Read Sukuma Bible 2015 – Bibilia Ilagano Lya Kale 2015 Amosi 1 Bible Online

Amosi 1 - Sukuma Bible 2015 – Bibilia Ilagano Lya Kale 2015 bible

Amosi 1

¹Mihayo ya ng'wa Amosi ūyo walī ūmò wa badīīmi ba ng'holo ba mu Tekoa; akībona kūlwa Isilaeli myaka ībīlī aho nyahīnga ītaalī kwilonga. Jalī shikū ja ng'wa Uzia ntemi wa Yuda, na Yeloboamu ng'witūnja o ng'wa Yehoashi,[1] aho alī ntemi wa Isilaeli.

²Akahaya gīkī, “Ū SEEBA akūzuumīīlaga mu Sayuni, alīpalalūka kūfuma Yelusalemu; a madīīmīlo ga badīīmi ba ng'holo gūūmile,[2] Īsho shizwile kū lūgūlū lwa Kalimeli shanyaalile.”

³Ū SEEBA alīhaya gīkī, “Kūlwa būhūbi wa bana Damasiko, ū būhūbi wabo ūbo balemile kūbūleka, natūbūhama ū būpelanu bone. Nguno bakītūla ī Gileadi na matūlīlo gatūūlīlile mino ga chūma, bītūla gītī balītūla būsīga.

⁴Nakūtūma moto ū kū numba ya ng'wa Hazaeli, gūjinogoteje nī ng'hambī ja bashilikale ja ng'wa Beni-hadadi.

⁵Nakūlībīnzagūla ī lilugalīlo lya ha mita gwa Damasiko, nanyagaje ū ntemi wa Aveni,[3] nū wa kūgūdima ū nang'ha gwa būtemi ū mu Beti-aveni. A bana Alaamu bakūtwalwa būding'wa mu sī ya Kili;” alīhaya SEEBA.

⁶Ū SEEBA alīhaya gīkī, “Kūlwa būhūbi wa bana Gaza, ū būhūbi wabo ūbo balemile kūbūleka, natūbūhama ū būpelanu bone. Nguno bakadima ihanga igima, būūkalījinja kū bana Edomu.

⁷Nakūtūma moto ū kū ndugu ja Gaza, gūjinogoteje ī ng'hambī jaamo ja bashilikale.

⁸Nakūnyagaja ū ntemi wa Ashidodi,[4] nū wa kūgūdima ū nang'ha go būtemi ū mu Ashikeloni. Ū nkono gwane nakūgūgalūcha gwilwishe nī Ekuloni, kūshisha a Bafilisiti bashile kūcha,” alīhaya Seeba MULUNGU.

⁹Ū SEEBA alīhaya gīkī, “Kūlwa būhūbi wa bana Tulo, ū būhūbi wabo ūbo balemile kūbūleka, natūbūhama ū būpelanu bone. Nguno bakajinja ihanga igima kū bana Edomu, baalīdalahaga ī lilagane lya būdūgū.

¹⁰Nakūtūma moto ū kū ndugu ja Tulo, gūjinogoteje ī ng'hambī jaamo ja bashilikale.”

¹¹Ū SEEBA alīhaya gīkī, “Kūlwa būhūbi wa bana Edomu, ū būhūbi wabo ūbo balemile kūbūleka, natūbūhama ū būpelanu bone. Nguno bakabakūūbīlīja a badūgū babo gīkī babamale bo lūshū, baalī baponya gete pyī ī shigongo; ū būpelanu wabo walī wabaka ilalī, boolī būtī na nzīla ya kapolele.

¹²Nakūtūma moto ī Temani, gūjinogoteje ī ng'hambī jaamo ja bashilikale.”

¹³Ū SEEBA alīhaya gīkī, “Kūlwa būhūbi wa bana Amoni, ū būhūbi wabo ūbo balemile kūbūleka, natūbūhama ū būpelanu bone. Nguno baabatuumūlaga a bakīma ba Gileadi abo balī nda, gīkī bigalīhīje ī mbīmbī ja sī yabo.

¹⁴Nakūjitiima moto ī ndugu ja Laba, gūjinogoteje nī ng'hambī jaamo ja bashilikale; ū lūshikū lwenūlo lūkūbiza lwa ng'wano gwa būlūgū, lwa mbula ya nyaga ntaale na nsoke gūkwidosaga.

¹⁵Ū ntemi wa ng'wenūmo[5] akūsolwa atwalwe būding'wa, ū wei na a bana ng'oma bakwe;” alīhaya SEEBA.