Read Sukuma Bible 2015 – Bibilia Ilagano Lya Kale 2015 Amosi 7 Bible Online

Amosi 7 - Sukuma Bible 2015 – Bibilia Ilagano Lya Kale 2015 bible

Amosi 7

¹Gūūyū mhayo akanoolekeja ū Seeba MULUNGU: Ū mu shikū jenījo walī mu nīmo gwa kūgolanya madaale na madaale ga njige; bakasangwa baamalile ū kūgesa īsho shalīmagwa mbele, ū ntemi ūbiza wapandīka ū ngabo gwakwe, ī sha kabīlī hū shūsangwa shandije dūhū ū kūsonga.

²Ī njige jenījo aho jalya būlī shikolo yūbiza sī yike, nūlīla nalīhaya; Ee, Seeba MULUNGU, lekejaga! Ū Yakobo ndo no! Akūpīla kinehe?

³Na nag'hana ū SEEBA ūlekeja. Ū SEEBA ūhaya, “Ū gwenūyū gūtūshikīīla.”

⁴Ū Seeba MULUNGU ūnoolekeja mhayo gūngī gūūyū: Ū mu shikū jenījo ū Seeba MULUNGU akalagīja nsango gwa moto; gwīyikīīla ī nyanza na būshimu wayo, yūkama; nī sī gwandya kwīlya.

⁵Nūūlīla, “Ee Seeba MULUNGU, lekejaga! Ū Yakobo ndo no! Akūpīla kinehe?”

⁶Na ng'hana ū SEEBA ūlekeja hangī. Ū SEEBA MULUNGU ūhaya, “Nū gwenūyū gūtūshikīīla.”

⁷Hūna ūnoolekeja gūūyū, Ū Seeba walī wīmīīla bbihī na ndugu īyo yalī īzengilwe kūlondeela shipimo sha kabiilū, ū mu nkono walī adimile kabiilū.

⁸Ū Seeba ūnibūūja, “Ūlībona kī Amosi?” Nūshosha, “Kabiilū.” Ū Seeba ūhaya, “Managa gīkī ī haha nalītūūla kabiilū a ha gatī ya banhū bane a Baisilaele; natikala nabiloleelile dūhū.

⁹A mapande ga higūlya ga ng'wa Isaka gakūkenaagūlwa, a mapande meela ga mu Isilaeli gakūbipiwa; Ī numba ya ng'wa Yeloboamu nakwīyūbūkīla na līlūshū lyane.”

¹⁰Hūna ū Amazia, ū ngabīji wa Beeseli ūtūma nhūng'wa ū kūlī Yeloboamu ntemi wa Isilaeli kūhaya: Ū Amosi wandije kūkūsoba ū mu Baisilaeli. Ī sī ītūdūla ū kwikala iyūmīlajaga kūgadegeleka pye a mamihayo gakwe.

¹¹Nguno wandije kūmanūhaya gīkī, Ū Yeloboamu akūbūlagwa bo līlūshū, na a Baisilaeli bakūding'wa basaamiwe, basegenejiwe kūle nī sī yabo.

¹²Hūna ū Amazia ūng'wīla ū Amosi, Bebe moni, īngaga a henaha! Shokaga kū sī ya Yuda, ūkūjūpandīkīla kwenūko ī shilīwa shako, nū būhangi wako ūkīītīle kwenūko.

¹³Oyaga ū kūhangīla ī Beeseli, nguno ī lyenīlī ipandī lyeela lya ntemi, na hekalu ya būtemi ūbū.

¹⁴Ū Amosi ūnshokeja ū Amazia, “Ū būhangi gūtī nīmo gwane ū nene, nūūlū natī ng'wana wa ng'hangi, alīyo nalī ndīīmi wa ng'holo kwīngīīla kale, na nang'hani wa mikūyū[15] dūhū.

¹⁵Alīyo ū SEEBA akanīnja ū kū nīmo gwa kūdīīma ng'holo ūniwīla, ‘Jaga ūkabahangīle a banhū bane a Baisilaeli.’”

¹⁶Alilūūlū, gūdegelekage ū mhayo go ng'wa SEEBA. Ū bebe ūlīhaya gīkī, “Lekega ū kwīhangīla ī Isilaeli, na gīkī oyaga ū kūbalomeela a banhū ba numba ya ng'wa Isaka.”

¹⁷Hūna lūūlū ū SEEBA alīhaya gīkī, “Ū nke wako ū bebe akūbiza malahya wa mu nzengo, a bitūnja na a bashīke bako bakūbūlagwa bo līlūshū. A malaale gako gakūping'wa bo ngoye gagabanhyiwe; hama ū bebe ng'wenekīlī ūkūchīla kū sī ya kūle.[16] A Baisilaeli bene bakūja kū būsaamiwa ng'hana, bakūja kūle nī sī yabo.”