Read Sukuma Bible 2015 – Bibilia Ilagano Lya Kale 2015 Amosi 4 Bible Online

Amosi 4 - Sukuma Bible 2015 – Bibilia Ilagano Lya Kale 2015 bible

Amosi 4

¹Gūdegelekagi ū mhayo ūyū bing'we mbogoma ja ng'ombe ja Bashani, Ījo jadoosela mu Lūgūlū lwa Samalia, bakīma biboneeji ba bahabī na baluhya ba bagayiwa, bing'we abo mukikalaga ng'ūsamīlīja bagoshi bing'we mukūbawīlaga, “Enhagi walwa aha tūng'we!”

²Ū Seeba MULUNGU wilahīlile mu wela bokwe; alīhaya: Managi gete gīkī līkūshika ikanza lya kwīnjiwa mutūngilwe malobo, pye a bose mukūhulumūlwa mugwashiwe malobo gītī ndīlo, kūshisha ū wa kūmalīja wing'we.

³Bose pye mukūlongola mujile, būlī ng'wene akūpulukīla ha shisheepo sha mu ndugu, ng'ūkaponyiwa kwitūūgo lya būsoso;[8] alīhaya SEEBA.

⁴Jagi ī Beeseli mukīīte shibi, nī Giligali jagi mukongeje ū kwīta ī shibi. Ng'wenha dūhū ī shitambò shing'we būlī lūshikū ī dilū, Ī zaka jing'we būlī ha numa ya myaka idatū.[9]

⁵Oochagi migatī īlī na shibimbya kūlwa kūfunya shitambò sha kūlūmba; bing'we Baisilaeli ikumūchagi bing'we benekīlī, ng'wikumīlīja mu nzīla ya shitambò shing'we sha wiyaabī. Nguno h'ūmo mutogelilwe ū kwīta; alīhaya Seeba MULUNGU.

⁶Nakamutūmīla nzala ū mu mizengo ying'we, nū mu ng'hambī jing'we, alīyo nahene mutaalī ū kūnishokela. Alīhaya SEEBA.

⁷Nī mbula nakayūyīlemeja ū kūtūla Ītaalī myeji idatū shishikaane ī shilīwa. Nūyūtūma ī mbula ipandī līmò, ipande līngī nīlemeja; ngūnda ūyū gwapandīka mbula, gūngī gwagayiwa gwabiza mu būūmà.

⁸A banhū būyūyūnga mu mizengo na mizengo bakūkoobaga minzī, kwike batapandīkile ga kūbigelwa; alīyo yaya dūhū ū kūnishokela; alīhaya SEEBA.

⁹Ī migūnda ying'we ya shilīwa nī ya mizabibu nītūla būūmà na ngundeela ng'hangala ningī. Nī njige jīlya no ī mitiini nī mizeituni ying'we jīmala; alīyo yaya dūhū ū kūnishokela; alīhaya SEEBA.

¹⁰Naabīta kūmutūmīla mahūūya gīt'ūmo nakīītīla kū sī ya Misili. Badinha bing'we bingī naababūlaga bo līlūshū, hamò nī falasa jing'we ījo jadimagwa mu būlūgū. Na a mūūlū ging'we naagookaja būnung'hu bo būbozu kūfuma mu ng'hambī jing'we, alīyo yaya dūhū ū kūnishokela; alīhaya SEEBA.

¹¹Bamò bing'we naabakenaagūla gīt'ūmo[10] nakabakenaagūlīla bana Sodoma na Gomola. A bing'we ng'walī gītī lūkwi mu moto gūkūligimaga, hūna lūpulwa moi lūgelela kūbabūka, alīyo yaya dūhū ū kūnishokela; alīhaya SEEBA.

¹²Alilūūlū bing'we Baisilaeli, gūūyū ūyo nakūng'wītīla; nose īkī nakūng'wītīla ū gwenūyū bing'we Baisilaeli, malīīlagi ū kūpamanya nū Mulungu wing'we.

¹³Ūwe ūyo alī meeja wa ngūlū na nseemi wa nyaga; ūyo akabakundūlīlaga banhū maganiko gakwe, ūyo akagalūchaga makanza ga dilū kūbiza giiti, ūyo akashimīzīlaga higūlya ya ngūlū ja sī; ū ng'wenūyo ī lina lyakwe SEEBA Mulungu wa Būdūla bose.