Read Sukuma Bible 2015 – Bibilia Ilagano Lya Kale 2015 Hosea 14 Bible Online

Hosea 14 - Sukuma Bible 2015 – Bibilia Ilagano Lya Kale 2015 bible

Hosea 14

¹Ee Isilaeli, shokaga kūlī SEEBA Mulungu wako. Ī shibi shako hū shene shakūgwisha!

²Solagi mihayo muje nayo ū kūlī Seeba. Ng'wīlagi gīkī, “Tūlekejage pyī ī shibi shise ūtwanukūle mu shigongo, tūyūkūfunīja būlūmbi, ayo galī matwajo ga milomo yise.”[18]

³Ī Ashulu ītīko kūtūpīja; tūtaladamhīla falasa ja būlūgū hangī. Īsho twashibeeja na makono gise tūtalashihaya hangī gīkī, “Bamulungu bise, nguno ū kūlī bebe a bapīna bakachīlagwa shigongo.”

⁴Nakūbapīja ū mu ng'haani jabo, nīyo nakūbatogwa na būtogwa būtī bo kūgemeela, nguno ū būpelanu bone bomalile kwīnga ū kūbo.

⁵Nakūbiza gītī lūme ū kūlī Isilaeli; akūfuluma gītī būlabo. Akūchimīka miji īsegenele a hasī gītī nkoola gwa Lebanoni.

⁶Ī saapa jakwe ī nagana jikūjaama; Ī likūjo lyakwe līkūbiza gītī lya ntī gwa nzeituni, ū ng'waso gwakwe nago gītī gwa nkoola gwa Lebanoni.

⁷Banhū bakwandya kwikala mu mbeho yakwe hangī. Nī mhona ya shilīwa īkwandya, akūfuluma gītī nzabibu, ū lūkumo lwakwe lūkūbiza gītī lwa divai ya kūfuma Lebanon.

⁸Bebe Efulaimu, ū nene[19] nalī na nguno kī hangī na shiikolile sha kūlamiwa? Nakūng'widīka na nakūnguna. Ū nene nabange gītī nzule ndoto, nalī mbūūkī ya matwajo gako.

⁹Nani ū wa masala? Akwīyitegeleja ī yenīyī. Nani ū ndeeba? Akwīmana. Ī nzīla ja ng'wa Seeba jitūngīlīgije; a batūngīlīja bakashimīzīlaga mujo, Alīyo a bagomi bakipamaga moi.