Read Sukuma Bible 2015 – Bibilia Ilagano Lya Kale 2015 Amosi 2 Bible Online

Amosi 2 - Sukuma Bible 2015 – Bibilia Ilagano Lya Kale 2015 bible

Amosi 2

¹Ū SEEBA alīhaya gīkī, “Kūlwa būhūbi wa bana Moabu, ū būhūbi wabo ūbo balemile kūbūleka, natūbūhama ū būpelanu bone. Nguno bakoocha maguha ga ntemi wa Edomu gūūnogela gūbiza gītī swakala.

²Nakūtūma moto ī Moabu, gūjinogoteje nī ng'hambī jaamo ja bashilikale. A bana Moabu bakūshila kūcha ng'wikanza lya ng'wano gwa būlūgū na kūng'ang'aala kwilaka lya nhaaninga.

³Nakūnyagaja ū nsugi waamo, na a batongeeji baamo nababūlage hamò nang'hwe.” Alīhaya SEEBA.

⁴Ū SEEBA alīhaya gīkī, “Kūlwa būhūbi wa bana Yuda, ū būhūbi wabo ūbo balemile kūbūleka, natūbūhama ū būpelanu bone. Nguno bashilema ī shilagīlo sha ng'wa SEEBA, na a malange gakwe yaya ū kūgadima, nguno ya kūhūmbūūlwa na bamulungu ba nyalomolomo,[6] abo bakūlūgenji babo baabalondeelaga.

⁵Nakūtūma moto ī Yuda, gūjinogoteje nī ng'hambī ja bashilikale ī ja Yelusalemu.”

⁶Ū SEEBA alīhaya gīkī, “Kūlwa būhūbi wa bana Yuda, ū būhūbi wabo ūbo balemile kūbūleka, natūbūhama ū būpelanu bone. A batūngīlīja bakabajinjaga gīkī bapandīke hela, a bagayiwa bayūbakaabanya nūūlū ndaala ibīlī dūhū.”

⁷Bakapandagīlaga mitwe ya bahabī gītī bakūpandaga lūbuubu lwa hasī, na a babo bakiboneelagwa batabīītīlaga kūlenganīla nū būtūngīlīja. Namhala na ng'witūnja wakwe bakūsosohajaga lina lyane lyeela kūlwa kūsangīla būjingi halī nkīma ūmò.

⁸Ī myenda īyo bakadimaga gīkī ng'handīko h'īyo bakambaga būlī ha ng'walīlo gwene baalaalīla; nū mu numba ja bamulungu babo bakang'welaga moi divai ya kūfuma kū banhū abo bakalyiagwa ihyū.

⁹“A Baamoli nakabamala ū kū būtongi wa Baisilaeli, nūūlū īkī baalī balīhu gītī mikoola, na bajaamu gītī mitūndū. Nūgakenaagūla a matwajo gabo ū kwigūlya, nī miji yabo a hasī.

¹⁰Nakang'wenha kūfuma mu sī ya Misili, nūmutonga myaka makūmi anè kwitogolo gīkī nize kūng'winha ī sī ya Baamoli.

¹¹Na bamò ba mū bitūnja bing'we nūbīīta kūbiza bahangi, bamò ba badinha bing'we būbiza Banazili. Gūtī gwa ng'hana ū gwenūyū bing'we Baisilaeli? Alīhaya SEEBA.

¹²Alīyo a Banazili mukayūbinha walwa bang'wa, a bahangi ng'ūyūbalemeja ū kūhanga.

¹³Alilūūlū, nakūmushigambīja ūmo igogoteni līkashigambīgījaga ūlū lyokalaga magūnīla ga būsīga.

¹⁴Ū mpeeji jikūngaya ī nhambo, ū wa nguzu atūbiza na nguzu, nūūlū ū nshilikale atūbūpīja ū būpanga bokwe.

¹⁵Ū nasi atīīma nū būta bokwe, ū nshilikale ū mbūūpu mu magūlū atūsegenela; nūūlū ū mpeelela ha falasa atipīja ū būpanga bokwe.

¹⁶Ū mu lūshikū lwenūlo nūūlū a bashilikale abo batakangagwa bakūbuluguta nhambo balī dūūhū manyegu.” Alīhaya SEEBA.