Read Sukuma Bible 2015 – Bibilia Ilagano Lya Kale 2015 Amosi 6 Bible Online

Amosi 6 - Sukuma Bible 2015 – Bibilia Ilagano Lya Kale 2015 bible

Amosi 6

¹Mulī mu kwihīga a bing'we bikaji ba mu Sayuni abo ng'wiyīībile, na a bing'we ba mu Lūgūlū lwa Samalia abo mukibonaga mulī mhola, abo mulī bakumūku ū ng'wihanga ī litaale īlī, na a Baisilaeli bakamukoobaga!

²Alijagi ī Kaline mukalole koi; ng'wīnge ū kwenūko muje kū nzengo ntaale gwa Hamasi, hūna mutulumenhe muje na Gaasi, kū sī ya Bafilisiti. A benabo baalī na wiza kī bo kūjiheeba ī sī jing'we būbīlī wajo?[12] Ī sī yabo ngalī kūtinda ī ying'we?

³Ū lūshikū ū lwabūbi mukalūbonaga gīkī lūtaalī kūle no, ū kūnū mukūwegelejaga bbihī ū būsugi bo wiboneeji.

⁴Bing'we abo mukalaalaga ha būlīīlī bo mapembe ga mhūlī, na kwigasha ha masumbī ging'we mamondu. Mukalyaga ng'ondi ja ng'holo songi, na nzagamba ja ng'ombe mūūga, ng'īnu ja kūfuma mu madaale ging'we.

⁵Mutogilwe kūtūla ndono jing'we gītī Daūdi, na kwikala mukūbeejaga shikolo sha kūtūmamīla mu wīmbi wing'we.

⁶Mukikalaga mukūng'waga divai mabbakuli pa pa pa, na kwibila maguta ga ng'waso gwawiza, alīyo yaya ū kūpīnīhala kūlwa kūkenaagūka kwa ng'wa Yosefu!

⁷Hūna lūūlū a bing'we mukūbiza ba kwandya ū mu bading'wa abo bakūtwalwa mu būsaamiwa; Ī mihayo ying'we ya kwigasha mukūlyaga shigukulu īkūshila.

⁸Ū Seeba MULUNGU wilahīlile mu lina lyakwe we ng'wenekīlī; ū Seeba Mulungu wa Būdūla bose alīhaya: Ū wikumīlīja bo ng'wa Yakobo nabūkolilwe no, nī ng'hambī ja bashilikale jakwe natajitogilwe; nakūgūfunya ū nzengo gūding'we, nī shose īsho shilīmo.

⁹Nūūlū būlekeelwa banhū ikūmi mu kaya īmò, bakūcha dūhū nabo.

¹⁰Ūlū ndūgū wiza kwībūūcha Ī mibīlī kwīnga ū mu numba gīkī akījīke,[13] hūna ūmūja ūyo alīmo ū mu gatī ibisile, ūhaya, “Alīmo na ūngī hamò nang'ho?” Nang'we akūhaya, “Mm yaya,” hanuma akūhaya, “Shii! Huumūlaga; yaya ū kūgima kūlīhaya Ī lina lya ng'wa SEEBA.”

¹¹Nguno ū SEEBA wamalile kūfunya shilagīlo, akūjikambagūla ī numba ī nhaale nī ndo jiseesagūke jishile ho gete.

¹²Angū, ī falasa jikapeelaga nū mu sī ya mawe ga milala? Alīho wa kūdūla kūlīma na ng'ombe ū ng'wenūmo? Alīyo a bing'we ng'wagalūcha a kalamulīle ka wīīmà yūbiza sumu, Ī litwajo lya būtūngīlīja nalyo lyūbiza būlūlū.

¹³Mukayegelaga mu būtindi bo Lo Debaali,[14] kūnū mukwiwīlaga, “Ī Kalinaimu tūtīdimile bise bo nguzu jise benekīlī?”

¹⁴Nguno ū SEEBA Mulungu wa Būdūla bose alīhaya, “Bebe numba ya Isilaeli, nakūlīsamīlīja ihanga līkūsange; līkūkūluhya kwandīja Lebo Hamasi, kūjūshika kū mbūga ya Alaba.”