Read Sukuma Bible 2015 – Bibilia Ilagano Lya Kale 2015 Amosi 8 Bible Online

Amosi 8 - Sukuma Bible 2015 – Bibilia Ilagano Lya Kale 2015 bible

Amosi 8

¹Ū Seeba MULUNGU ūnoolekeja mhayo gūngī gūūyū, shigabbu sha matwajo gapiile.

²Ūnibūūja, “Amosi ūlībona kī?” Nūnshokeja, “Shigabbu sha matwajo.” Hūna ū SEEBA ūhaya, “Lyashikaga ī likanza lya banhū bane a Baisilaeli; natikala nabiloleelile dūhū.”

³Ū Seeba MULUNGU alīhaya, “Ū mu lūshikū lwenūlo, a mīmbo ga mu hekalu gakūgalūka kūbiza ng'hūngū.[17] Mibimba mingī īkūponanjiwa ūko na ūko, bo sele sele!”

⁴Bing'we biboneeji ba bagayiwa na bayagaja ba bahabī, gwigwagi ū mhayo ūyū.

⁵Bing'we abo mukahayaga, “Ī Shigukulu sha Ng'weji Mpya shikūshila nanalī tūjinje shilīwa, nī Sabato ni īkūkalīka nanalī twandye kūsūlūja muchele?”[18] Tūkūyūshigehya ī shipimo twagūtūūla higūlya ū mpango; na kūyūbakīja masala bo ngelekelo ja nyalomolomo.

⁶A bahabī tūkūyūbagūla bo hela, a bagayiwa nūūlū ndaala ibīlī dūhū; nīyo na a meela tūkūyūgajingīja mo ū mu muchele.

⁷Ū SEEBA wilahīlile kūlw'ikūjo lya ng'wa Yakobo, wahayile gīkī, “Natīība shose shose īsho bashīta.”

⁸Ī sī ītūdetema kūlwa mhayo ūyū, na a bose abo bakikalaga moi? Ī sī īkookala pa gītī mongo gwa Nile; Īkūyugūūka hūna īkame gītī mongo gwa Misili.

⁹Ū Seeba MULUNGU alīhaya, “Ū lūshikū lwenūlo nakūwīta wile alīyo ītaalī līīmi ntwe gatī, Ī sī nakwīyīītīla giiti makanza ga līīmi lūgala.”

¹⁰Ī shigukulu shing'we sha dini nakūshigalūcha shibize makanza ga būpīna, na a mīmbo ging'we gakūgalūka kūbiza ng'hūngū. Nakūng'wīta pye a bose muzwale shizwalo sha magūnīla, nī mitwe ying'we muhalūle mapala. Ī likanza lyenīlo nakūlyīta lībize gītī lya kūnīla ng'wana[19] ūmò wike; ū kū ng'halīlo yaho lūkūbiza lūshikū lwa kūsaatwa kūtaale.

¹¹Ū Seeba MULUNGU alīhaya gīkī, “Jikwiza shikū ījo nakūtūma nzala ū mu sī, kwike ītī nzala ya shilīwa nūūlū notà ya minzī, alīyo nzala ya kwigwa mihayo ya ng'wa SEEBA.”

¹²Banhū bakūyūhūhūūdīka bakūkīlaga manyanza na manyanza, na kūyūnga kūfuma sukuma kūja kīya, bakūgūkoobaga ū mhayo go ng'wa SEEBA; alīyo batūgūpandīka.

¹³Ū mu lūshikū lwenūlo banhya basoga kūlola na basūmba ba nguzu bakūgwa mhūngīli kūlwa notà.

¹⁴Abo bakilahīlaga mu lina lya ng'wa Ashima[20] wa Samalia kūnū bakūhayaga gīkī, “Ūmo alī mpanga ū mulungu wako Dani,” nūūlū gīkī, “Ūmo alī mpanga ū mulungu wa Beeli-sheba, bakūgwa, na batūdūla kūgūngūmūka hangī.”