Read Sukuma Bible 2015 – Bibilia Ilagano Lya Kale 2015 Yoeli 1 Bible Online

Yoeli 1 - Sukuma Bible 2015 – Bibilia Ilagano Lya Kale 2015 bible

Yoeli 1

¹Mhayo go ng'wa Seeba ūyo gūkang'wizīīla Yoeli ng'wana Pesūli.

²Bakūla kale gwigwagi ū mhayo ūyū; bing'we bikaji ba mu sī degelekagi. Ū mhayo gwa mbika īyī gwilonga nūūlū kamò ū mu shikū jing'we, nūūlū ū mu ja bakūlūgenji bing'we?

³Basomboolelagi a baana bing'we, na a baana bing'we balabasomboolele baana babo, a baana babo nabo bakūshiwīla ī shibyalīlwe īsho shilalondeele.

⁴Īsho shalekeelilwe madaale ga ng'hūmbī shalyiwe njige īsho shalekeelilwe na njige, shalyiwe na būtondo wa njige, īsho shalekeelilwe būtondo wa njige, shalyiwe mbilīīzī.

⁵Bing'we banwaagi mishagi mulīle! Tūlagi ng'hūngū bing'we bang'wi ba divai, līlagi ng'hūngū kūlwa nguno ya divai mhya, nguno ng'waasapujiwe ū kū milomo ying'we.

⁶Ibità lyīdumīlile ī sī yane, līlī na nguzu no hangī itaale lītī na būbalīle; līlī na mino gītī ga shimba, mahwīmīlo ga shimba ng'hīma.

⁷Lyīmalile pyī ī mizabibu yane, nī mitiini yane lyīkenaagūla; lyīkūlūlile a magūūla gīnga ho, lyībbutagūlīla hasī, a matambī lyūgakuubagūla geela pe.

⁸Tūlagi ng'hūngū muzwale magūnīla, gītī munhya akūnīlaga ngosha ūyo walī anūngije.

⁹Ī shitambò sha būsu nī shitambò sha kūng'wiwa shitīmo ū mu numba ya ng'wa SEEBA ī haha. A bagabīji abo bakatūmamaga kū būtongi bo ng'wa SEEBA bakūlīlaga.

¹⁰Ī migūnda yakenaagūkile, a malaale gaakalamukile,[1] ī shilīwa shabipile pye; Ī divai mhya yashilile, na a maguta gatīho.

¹¹A bing'we balīmi gwagi ng'holò, ū na a bing'we balīmi ba mizabibu būūlūlūkagi; pīnīhalagi kūlwa ngano na būsīga, nguno a magesa ga mu migūnda gaabipile.

¹²Ū nzabibu gūūmile, nū ntiini gūlūūma ī haha; pyī ī mitī gītī mikomamanga, nhende, malimao, ū mu matogolo īlūūma. Na ng'hana ū būyegi bo ng'wa munhū būtīho ī haha.

¹³Bing'we bagabīji līlagi mulī mu shizwalo sha magūnīla; tūlagi ng'hūngū bing'we batūmami ba ha ng'walīlo. Abo mukatūmamaga kū būtongi bo ng'wa Mulungu, keyulagi būjikū pe muzwalile shizwalo sha magūnīla; nguno ī shitambò sha būsu nī shitambò sha kūng'wiwa shalemejiwe ū kūshika ū mu numba ya ng'wa Mulungu wing'we.

¹⁴Tūūlagi ikanza lya kūfunga kwela; itanagi kwibilinga kwela. Bitanagi a banamhala na a bikaji ba mu sī īyī pye a bose, ni bibilingage ū kū numba ya ng'wa SEEBA Mulungu wing'we, ng'wize munīlīīle ū SEEBA.

¹⁵Galīho makoye ū lūshikū lwenūlo! Nguno ū lūshikū lwa ng'wa SEEBA lūlī hihī; lūkwiza mu nzīla ya būkenaagūji kūfuma kūlī we ū wa Būdūla bose.[2]

¹⁶Ī shilīwa shise shitakenaagūlilwe tūlolile, nū būyegi nū kūzalabana shīnjiwa kūfuma ū mu numba ya ng'wa Mulungu wise?

¹⁷Ī mbīyū jilīcha jifukīīlile hasī. Ī numba ja kūbīkīla shilīwa jakambagūlilwe, na a maluuli gūkenaagūlwa, nguno ī shilīwa shūmīlile mu migūnda.

¹⁸Ī ng'ombe jikūdaayaga! A madaale gakūyūngaga sagala kūlwa kūgayiwa a madīīmīlo; na a madaale ga ng'holo galī mu makoye mataale.

¹⁹Ee SEEBA, nalīkūlīlīīla bebe, nguno moto gwaganogotegije pye a madīīmīlo, Ī mitī ya kū malaale yapiile būpī pyī ī yose.

²⁰Nī ndimu ja mu matogolo jikūseesemaga jikūlolile bebe; ī njonga ja minzī jūūmile kūlū kūlū, a madīīmīlo nago gūūpya moto.