Read Sukuma Bible 2015 – Bibilia Ilagano Lya Kale 2015 Hosea 2 Bible Online

Hosea 2 - Sukuma Bible 2015 – Bibilia Ilagano Lya Kale 2015 bible

Hosea 2

¹A baana ba ng'wing'we a bagosha bawīlage, “Banhū bane,” na a baana ba ng'wing'we a bakīma bawīlage, “Batogwa bane.”

²Ng'hūgūlagi ū nining'we, mung'hame, nguno atī nke wane, nū nene natī ngoshi. Ni īnjage ī nhūngwa ja būmalahya ū kū būshū bokwe, nī mbeele jakwe ooye ū kūjitūmamīla kwiyeja mu būshihani.

³Ūlū ītī chene nakūnzuuja ī shizwalo naneke alī dūūhū gīt'ūmo walī mu lūshikū lwa kūbyalwa kwake; nakūngalūcha abize gīt'itogolo ikalamuku, nang'wīte kūbiza ibbambasī, naneke abūlagwe notà.

⁴Natūbachīla shigongo a baana bakwe, nguno balī baana ba mu būmalahya.

⁵Ū ninabo nshihani no, nī nda wababūkīja mu nzīla j'igisha soni. Wikalaga ūhaya, “Nakūbalondeela abo nakashihyaga nabo, abo bakaninhaga ī shilīwa shane, na a minzī, pyī nū booya bo ng'holò kūlwa kūbeeja shizwalo, nī kitaani, na a maguta nī shakūng'wa.”

⁶Alilūūlū, ī nzīla yakwe nakwīkoba masanzu; nakūngītīīla igoobe atizībona ī nzīla yakwe.

⁷Akūseeseja ūko na ūko akūbakoobaga bashihani bakwe alīyo atūbapandīka; akūbilalangīja no, alīyo atūbabona. Hūna akūhaya, “Ī gete hambū hambū naje dūhū ū kūlī ngoshi wane ūko naalī ī kwandya; nguno ū mu shikū jenījo naalī nabeegije kūtinda ī haha.”

⁸Atamanile gete gīkī nene hū nang'winhaga Ī shilīwa shakwe, nī divai na a maguta; gīkī nene hū nampomeelaga nī feza nī zahabu, shikolo īsho batūmamīlaga kūnamya Baalī.

⁹Alilūūlū, ī shilīwa shane nakūshīnja ūlū shashikaana kūgeswa, nī divai yane ī mhya ūlū lyūshika Ī likanza lyayo. Nū booya bo ng'holo jane nakūwīnja, nī kitaani yane; īsho shaalī sha nkundīkīja ī dūūhū yakwe.

¹⁰Ū mu gīko ū lūhya lokwe nakūlūtenda ha ng'wape kū būtongi wa bitogwa bakwe; hama atilonga wa kūng'wīnja ū mu makono gane.

¹¹Ī shikū jakwe ja būyegi nakūjīnja, Ī shigukulu sha būlī ng'waka, nī shigukulu sha Ng'weji Mpya, nī Sabato jakwe; pyī ī shigukulu shakwe īsho shihelilwe.

¹²Ī mizabibu yakwe nakwīkenaagūla, nī mitiini īyo akahayaga gīkī ya kūnong'hwa na bitogwa bakwe; nakwīyīta ībize masaka, īkūliwa shiinū ja mu masaka.

¹³Nakūngwisīja nsango kūlwa shikū Ījo wajikenaagūla akūgafunījaga Mabaalī shitambò sha kūzuukīja, wikalaga ūzwala sīlī na būlenji būngī, hūna waaja kūkooba bashihani bakwe; alīyo ū nene wanīība, alīhaya SEEBA.

¹⁴Ī haha lūūlū nakūnduta anilondeele, nakūntonga kūja kū sī ng'halamuku nakahooye nang'hwe mu būfula.

¹⁵Ū ng'wikanza alī kwenūko nakūnshokeja Ī migūnda yakwe ya mizabibu, ī mbūga ya Akoli[3] nakwīyīta kūbiza nyango gwa kwenha kwisagīlwa. Ū kwenūko akwīmba[4] gīt'ūmo wītīlaga mu shikū ja walūki bokwe, ikanza lyene wīngaga mu sī ya Misili.

¹⁶Ū SEEBA alīhaya gīkī, “Ū mu lūshikū lwenūlo ūkūnitana, ‘ngoshi wane’; ūtikala ūnitana, ‘Seeba[5] wane.’

¹⁷Ū nomo gwakwe nakūgūlemeja ū kūgahaya a mina ga Mabaali; a mina genayo batalagatūmamīla kwilahīla hangī.

¹⁸Ū mu lūshikū lwenūlo nakūtūūla ilagane a ha gatī yabo nī ndimu ja kū masaka, hamò nī noni ja kūlala, nī shiinū ja kwigwesa hasī. Ū būta, līlūshū, nū būlūgū nakūshīnja ū mu sī, bayūlaala mu mhola.

¹⁹Nakūkūlūnja ūbinze nke wane ilalī; nakūkūlūnja mu būtūngīlīja na ng'hana, mu būtogwa na shigongo.

²⁰Nakūkūlanja mu kūsanya, nang'ho ūkūndeeba ū SEEBA.

²¹Ū mu lūshikū lwenūlo nakwigwa nīīte.” Alīhaya SEEBA; na a malunde nakūgigwa, nago gakwīyigwa ī sī,

²²Ī sī nayo īkwigwa īfunye shilīwa, divai mhya na maguta; ī shenīsho nasho shikwīyigwa ī ya Yezileeli.[6]

²³Nakūng'hamba ū mu sī kūlwa nguno yane nene ng'wenekīlī; nakūng'olekeja ū būtogwa bone ūyo nakang'haya gīkī, “Atī ntogwa wane.”[7] Abo bakūhayiagwa gīkī, “Batī banhū bane,”[8] akūbawīla, “Mulī banhū bane,” nabo bakūhaya, “Ūlī Mulungu wane.”