Read Sukuma Bible 2015 – Bibilia Ilagano Lya Kale 2015 Hosea 6 Bible Online

Hosea 6 - Sukuma Bible 2015 – Bibilia Ilagano Lya Kale 2015 bible

Hosea 6

¹Bing'we tūnshokelagi SEEBA. Na ng'hana watūtandagūlile alīyo akūtūpīja, watūchūūbagūlile alīyo akūgatunga a machūūbagūlīle gise.

²Hanuma ya shikū ibīlī akūtwīta kūbiza bapanga hangī; mu lūshikū lwa kadatū akūtūjūūcha tūbize bapanga kū būtongi bokwe.

³Tūng'witegelejagi ū SEEBA; tongejagi no no no ū kūng'witegeleja. Nguno ū kwilonga kwakwe kūlī kwa ng'hana gīt'ūmo līīmi līkafumīlaga dilū; akūtūgeniha gītī mbula ya mu mīīsa, gītī mbula ya mu shidikū īyo īkīīlobyaga ī sī.

⁴Bebe Efulaimu nakwītīle mhayo kī? Bebe Yuda nakwītīle mhayo kī? Ū būtogwa wako būbange gabu gabu ya dilū, būlī gītī lūme lwa dilū ūlo lūtadīīlaga kūsambaala.

⁵H'ī chene nakakūsengagūla mu nzīla ya bahangi bane, nūkūbūlaga na mhayo gwa kūfuma mu nomo gwane; ū būlamuji bone būyūkwikīīla gītī ndabi ja lūkūba.

⁶Nguno natogilwe shigongo, Ītī shitambò, na kūng'witegeleja Mulungu kūtinda shitambò sha kūpemvwa.

⁷Ī lilagane lyane bakalīkenaagūla ūmo bakīītīlaga dūhū a banhū; a henaho būnīītīla ītigeleelilwe.

⁸Ī Gileadi gūlī nzengo gwa banhū ba malofu, gwateng'wa mininga ga babūlagwa.

⁹Ūmo banyoli bakibandīīlīlaga banhū mu masaka, na a bagabīji bakikobyaga gīko, bakikobyaga kūnyama banhū ng'wikūūwa lya kūja Shekemu; bakīītaga mibi no y'igisha soni.

¹⁰Ū mu numba ya Isilaeli naabonile mhayo gwa malofu. Ū Efulaimu wifunya mīlī ngima kūbiza nshihani, ū Isilaeli wisosohaja no.

¹¹Nū bebe Yuda, ūhelelilwe kūgeswa. Ūlū nihamba kūbashokeja a banhū bane ī jabo,