcha, galī halī a mahūūya gako? Ee shigila,[17] būlī halī ū būkenaagūji wako? Natūbachīla shigongo biya.

¹⁵Nūūlū abize na nguzu no ū mu baana ba ng'wawe, gūkūhemba nyaga gwa kīya kwīngīīla kūlī SEEBA; nshūūlūlū gūkwiza gūfumile kwitogolo ikalamuku, gūkūlūūmīcha ū lūzwīlo lokwe nū lwinzī lokwe lūkame. Ī numba yakwe ya shikolo īsho wibīīkīja īkūsambūlwa shisolwe mo pyī īsho ibīīkīgije.

¹⁶A banhū ba Samalia shiigelile bagūbūūche ū nsango gwabo, nguno ya kūngomela ū Mulungu wabo. Bakūbūlagwa bo līlūshū, a baana babo bakūyūtaalīkwa hasī, a bakīma babo abo balī nda bakūyūtuumūlwa.