Read Sukuma Bible 2015 – Bibilia Ilagano Lya Kale 2015 Amosi 3 Bible Online

Amosi 3 - Sukuma Bible 2015 – Bibilia Ilagano Lya Kale 2015 bible

Amosi 3

¹Bing'we Isilaeli; pye a banhū abo naabenha kūfuma Misili, gwigwagi ū mhayo ūyū alīgūhaya ū SEEBA, kūlwa kūmukaanīlīja,

²“Ū mu ng'anda jose ī ja mu sī bing'we dūhū h'abo namusolile; hūna lūūlū nakūng'winha nsango kūlwa shibi shing'we shose.”

³A banhū babīlī badūgije kūshimīza dege alīyo batizunīlīgije?

⁴Ī shimba īkahīīdaga ū mu masaka ūlū ītī na ndimu ya kūlya? Īkūlunduma ū ng'wipilinga ūlū ītadimile shilīwa?

⁵Ī noni īdūgije kūgwashiwa ū mu ntego ūyo gūtategilwe? Ū lūtu lūkataamukaga sagala dūhū nūūlū shitīho sha kūpuja?

⁶Ū ng'wano gwa būlūgū[7] ūlū gūlījiwa mu nzengo a banhū bakūleka kūdetema? Ū nzengo ūlū gūgwīlwa mayanga, atī SEEBA ūyo akagenhaga?

⁷Ū Seeba MULUNGU atīko kwīta mhayo gose gose aho ataalī kūbafuboolela batūmami bakwe a bahangi.

⁸Ī shimba ūlū īkūpogomaga, nani ū wa kūleka kogoha? Ū Seeba MULUNGU wahayile, nani ū wa kūleka kūhanga?

⁹Jikumūkījagi ī ng'hambī ja bashilikale ja Ashidodi, nī ng'hambī ja bashilikale ja Misili: Ibilingīlagi kū ngūlū ja Samalia, mugabone a makoye ga wiyugūūji ayo gal'ū mu nzengo gwenūyo; nū wiboneeji wa banhū baamo.

¹⁰Batamanile gete ū kwīta ī ya būtūngīlīja, ūlū ītī kūbisa dūhū mu ng'hambī jabo shikolo sha kwiba na sha kūtaaja bo nguzu. Alīhaya SEEBA.

¹¹Alilūūlū, ū Seeba MULUNGU alīhaya gīkī, “Ng'wanishi akūkwihoolekela ū mu sī yako, ajikambagūle ī ng'hambī jako ja bashilikale, nī sha mu mabīkīlo gako ashijane.”

¹²Ū SEEBA alīhaya gīkī, “Ūmo ndīīmi akataagīlīgījaga tūguha tūbīlī twa magūlū kūfuma mu nomo gwa shimba, nūūlū kamesulwa ka gūtū, na a Baisilaeli bakūpījiwa gīko; a bana Samalia abo bakalaalīlaga būlīīlī būfuuku na kwigasha ha masumbī mamondu ga Damasiko.”

¹³Alilūūlū, ū Seeba, SEEBA Mulungu wa Būdūla bose alīhaya, “Gwigwagi ū mhayo ūyū, mubize bakaanīji ū mu numba ya ng'wa Yakobo.”

¹⁴Ū mu lūshikū lwa kūng'winha nsango ū Isilaeli kūlwa shibi shakwe, nakwīkenaagūla ī myalīlo ya Beeseli; a mapembe ga ha ng'walīlo gakūmogolwa gaponyiwe hasī.

¹⁵Nakūjikambagūla pyī ī numba, Ī ja mu shikū ja mbeho nī ja mu shikū ja līīmi isebu; Ī numba ja būlenji bo mapembe ga mhūlī jikūkenaagūlwa, nī numba ī nhaale nhaale jikūholomolelwa ha sī, alīhaya Seeba.