Read Sukuma Bible 2015 – Bibilia Ilagano Lya Kale 2015 Obadia 1 Bible Online

Obadia 1 - Sukuma Bible 2015 – Bibilia Ilagano Lya Kale 2015 bible

Obadia 1

¹Shakoolechiwa sha ng'wa Obadia. Ū Seeba MULUNGU alīhaya mhayo ūyū kūlwa sī ya Edomu; Twigwile mhayo kūfuma kūlī SEEBA: Nhūng'wa jatwalilwe kū mahanga; jilīhaya gīkī, “Būūkagi tūnsange tūkilwishe būlūgū nang'hwe.”

²“Managa gīkī nakūkūdooheleja ūbize ndo wa bado ū mu mahanga, ūkūdalahwa kībi no nīyo.

³Ū wikumīlīja wa ng'holò yako būkakūlemba lembaga; bebe ūyo ūkikalaga mu mahalo ga mawe, ī kaya yako wītūūla kūle kwigūlya, hūna ūyiwīla bebe ng'wenekīlī, ‘Nani akūnicha hasī ū nene?’

⁴Ū bebe nūūlū īkī ūkalalaga winunga gītī ng'hoonà, nī chanjo shako ūzengelile ūko jilī sonda, nakūkwicha hasī nene.” Alīhaya SEEBA.

⁵A biibi ūlū būkūsanga, basambo biza būjikū kūkūdumīla, bakūkūlekela mibi no! Batiiba gīt'ūmo batogelilwe dūhū? Nūūlū bahūlūji ba mizabibu būkūsanga, batūkūlekeelela zabibu ngehu ja kūpūmbīīla dūhū?

⁶Ee, Esau, ūkūfunangūlwa kībi no, Ī sabo ja wibīkīja wako jikūjanwa pye!

⁷A biyo abo mulī būlagane būmò nang'ho bakūkūkandīkīja kū lūbīmbī; banwani biyo bakūkwibanga bakūgwishe; banhū abo ūkalyaga nabo shilīwa shako bakūkūtega ikila, alīyo ūtūdūla ū kūliitegeleja.

⁸Ū SEEBA alīhaya gīkī, “Ū mu lūshikū lwenūlo, natūbayagaja a banhū ba masala ū mu Edomu, a badeeba ū mu lūgūlū lwa ng'wa Esau?”

⁹Ee Temani, a bagosha ba mbagashūūla bako bakūbbaha; ū ng'wikanza lya kūbūlagwa būlī munhū akūsīnzwa ū mu lūgūlū lwa ng'wa Esau.

¹⁰Ūkūgooka kūlwa būbi ūbo wang'wītīla ū ng'wanong'wing'we ū Yakobo; ūkūkenaagūka ilalī.

¹¹Ū mu lūshikū lwene ū bebe walī wīmīīla ha mhūjo, banhū babūbi bakūsolaga sabo jakwe, mahanga ga kūle gūyingīla ū mu mibita yakwe, kwītūlīgīja mbale ī Yelusalemu, nū bebe walī gīt'ūlī ūmò wabo.

¹²Yalī ītakwigeleelilwe kūng'wisesa ū ng'wanong'wing'we ū mu lūshikū lwa mayanga gakwe; nūūlū ū kūyega ū mu lūshikū lwa kūkenaagūlwa banhū ba Yuda; yaya nūūlū kwikumīlīja gīko ū mu lūshikū lwa kūluhiwa kwabo.

¹³Yalī ītakwigeleelilwe kūbīta ū mu mibita ya banhū bane mu lūshikū lwa makoye gabo, nūūlū kūbisesa kūlwa mayanga gabo ū mu lūshikū lwa makoye gabo; yaya nūūlū kūsola sabo jabo ū mu lūshikū lwa kūluhiwa kwabo.

¹⁴Yalī ītakwigeleelilwe kūbitegeela ha nzīla maakà, na kūyūbabūlaga abo balīpeela, nūūlū kūbalodeela abo balīpūlūgūka ū mu lūshikū lwa kūluhiwa kwabo.

¹⁵“Ū lūshikū lo SEEBA kūlwa mahanga gose lwegeelaga. Ūmo ng'wītīla, na a bing'we mukwītīlwa gīko; ī shītīle shing'we shikūmushokela ha mitwe ying'we.

¹⁶Ūmo bing'we mukang'wela ū mu lūgūlū lwane lwela, h'ūmo bakūng'wela na a banhū ba mahanga pye a gose; nīyo bakūmanūng'wa bishokeela hangī na hangī; kūshisha babize gītī baalī batīho nūūlū hado.

¹⁷Alīyo ū mu lūgūlū lwa Sayuni būkūbiza mo būpīji; ū loi lūkūbiza lwela, nī numba ya ng'wa Yakobo Īkūbūdima ū wingīji wayo.

¹⁸Ī numba ya ng'wa Yakobo Īkūbiza moto; ī ya ng'wa Yosefu yūbiza lūlali. Lelo ī numba ya ng'wa Esau ī yene īkūbiza mapalala, bakwībbiisha īnogotele īshile gete. Atūsaaga nūūlū wa ngota ū mu numba ya ng'wa Esau.” Alīhaya SEEBA.

¹⁹Banhū ba kūfuma Negevu bakūjidima Ī ngūlū ja ng'wa Esau, banhū ba kū mbūga ya Shefela bakwīdima ī sī ya Bafilisiti. Bakūgadima na a malaale ga mu Efulaimu na Samalia; Benjamini ng'wene akūsola Gileadi.

²⁰Ī ligelè lya Baisilaeli abo baasaamiwa alīyo balī mu Kanaani, bakwīdima ī sī kūjūshika mhandī ja Zalefati; abo baasaamiwa kūfuma Yelusalemu hama ī haha balī Sefaladi, bakwīdima ī mizengo ya Negevu.

²¹Bagunanhi bakūlinha kū lūgūlū lwa Sayuni; bakūbiza basugi mu ngūlū ja Esau. Hama ū būtemi būkūbiza bo ng'wa SEEBA.